Read Maasai Bible – Biblia Sinyati Esekiel 5 Bible Online

Esekiel 5 - Maasai Bible – Biblia Sinyati bible

Esekiel 5

¹“Ore iyie, enkerai e tung'ani, iwa olalem opi; intaa olmurunya libarnie kewan, nibarnie elukunya ino tenebo olmunyei lino; niya intemeta naaineneng'ishoreki nior lelo papit kat uni.

²Ore ematua e nabo te uni nipejoo te nkima te mpolos e nkanasa, ore peyie eishunye inkolong'i emanata e nkanasa; ore ematua e nabo te uni niya adung'udung to lalem aitaman enkanasa; ore ematua nabo te uni nindapashaki enkijape, naa kashurtu olalem asujaa ninche.

³Niya te kulo enkiti siana oo lpapit aeniki olcholoi lo lkila lino.

⁴Nintoki aitayu ilkuti te kulo, nipik ninche enkima, nipejoo ninche te nkima; ore teine nelotu enkima adoiki atua ina aji pooki e Israel.”

⁵Inji ejo Olaitoriani Enkai: Ore ena Yerusalem; aitasheyie ninye te mpolos oo loreren, netii nkuapi naamanita ninye.

⁶Neewuo ninye te ntorroni e nkiseroto agilunore inkitanapat aainei alang iloreren, negilunore ninye inkitanapat aainei alang nkuapi naamanita ninye, te anyata natanyaita inkitanapat aainei neitu epuoyie nkikoot aainei.

⁷Metaa inji ejo Olaitoriani Enkai: Ore amu itarruoitie aalang iloreren oomanita intae neitu ipuopuo too nkiguanat aainei, anaa imbung'ubung'u nkikoot aainei, niasiasa enaas nkitanapat oo loreren oomanita intae;

⁸neaku inji ejo Olaitoriani Enkai: Ing'ura nanu ilo oarare intae; naa kayau inkiguanat erishata inyi edolita iloshon pooki.

⁹Naa ore te nkaraki olminong linyi pooki, kaitaas intae eneitu aekata aitaas intae, anaa enanyaanyukie enemaitoki aikata aas aigil.

¹⁰Metaa kenya iloomenye ilayiok lenye tiatua intae, nenya ilayiok iloomenye, naa kadung'oki intae enkiguana, ore pooki ng'ae linyi oleku naidapashaki inkaloli pooki e nkijape.

¹¹Neaku ore naa anaa enaishu nanu, ejo Olaitoriani Enkai, esipa tukul, ore amu isarkionie ewueji ai sinyati too ntokitin pooki torrok o siaaitin inyi pooki torrok, neaku kaing'uaa intae nemapal eitu aitame intae maata olng'ur.

¹²Ore ematua inyi nabo e uni naa keye to lmeitai neijori to lameyu tiatua intae; ore ematua nabo e uni naa kebatatakino olalem te rishata namanita intae; ore ematua nabo e uni naa kaidapashaki ilubot pooki enkop, nashurtu olalem asuj ninche.

¹³“Neaku neijia eikununye engoro ai napi tenelotu naa kainuaaki engoro ai ninche naitaraposh kewan; netum ninche aatayiolo aajo ore nanu Olaitoriani airoro to lom lai, ina kata naitorioki engoro ai napi shumata ninche.

¹⁴Ore ake sii naa kaitomijoon intae, niakuku entoki enkurruna tiatua lelo oshon oomanita intae o te dukuya lelo pooki oodol intae egiroo.

¹⁵Iyakuku enkurruna o entoki namenari, enkisikong'a oloputukunyi, te nena kuapi naamanita intae, ina kata nayau inkiguanat ayaki intae te ngoro o te ngoro napi o too oshot engoro enkitamioto. Nanu Olaitoriani oiroro.

¹⁶Ina kata nalaku agilunore intae too mbaa aainei e sayiet olameyu, imbaa emutata, nena nalaku meidaikie intae; ina kata naitasapuk olameyu oleng te intae, nadung'oo ineeimu indaiki inyi.

¹⁷Ekairriwaki intae olameyu o ng'uesi e ntim metigilunore intae, naa keoru intae inkera inyi, neim olmeitai o sarge atua intae naa kayau olalem shumata intae. Nanu Olaitoriani oiroro.”