Read Maasai Bible – Biblia Sinyati Esekiel 8 Bible Online

Esekiel 8 - Maasai Bible – Biblia Sinyati bible

Esekiel 8

¹Ore to lari le ile, to lapa le ile, te nkolong e miet o lapa, ore atonita te nkaji ai, tenebo ilpayiani le Yuda etoni te dukuya nanu, nelotu engolon o Laitoriani Enkai shumata nanu.

²Ina peyie aing'orisho nadol enkitanyaanyukoto natiu anaa eno ltung'ani; netiu ina kitanyaanyukoto aiteru te mpolos anaa enkima, ore te shumata empolos enye netiu anaa osuyai oitiil otisikaki.

³Neitorioo enkitanyaanyukoto naaijo enkaina, naaya nanu adumu aibung ilpapit le ndukuya ai; naadumu nanu Enkiyang'et ailepie aya erishata e nkop o keper, naayau nanu too nduaat Enkai Yerusalem, naapik kishomi najing'ieki endung'oroto e atua ina naipirare moikuape, ine apa netii olorika le nkitanyaanyukoto o lom, ina naipiru aaku olom.

⁴Netii enkitoo e Nkai e Israel ine anaa apa enduaata natoduaa te nkisiajata.

⁵Naajoki ninye nanu, “Enkerai e tung'ani, taraposhu nkonyek inono shumata ing'ura enkalo e moikuape.” Metaa ataraposhuo nkonyek aainei aitorioki moikuape, naa ng'ura, ore te moikuape e kishomi o lperere lo lasar, teine nejing'ieki, netii apa enkitanyaanyukoto olom.

⁶Naajoki ninye nanu, “Enkerai e tung'ani, idolita enaasita ninche? Olminong kitok oasita enkaji e Israel tene, kaaraa nanu aitalam ewueji ai sinyati. Kake eton ake intoki adol likae minong sapuk.”

⁷Naayau nanu kutuk aji e ilo odung'oro; ore peyie aing'or, nadol etii enaudoto natii esuntai.

⁸Naajoki ninye nanu, “Enkerai e tung'ani, tuturo atua esuntai”, ore peyie atur esuntai natum kutuk aji.

⁹Naajoki ninye nanu, “Shomo atua, nidol intabo olminong naasita ninche tene.”

¹⁰Metaa nalo atua nadol; ore teine, etisiraki te suntai aaitaman ing'uesi pooki naaiserpepiari o ng'uesi pooki torrok o nkitanyaanyukot oo nkaitin pooki nemeishu e nkaji e Israel.

¹¹Neitashe te dukuya ninche iltung'ana ntomoni naapishana loo lpayiani le nkaji e Israel, tenebo Yaasania olayioni le Shafan eitashe tenebo ninche. Neeta ake pooki ng'ae lenye entoki napejieki enkorropil te nkaina enye, neilep empuruo e nkorropil shumata.

¹²Ina pee aajoki ninye nanu, “Enkerai e tung'ani, itodua enaasita ilpayiani le nkaji e Israel tenaimin, pooki tung'ani ake tiatua olgilata lenye too mpishai? Amu ejo ninche, ‘Medol iyiook Olaitoriani, eibayie Olaitoriani enkop.’ ”

¹³Naaitoki ake ajoki nanu, “Intoki ake adol kulie tabo o lminong naasita ninche.”

¹⁴Ina peyie aariku nanu kishomi enkalo e moikuape enkaji o Laitoriani; nadol etoni inkituaak teine naaishiraki enkai enye naji Tammus[4].

¹⁵Ina pee aajoki ninye nanu, “Itodua iyie ena, iyie nakerai e tung'ani? Intoki ake adol intabo olminong sapuki naalang kuna.”

¹⁶Naayau ninye nanu olgilata liatua le nkaji o Laitoriani: naa ng'ura ore te kutukaji e nkaji o Laitoriani, enerish eneimi o lgoriet o lperere, netii iltung'ana oobaya tikitam o imiet, eisho nkoriong'i enye ina aji o Laitoriani, neing'orita nkomomi enye enkalo o loosaen, eomon enkolong te nkalo oloosaen.

¹⁷Ina pee aajoki ninye nanu, “Itoduaa iyie ena, Nakerai e tung'ani? Kentoki nalelek te nkaji e Yuda pee eas intabo olminong naasita tene, eji metaa keiput enkop pooki enkikonya naainuaaki nanu oleng matagoroyu? Ng'ura, epik olng'osila lenye inkumeishin enye.

¹⁸Metaa kaitame te ngoro napi; meitoki enkong'u ai aleku, nemaitoki aata nanu olng'ur; ore hoo neishir too nkiyiaa aainei to ltoilo sapuk, mainining'u ninche.”