Read Maasai Bible – Biblia Sinyati Hosea 4 Bible Online

Hosea 4 - Maasai Bible – Biblia Sinyati bible

Hosea 4

¹Entoning ororei lo Laitoriani lo tung'ana le Israel; amu keeta Olaitoriani olarrabal too ltung'ana lena kop. Metii esipata aashu esupatisho, nemetii eyiolounoto e Nkai ena kop.

²Etii enkinosata o lmumai o elejare o esesekuanare o empurrorre o eloloito; elang'u ninche ilpolosien pooki neitusuj iloikop iloikop.

³Ore te nkaraki ina neishir enkop, ore pooki ootii atua neye, o ng'uesi e ong'ata o ntaritik o loing'ang'e, ore sii isinkir le naiposha neiwuang'ieki.

⁴Ore ake eyia mincho hoo ng'ae ekesha, nimincho hoo ng'ae eitang'orisho amu iyie etii enkesha ai, lo apolosak.

⁵Irrorrorro intae dama, nerrorro sii oloiboni te nebo intae kewarie, naa kaar nanu ng'utunyi.

⁶Eidaikieki iltung'ana laainei te nkaraki nemeeta eng'eno te nkaraki nitanyaita intae eng'eno, aatanya nanu iyie pee miaku olapolosani te nanu. Naa ore anaa enikitorikine enkitanapata e Nkai ino madamu sii nanu inkera inono.

⁷Ore anaa enatoponari, neponari aas ing'ok ti alo nanu; kaibelekeny nanu enkisisa enye metaa enkurruna.

⁸Keitoti ninche ate too ng'ok oo ltung'ana laainei; neeta ninche olorok too ntorrok enye.

⁹Naa ketiu ake anaa enatiu too ltung'ana, to lapolosani, kaitame nanu ninche te nkaraki inkoitoi enye, naitalaku te ninche nkiaasin enye.

¹⁰Kedaa ninche nemeraposho; neiborrie ninche onyek, kake meponari; amu etung'uaitie ninche Olaitoriani ejo pee eitumurru eloloito.

¹¹Ore enaisho musana o eng'ejuk, neoru iltung'ana indamunot.

¹²Entoki e nchani eikilikuanishore iltung'ana laainei, neisho eng'udi oo nkitanapat. Amu eitapong'oyie ninche oltau le nkiborra oo nkonyek, neitung'uaitie ninche Enkai enye aapuo aaiborrie onyek.

¹³Keitayu ninche ilassarri too nchumat oo ldoinyo, neitobir nkishoorot too nchumat oo ldoinyo ti abori ilkeek sapuki amu eisidan iloipi lenye. Neaku keibor onyek ntoyie inono, ore siankikin inono naayama neloloito.

¹⁴Maitame nanu ntoyie inyi te nkiborra enye oo nkonyek, aashu nena siankikin inono naayama te neloloito; amu ore lelo lewa maate nepudariyie nkituaak naaibor onyek neitayu ilasarri te nebo nkituaak naibor onyek naa kepuonu olorere lemeeta eyiolounoto aaidak.

¹⁵Ore hoo nikimbor onyek, iyie Israel, mincho Yuda etiu neijia. Mijing atua Gilgal, nimilep alo Bet-afen, niminya olmumai ajo, “Anaa enaishu Olaitoriani.”

¹⁶Ore anaa enkashe nape, kepe Siraeli; keidim sa Olaitoriani aitotio ninche anaa olkuoo le ker to lokeri olala?

¹⁷Eibung'are Isiraeli inkitanyaanyukot, talama ninche.

¹⁸Olturur loo lamerak, eishooitie ate te nkiborra oo nkonyek; kenyor ninche enkurruna alang enanyor enkitoo enye.

¹⁹Etununukoyie ninye osiwuo too naipuko enyena, naa kekurru ninche te nkaraki ilpereren lenye loo lasarri.