Read Maasai Bible – Biblia Sinyati Esekiel 9 Bible Online

Esekiel 9 - Maasai Bible – Biblia Sinyati bible

Esekiel 9

¹Neishir ninye to ltoilo sapuk too nkiyiaa aainei ejo, “Entinyiku, intae oopuo aar enkanasa, pooki ng'ae ake te ntoki nalo amutishore te nkaina enye.”

²Namaniki eetuo iltung'ana ile te nkalo e nkishomi e shumata, natii enkalo e moikuape pooki tung'ani ake eeta entoki enye namutishore te nkaina enye, netii tenebo ninche oltung'ani oishopito enkila napuyiapui, tenebo entoki naigerishoreki te matua enye. Nepuo atua neitashe te mbata olperere lo suyai.

³Ore ina kata neshomo enkitoo e Nkai e Israel aing'uaa lelo kerubi laa ninche etotonie teine nejing'ieki ina aji, neipot ilo tung'ani oishopito enkila napuyiapui, ilo oata entoki naigerishoreki te matua enye.

⁴Nejoki Olaitoriani ninye, “Shomo topolosa enkanasa, turuko Yerusalem, nipik olmishire shumata oo nkomomi e lelo tung'ana pooki ootanyamala te nkishirata osina te nkaraki olminong otaasaki tiatua.”

⁵Nejoki ilkulikae aning'ito, “Entopolos ina anasa isujaa ninye, niariara emincho nkonyek inyi eleku, nimintodolulu hoo olng'ur;

⁶eishu iltung'ana pooki kituaak teine, ilbarnot o ntoyie, nkera kutiti o nkituaak, kake emishoroo ake pooki ng'ae oata olmishire. Naa enteru te wueji ai sinyati.”

⁷Neitoki ajoki ninche, “Esarkionie ina aji, nimputuputu ilo odung'oro ilmeneng'a. Enchom dukuya.” Metaa eshomo dukuya, nearisho tiatua ina anasa.

⁸Ore ina kata earisho, naatung'uayioki aa nanu ake, nabatata te nkomom ai aishir, “Aha Olaitoriani Enkai! Indaikie iyie ilekunot pooki le Israel te mbukunoto engoro ino napi te Yerusalem?”

⁹Naajoki ninye nanu, “Ore entorroni enkaji e Israel o Yuda netuluso aaku sapuk oleng; eiputa enkop pooki osarge, neiputa enkanasa imbaa nemesipa; amu ejo ninche, ‘Eibayie Olaitoriani enkop, nemedol Olaitoriani.’

¹⁰Ore te nanu meleku enkong'u ai, nemaata olng'ur, kake kaitalaku ninche anaa enatiu isiaaitin te shumata ilukuny enye.”

¹¹Namaniki oltung'ani oishopito inkilani naapuiyapui, tenebo entoki naigerishoreki te matua enye pee eyau olkilikuai ojo: “Ataasa anaa enikintanapa.”