Read Maasai Bible – Biblia Sinyati Amos 5 Bible Online

Amos 5 - Maasai Bible – Biblia Sinyati bible

Amos 5

¹Entoning ele rorei lajo nanu te nkishirata te nkaraki intae na aji e Israel:

²“Etabatate nemeigil aekata adumunye, ina selenkei e Israel; eiturrayioki te nkop enye nemeetae olodumu ninye.”

³Amu nji ejo Olaitoriani Enkai: “Ore enkanasa napukunye iltung'ana enkalifu nabo iip ake ooleku, ore ina napukunye iltung'ana iip, tomon ake oolekaki enkaji e Israel.”

⁴Amu nji ejoki Olaitoriani enkaji e Israel: “Eng'oruaki nanu pee ipokipoko;

⁵kake emiking'oruru intae te Betel, nimiking'oruru te Gilgal aashu idung'udung'u aapuo Beer-sheba; amu meeta nchere melo Gilgal eyararoto, naa keaku Betel entoki nemeetae.”

⁶Eng'orutu Olaitoriani pee ipokipoko, pee melotu ake ninye anaa enkima ajing enkaji e Yosef, nenya ninye nemetii oloar ninye te Betel,

⁷Intae kulo ooibelekeny esipata aaitaa esayiet, nenang'aki esipata enkop!

⁸Ore ilo oitobira ilakir, Pledes o Orion, neibelekeny enaimin nagut aitaa enkakenya, neitomisimis endama aitaa enkewarie, ilo oipotu nkariak e naiposha neitashaiki ninche shumata oriong e nkop, Olaitoriani ninye enkarna enye,

⁹ilo oyau enkidaaroto anaa enkiwuang'ata egilunore ilo ogol, neaku kelotu enkidaaroto shumata ine negol.

¹⁰Eiba ninche ilo oisikong'isho te kishomi neinyal ilo oiro esipata.

¹¹Neaku ore enkaraki nimbookiki olaisinani enkop, nioruru ninye enkano enye, itesheta intae nkajijik oo soito oogueta, kake mibikiekie intae ninche; ituno intae isabibu sidain, kake miokioko enaisho enye.

¹²Amu ayiolo nanu eneba nkitarruorrot inyi o enaba esapuko oo ng'ok inyi, intae ilooibooki enkop olasipani, niyaya ntokitin e ropare, nimbelekenyenye ilo omena aarriny te kishomi.

¹³Neaku ore ilo ng'en negira te nkata naikununo nji; amu enkata e ntorroni.

¹⁴Eng'orutu isidain, mme ntorrok, pee ipokipoko; pee etum Olaitoriani, Enkai oo lororani ataa te nebo intae, anaa enitejo intae.

¹⁵Embai entorroni, ninyorrurru esupatisho, nintubulaa esupatisho te kishomi; amu eidimayu to Laitoriani, Enkai oo lororani pee eing'urrie Enkai olpisiaai le Yosef.

¹⁶Nji naa ejo Olaitoriani, Enkai oo lororani, Olaitoriani: “Ore too nkoitoi pooki kituaak naa keaku enkishirata; ore too nkoitoi pooki nejo ninche, ‘Aha, aha!’ Naa keipotu ninche ilaturok le nkurma meetu aaishir, neyietu lelo arriyiak te nkishirata,

¹⁷ore too wuejitin pooki oo sabibu naa keaku e nkishirata, amu kaim nanu atua empolos inyi.” Olaitoriani ojo.

¹⁸Intae lelo oong'uar enkolong o Laitoriani! Kainyoo pee iyieuu intae enkolong o Laitoriani? Enaimin ninye neme ewang'an;

¹⁹ketiu anaa oltung'ani okuet ailany olng'atuny, nenang'are olng'arurumi, aashu elo atua aji neigaraki enkaina enye esuntai neony olasurai ninye.

²⁰Aime enaimin enkolong o Laitoriani neme ewang'an, o emisimisi nemewang?

²¹“Kaiba nanu, namen isiruai linyi, nemashipakino lelo turrurri linyi.

²²Ore hoo nikintaikiki nanu ilasarri linyi oopejori o lasarri le nkurma, mang'amaa nanu ninche, ore lelo asarri linyi le seriani loo nchoo inyi naapir, maning'ore nanu.

²³Ewaita entung'uayioki nanu enkilepilep oo sinkolioitin linyi; mainining nanu oltoilo loo nkinantani inyi.

²⁴Kake enchoo esipata erukunye anaa nkariak, nerukunye esupatisho anaa enchorro nemetoyu aekata.

²⁵“Amaa eikiyakita apa intae ilasarri o nkishoorot to lpurkel too lapa arin artam, naaji e Israel?

²⁶Iteserema intae nkaitin naaguetuno naaji Sakuti, enkai aiguanani inyi, o Kaiwana ina ai inyi o lakira o nkitanyaanyukot inyi apa nintobirakita ate;

²⁷neaku kaya nanu intae enchom eyararoto teidia alo Dameski,” Olaitoriani ojo, laa ore enkarna enye naa Enkai oo Lororani.