Read Maasai Bible – Biblia Sinyati Amos 6 Bible Online

Amos 6 - Maasai Bible – Biblia Sinyati bible

Amos 6

¹“Oi lekua ooisikarra te Sion, o lekua oodol eserian to ldoinyo le Samaria, lelo tung'ana ning'ot le dukuya too loshon, laa ninche esaru olosho le Israel!

²Entalang enchom entodol enkanasa e Kalne; nidumunyenye teine aapuo Hamat kitok; nintokiki aapuo Gat oo Lfilisti. Keikash ninche aalang kuna kitoriat pooki? Aashu aisapuk enkop enye alang enkop inyi.

³Intalakuanana intae enkolong e ntorroni, niyauu aaitataanu entonata o larrabal?

⁴“Oi lekua ooirrag too ndapashi naaikodo too lala loo lkanchaoni, neitoriori too lorikan dapashi, nenya ilkuoo le kerra too luaat nenya ilasho to lale;

⁵lelo oorany isinkolioitin le pesho to ltoilo le nkinanta, neitobiraki ate ntokitin oo sinkolioitin anaa Daudi;

⁶ook enaisho too lbakulini neeyel ate te ilata sidai oleng, kake meisina ninche te nkidaata e Yosef!

⁷Neaku keaku taata ninche ile dukuya te lelo oopuo eyararoto, ore isiruai linyi o sikarri inyi neishunye.”

⁸Einosa Olaitoriani Enkai olmumai te kewan enye (Olaitoriani ojo, Enkai oo lororani): “Kaiba nanu olwuasa le Yakobo, naiba isempewueti lenye; naa kaishooyo nanu enkanasa o pooki natii atua.”

⁹Naa te neleku iltung'ana tomon te nkaji nabo neye ninche.

¹⁰Naa ore oltung'ani opejoo olalashe lenye, te neitayu loik lenye tiatua aji, nejoki ilo otii atua aji, “Keton etii likae tung'ani te nebo iyie?” Nejo ninye “A'a nejo, tigirayu! Mikintoki iyiook aaipot enkarna o Laitoriani.”

¹¹Amu ng'ura, eitayu Olaitoriani enkitanapata, neari enkaji sapuk aaitaa mbelibelat, neitaae enkaji kiti irrarrat.

¹²Amaa, kekuet mbartan te nchumata indapidapo? Ketur oltung'ani enaiposha too lmong'i? Kake mbelekenya intae esipata aaitaa esayiet o lng'anayio le sipata, nintaa olchani odua,

¹³intae kulo oong'ida te Mpesho, oojo, “Keitu iyiook te ngolon ang maate kiya Karnaim?”

¹⁴“Amu ng'ura, kadumaki nanu intae olosho, lo tung'ana le Israel, Olaitoriani ojo, Enkai oo lororani; naa keibooki ninche intae enkop ebaiki enejing'ieki Hamat o metabaiki Ereyiet e Araba.”