Read Maasai Bible – Biblia Sinyati Obadia 1 Bible Online

Obadia 1 - Maasai Bible – Biblia Sinyati bible

Obadia 1

¹Ena enduaata e Obadia. Inji ejo Olaitoriani Enkai tialo Edom: Kitoning'o iyiook ilomon supati ooing'uaa Olaitoriani, neirriwuaki olkilikuai atua iloreren. “Tudumunye! Matudumakinoto iyiook Edom to larrabal!”

²Idol ajo kaaitaa iyie kiti tiatua iloreren, eikipuoi aamenu iyie oleng.

³Kiteleja iyie ilo wuasa lo ltau lino, iyie ilo omanya enemanita endapidapoi nagol, laa keika oleng emanyisho enye, ilo ojo to ltau lino, “Kaing'ae laaitadou nanu ayau enkop!”

⁴Ore hoo nilepa alo shumata anaa olkurragos, ore hoo naa atua lakir etii enkaji ino, kaayau ake aitadou enkop, Olaitoriani ojo.

⁵Amaa te nepuonu ilapurrok enitii kewarie, kebaa enkidaata nikindakieki iyie! Aimepurroo ninche ina ake naaidip ninche? Amaa te nepuonu ilasotok loo sabibu, aimeleku ninche embata?

⁶Kebaa elilituni Esau, neing'oruni ilchumat lenyena!

⁷Kiteleja lelo pooki lining'ore, kitimiraitie ninche aareu olpolosie; ore apa lelo liatayie eseriani nikitimira ninche; ore lelo shoreta linono lisilig netipika orreshet abori iyie embae nemeyiolounoyu ina.

⁸Amaa kenya teina olong, Olaitoriani ojo, aimaidaikie nanu lelo tung'ana ang'eni te Edom, o eyiolounoto to ldoinyo le Esau?

⁹Ore lelo tung'ana linono magil, Teman, neitukureti, o metaa ore pooki oing'uaa oldoinyo le Esau neiwuang'ieki aar metua.

¹⁰Ore te nkaraki ina kinyalata nainyalaki olalashe lino Yakobo, eikimulumul iyie enkurruna, naa eikiwuang'ieki ntarasi.

¹¹Ore apa teina olong nintasho aitirring'a, ore apa teina olong nawaita iltung'ana leiking'a imasaa enyena, neimu ilmang'ati nchomito enyena, neoshoki enkukuo Yerusalem, nitotiwuo iyie anaa obo lenye.

¹²Enyor apa neitu ishipakino ina olong o lalashe lino teina olong apa natijing'a ninye olbuket; enyor apa neitu ing'idakino ina olong e lelo tung'ana le Yuda, teina olong e nkidaata enye; enyor apa neitu iwuasayu teina olong o sina.

¹³Enyor apa neitu ijing kishomi oo ltung'ana laainei, teina olong o sina lenye; enyor apa neitu ing'idakino ashil enkidaata enye, te nena olong'i e nkidaata enye; enyor apa neitu imbung imasaa enyena teina olong e nkidaata enye.

¹⁴Enyor apa neitu intashe te rishata oo nkoitoi pee imbung lelo ooisik; enyor apa neitu iyau ilo pisiai lenye teina olong o sina.

¹⁵Amu etataama ina olong o Laitoriani te shumata iloreren pooki. Ore anaa enitaasa, ina eyookini aitaas intae, keshukokino nkiaasin inyi shumata ilukuny inyi maate.

¹⁶Amu ore anaa enitoo intae enkikombe nadua e nkitamioto te nchumata e ilo doinyo lai sinyati, keokisho sii ninche lelo oshon pooki oomanita ntae keokisho ninche neimisiloo, netiu ninche anaa keitu aekata eng'as aaku.

¹⁷Kake Oldoinyo le Sion epuo aatii lelo ooilanyisho, naa keaku sinyati ine; ore enkaji e Yakobo neya wuejitin enye.

¹⁸Neaku enkaji e Yakobo enkima, ore enkaji e Yosef olang'at le nkima, neaku enkaji e Esau nkabobok; nepej ninche neishu ninche, nemetum hoo obo oleku te nkaji e Esau; amu Olaitoriani oiroro.

¹⁹Ore lelo le Negeb naa keya oldoinyo le Esau, ore lelo le Shefela neya enkop oo Filistia; neya ninche ina kop e Efraim o enkop e Samaria neya Benchamen Gilead.

²⁰Ore lelo aisikak le Hala laa ilo lorere le Israel, neya Foinike o metabaiki Serefait; ore lelo ooibung'aki le Yerusalem ootii atua Sefarad nepuo aaya nena anas e Negeb.

²¹Keilep ilaitajeunok aapuo Oldoinyo le Sion aaitore Oldoinyo le Esau; neaku enkitoria eno Laitoriani.