Read Maasai Bible – Biblia Sinyati Amos 1 Bible Online

Amos 1 - Maasai Bible – Biblia Sinyati bible

Amos 1

¹Kulo irorei le Amos, apa laa obo loo lairritak loo ntare le Tekoa. Etoduaa apa ninye kuna naaipirta Israel too nkolong'i e Usia olaiguanani le Yuda o too nkolong'i e Yeroboam olayioni le Yoash, olaiguanani le Israel ilarin oaare eng'or enkikirikirata e nkop.

²Nejo ninye: “Eikurrukur Olaitoriani te Sion, neitayu oltoilo lenye te Yerusalem; eishir ndaat oo lairritak loo ntare, netoyu enchumata e Karmel.”

³Nji ejo Olaitoriani: “Ore te nkaraki nkitarruorrot kumok e Dameski, maiwuang'ie nanu enkitamioto enye; Amu eironya ninche Gilead too nkironyeta e sekenkei.

⁴Neaku kairriwaki nanu enkima shumata enkaji e Hasael, naa kemut ninye isempewueti le Benhadad.

⁵Kagil nanu esekenkei e Dameski naiwuang'ie lelo oomanya aitung'uaa oerata le Afen, naiwuang'ie ilo oibung'ita eng'udi e nkitoo aitung'uaa Besedan; naa kepuo iltung'ana le Siria eyararoto te Kir, Olaitoriani ojo.”

⁶Nji ejo Olaitoriani: “Ore te nkaraki nkitarruorrot kumok e Gasa, maiwuang'ie enkitamioto enye; amu ewaita ninche eyararoto olosho olulung'a pee eyaki ninche Edom.

⁷Neaku kairriwaki nanu enkima shumata esuntai e Gasa, naa kenya isempewueti lenye.

⁸Kaiwuang'ie nanu lelo oomanya Ashdod, o ilo oibung'ita eng'udi e nkitoo aitung'uaa Ashkelon; kaibelekeny nanu enkaina ai aarare Ekron ore ilo pisiai loo Lfilisti neidaaya.” Olaitoriani Enkai ojo.

⁹Nji ejo Olaitoriani: “Ore te nkaraki nkitarruorrot kumok e Tiro, maiwuang'ie enkitamioto enye; Amu etokordutua eyakita ninche olosho olulung'a le Edom, neitu edamu osotua loo lalashera.

¹⁰Neaku kairriwaki nanu enkima shumata esuntai e Tiro, naa kenya isempewueti lenyena.”

¹¹Nji ejo Olaitoriani: “Ore te nkaraki nkitarruorrot kumok e Edom, maiwuang'ie nanu enkitamioto enye; amu etimira ninye olalashe lenye to lalem, neiturraa olng'ur pooki, neibung ninye engoro anaake, neshum engoro napi ntarasi.

¹²Neaku kairriwaa nanu enkima shumata Teman, naa kenya lelo sempewueti le Bosra.”

¹³Nji ejo Olaitoriani: “Ore te nkaraki nkitarruorrot kumok oo Lamoni, maiwuang'ie nanu enkitamioto enye; amu etadanya ninche inkoshuaa oo nkituaak e Gilead, pee etum ninche aaitalala olpolosie lenye.

¹⁴Naa kainok nanu enkima te suntai e Raba, naa kenya isempewueti lenyena too mbuakunot e ina olong o larrabal to sina teina olong olemua te ilo arrabal oikununo anaa osiwuo.

¹⁵Ore olaiguanani lenye o lkituaak lenye nepuo eyararoto,” Olaitoriani ojo.