Read Maasai Bible – Biblia Sinyati Hosea 7 Bible Online

Hosea 7 - Maasai Bible – Biblia Sinyati bible

Hosea 7

¹Te najo nanu aishiunye Israel, neibalunyeki entorroni enye o nkiasin torrok e Samaria; amu te ntorroni easisho ninche, egil olapurroni inkajijik, ore ilaisimak neisimisho ti ong'ata.

²Kake mejo ninche nchere kadamu nanu esiaai enye pooki torrono. Etang'adutua inkiasin enye ninche, etii dukuya enkomom ai.

³Ore te ntorroni enye neitiship olaiguanani o lkitok le lejare enye.

⁴Keibor onyek ninche pooki; eikununo ninche anaa ewueji nepejieki imukateni nainuaaki, ore ilo oasishore nepal eitu ekut ebaiki ina kata naipurji o metabaiki ina kata naisuishieki.

⁵Ore teina olong o laiguanani lang etamuoyia lelo kituaak te mpijan e naisho; neitorioo ninye enkaina enye te nebo lelo torrok.

⁶Amu ore anaa enatiu ewueji nepejieki imukateni, neijia eikununo iltauja lenye eyupuyup erreshisho; ore enkewarie pooki etiu engoro enye anaa olang'at le nkima ore tadekenya neyupuyup anaa ilng'ejepa le nkima.

⁷Ore ninche pooki naa keirowua anaa olkokuet, nemut ninche ilaitoriak lenye. Ore ilaiguanak lenye pooki netabatatate nemeetae hoo obo lenye laaipot nanu.

⁸Eitushulaka Israel kewan iloreren; ore ninye naa emukate neitu eibelekenyi.

⁹Einosa iltung'ana loo loreren eng'olon enye, nemeyiolo ninye; eisuaaki ilpapit ooibor shumata ninye, nemeyiolo ninye.

¹⁰Ore olwuasa le Israel neishakenoki te dukuya ninye; ore eyia merrinyokino ninche Olaitoriani Enkai enye, nemeing'oru ninye te kuna pooki.

¹¹Eikununo Israel anaa enturkuluo namoda nemeeta endamunoto naipotu Misiri, neloito Asiria.

¹²Ore epuo naitaman ninche to rreshet lai, naitadou ninche anaa ntaritik o loing'ang'e naitame ninche too nkiasin enye torrok.

¹³Woi ninche, amu aashomo aaing'uaa nanu! Enkidaata te ninche, amu aatogolong'akita ninche! Anaata naaji akordu ninche, kake kelejisho ninche tialo nanu.

¹⁴Maaishiraki nanu ninche too ltauja, kake keyietu ninche aaishir too ndapashi enye; ore te nkaraki enkurma o enaisho nedung ate, naagolong'aki ninche aapaashare nanu.

¹⁵Ore hoo naitaarriyiana naitagol nanu inkaik enye, entorroni aaipiraki ninche nanu.

¹⁶Eibelekenyakinote ninche enkai naguetuno naji Baal; etotiutuo ninche anaa enkawuo nemeisiligayu, ore lelo kituaak lenye, naa kepuo aabatata to lalem te nkaraki ina keilasilas ilng'ejepa lenye. Keaku te ninche ena embae e nakueniyieki te nkop e Misiri.