Read Maasai Bible – Biblia Sinyati Amos 8 Bible Online

Amos 8 - Maasai Bible – Biblia Sinyati bible

Amos 8

¹Ena nanu aaitoduaa Olaitoriani Enkai, enkikapu nabore ilng'anayio le nkata e nkirowuaj.

²Naajoki ninye, “Amos, kainyoo iyie idolita?” Najoki nanu, “Enkikapu nabore ilng'anayio le nkata e nkirowuaj.” Naaitoki nanu Olaitoriani ajoki, “Etabaikia enkiting'oto iltung'ana laainei Israel; maigil aekata nanu agiroo ninche.

³Ore isinkolioitin le nkaji e Nkai naa keaku olkiyioi teina olong,” Olaitoriani Enkai ojo; “Ore mpopoki oo ltung'ana ootuata naa keaku kumok; ore te pooki wueji naa kepuoi aaiturraa ninche egirae.”

⁴Entoning ena, intae ilooibooki iloomena enkop, niyauu lelo aisinak le nkop aaishie,

⁵ijojo, “Kanu eishunye olapa ng'ejuk, pee kitum aatimir enkurma. Keishunye Sabato, pee kitum aatimir enkano, pee kitum aaterepeny entemet naji eta nikiponaa shekeli, nikilej iltung'ana too ntemat e lejare,

⁶Pee kitum iyiook aainyang'u olaisinani te nkosholai ore olomena nikinyang'u too namuka are, nikimir isuut e nkano?”

⁷Einosa Olaitoriani olmumai te nkaraki olwuasa le Yakobo: “Esipa maarikino aekata hoo nabo oo nkiasin enye.

⁸Aimeikirikira enkop te nkaraki ena, Neishir to sina pooki ng'ae omanya atua ninye, nedumunye ninye pooki anaa olkeju le Nail, neilugo neitoki aimis, anaa olkeju le Nail te Misiri?”

⁹“Naa ore kenya teina olong.” Olaitoriani Enkai ojo, “Naitadoyio nanu enkolong te nkipirata enkolong, naitomisimis enkop dama.

¹⁰Kaibelekeny nanu isiruai linyi aitaa osina, ore isinkolioitin linyi pooki neaku olkiyioi; karrotianaki nanu inkilani o lkuniyia pooki tung'ani, napik enkurroto pooki lukunya; kaitotiu nanu anaa enkishirata naishirakini olayioni obo, laa ninye ake eetae ore enkiting'oto enye netiu anaa enkolong nadua.

¹¹“Ng'ura, kepuonu nkolong'i,” Olaitoriani Enkai ojo, “Nairriwaki nanu enkop olameyu; mme olameyu le ndaa aashu olameyu le nkure e nkare, kake oloning'ieki ororei lo Laitoriani.

¹²Kelimana ninche ebaiki enaiposha o metabaiki enaiposha, moikuape o metabaiki enkilepunoto e nkolong; kekuet ninche aapuo neitu, aaing'oru ororei lo Laitoriani, kake metum ninche.

¹³“Ore kenya teina olong isilan sidain o lbarnot naa keiterre te nkure.

¹⁴Ore lelo oonya olmumai te Ashima e Samaria, nejo ‘Ore anaa enaishu enkai ino, Dan;’ naa ‘Ore anaa enaishu enkoitoi e Beer-sheba;’ kebatata ninche nemeigil aekata aadumunye.”