Read Maasai Bible – Biblia Sinyati Hosea 13 Bible Online

Hosea 13 - Maasai Bible – Biblia Sinyati bible

Hosea 13

¹Teneiro apa olosho le Efraim, neikirikira iltung'ana; eilepieki apa ninye tiatua kulikai oshon le Israel; kake etaasa ninye entorroni aserem enkitanyaanyukoto e nkai naji Baal, neye.

²Ore taata neponaa ninche aas ing'ok, neitobiraki ate nkitanyaanyukot naasholuni, o nkitanyaanyukot naaitayuni te nkarriyiano te nkosholai enye, ore ninche pooki naa esiaai oo ltung'ana arriyiak. Nejo, “Entopolosaki kuna. Neng'utut iltung'ana inkaitin oo lasho.”

³Ore te nkaraki ina ketiu ninche anaa enkinuku e nkakenya, aashu anaa enkoileelio nayooki aishunye, anaa suut naakutaa osiwuo te wueji neidong'ishoreki aashu anaa empuruo naipang'u te lusie.

⁴Ara nanu Olaitoriani Enkai ino ore apa te nkop e Misiri; miyiolo ae Ai neme nanu, nemetii likae aitajeunoni leme nanu.

⁵Nanu apa ilo laatayiolo ti ong'ata, tiatua ina kop o lpurkel;

⁶kake ore apa pee edaa ninche aaraposho, neiputakino ninche, ore iltauja lenye nedumunye; neaku aatorikinote ninche nanu.

⁷Ore enkaraki ina katiu nanu te ninche anaa olng'atuny, karresh ninche te mbata e nkoitoi anaa olowuaru keri.

⁸Kadoiki nanu ninche anaa olng'arurumi otooruoki nkera enyena, kapolos nanu olgoo lenye, ore teine naidaikie nanu ninche anaa olng'atuny, anaa enaiko enkukuu.

⁹Kaidakie nanu intae, Israel; kaing'ae oidim atareto intae?

¹⁰Koree taata olaiguanani lino pee kintajeu; koree lelo kituaak linono pooki pee kimitu lelo apa litejo iyie, “Inchooki nanu olaiguanani o ilkituaak?”

¹¹Aaishoo nanu iyie olaiguanani te ngoro, naiwuang'ie ninche te ngoro ai.

¹²Ore enkarruoisho e Efraim netirridaki, ore eng'oki enye netushumaki te mpere.

¹³Etabawua emion esaisai te nkaraki ninye, kake olayioni omoda ninye, amu ore o taata melotu ninye aimu enguset e ishoi.

¹⁴Kakordu nanu ninche te ng'olon e nemeneng'a? Kainyang'u nanu ninche aitung'uaa keeya? Nakeeya, koree ilmeita linono? Nemeneng'a koree enkidaata ino? Eiwuang'ieki olng'ur too nkonyek aainei.

¹⁵Ore hoo duoo ninye tenaa kebul ninye anaa oseyiai kelotu olkutati oing'uaa enkilepunoto e nkolong, kelotu olkutati lo Laitoriani, ailepu eing'uaa olpurkel; ore inkonyek enyena oo nkariak netoyu, ore nchorroi enyena neishieki; neishie ilo kutati olchumati lenye te pooki toki e tipat.

¹⁶Kelo Samaria anap enkitarruoroto enye, te nkaraki natogolong'aka ninye Enkai enye; kepuo ninche aabatata to lalem, ore nkera enye kutiti neitaa ndung'udung'ot, ore nkituaak naanuta, nebuli nkoishuaa.