Read Maasai Bible – Biblia Sinyati Amos 9 Bible Online

Amos 9 - Maasai Bible – Biblia Sinyati bible

Amos 9

¹Atoduaa nanu Olaitoriani eitashe te mbata olperere lo lasar, nejo ninye: “Toosho lukuny oo ng'apeta e nkaji e Nkai, o meikirikirata ntonat oo ng'apeta, tebelibelaki ninche inchumat oo ilukuny oo ltung'ana pooki; ore ilooleku lenye naar nanu ninche to lalem; melo ninye obo lenye aisik nemeimisho ninye obo lenye.

²“Ore hoo naaji ninye te netur enkop aapuo enemeneng'a, naa keitayu ake enkaina ai ninche teine; ore hoo naaji ninye tenaa keilep aapuo shumata, naa kaitadou nanu ninche teine.

³Ore hoo naaji ninye tenaa keisudori te nchumata oldoinyo oji Karmel, naa kaing'oru nanu ninche naitayu ninche; naa ore hoo naaji ninye tenaa keisudori too nkonyek aainei aapuo abori enaiposha, naa kairriwaa nanu olasurai ine metoonyo ninche.

⁴Naa ore naaji tenaa kepuo ninche eyararoto te dukuya ilmang'ati lenye, naitanap nanu olalem teine pee ear ninche naa kaing'or nanu ninche te ntorroni neme te sidai.”

⁵Ore Olaitoriani, Enkai oo lororani, ilo laa te neiseyie enkop neshola, ore lelo pooki oomanya atua neishir to sina nedumunye pooki anaa olkeju le Nail, neitoki adou, anaa olkeju le Nail te Misiri;

⁶ilo oshet enkaji enye e shumata te keper nepik olkitamanyunoto lenye shumata enkop ilo oipotu nkariak e naiposha nebukoki ninche shumata oriong e nkop Olaitoriani ninye enkarna enye.

⁷“Aimitiuu intae anaa Olosho le Etiopia te nanu, intae lo tung'ana le Israel?” Olaitoriani ojo. “Keitu nanu aitayu ailepunye Israel aitung'uaa enkop e Misiri, naitung'uaa Ilfilisti Kafta naitung'uaa Siria Kir?

⁸Ng'ura, etii nkonyek o Laitoriani Enkai shumata enkitoria oo ng'ok, naa kaidakie nanu aitung'uaa oriong e nkop; Meteleku ake nchere maidaikie nanu tukul enkaji e Yakobo,” Olaitoriani ojo.

⁹“Amu ng'ura, kaitanapisho nanu, pee aipirripir asilu nanu enkaji e Israel tiatua loreren pooki anaa enasil oltung'ani te silet, kake meetae olantererai odoiki enkop.

¹⁰Ore lelo aing'okok loo ltung'ana laainei pooki naa keye to lalem, lelo oojo, ‘Meinepu aekata entorroni iyiook aashu etum iyiook.’

¹¹“Ore kenya teina olong naitasheiyie nanu enkaji e Daudi apa naturori naitobir nanu ineetarruoitie, nashumu nanu ineeturori, naitoki nanu ashet metotiuo anaa apa;

¹²Pee etum ninche aawaita olpisiai le Edom o lelo oreren pooki ooipoti te nkarna ai,” Olaitoriani ilo oas ena, ojo nji.

¹³“Ng'ura, kepuonu nkolong'i,” Olaitoriani ojo, “ore ilo oturisho neinepu ilo oikesisho ore ilo oirony ilng'anayio neinepu ilo ounisho; ore ildoinyo neitong'u enaisho namelok, neruko too ildoinyo pooki.

¹⁴Kashuku nanu imayianat oo ltung'ana laainei Israel naa keshet ninche nkanas apa naaidaaitie nemany ninche; keun ninche isabibu neok enaisho enye; naa keitayu ninche nkurman neya ilng'anayio lenye.

¹⁵Kaun nanu ninche te nkop enye, nemeigili aekata aadotu ninche, aaitayu tiatua ina kop naishoo nanu ninche,” Olaitoriani Enkai ojo.