Read Maasai Bible – Biblia Sinyati Yona 1 Bible Online

Yona 1 - Maasai Bible – Biblia Sinyati bible

Yona 1

¹Eishoo Olaitoriani Yona olayioni le Amitai ele rorei, nejoki,

²“Tudumunye, shomo Enkanasa kitok e Ninawi, ninchiraki ninye; amu aatabaikia entoroni enye.”

³Kake etudumunye Yona aisikaki Tarshishi ailany Olaitoriani. Nedoyio ninye alo Yopa netum emeli naloito Tarshishi; nelak entikiti emeli nejing, pee elo te nebo ninche Tarshishi, enelakua ailany Olaitoriani.

⁴Kake eirriwua Olaitoriani olkutati sapuk shumata enaiposha, nejing enkilugo kitok enaiposha o metaa kejo emeli pee egila.

⁵Neiputukuny lelo ootii emeli, neishiraki pooki tung'ani enkai enye; nenang'aki ninche lelo olan apa ootii emeli atua enaiposha, pee eiteneneng. Kake eshomo apa Yona adoyio alo olgilata liabori emeli neirrag, neirura aitayu njo.

⁶Nelotu olkitok le meli nejoki ninye, “Kainyoo iyie pee irura? Tuputunye, impoto enkai ino! Eidimayu pee edamu iyiook ina ai pee mikindaaya.”

⁷Nejokino ninche maate, “Wootu, matoosh enkukuo, pee kitum aatayiolo ajo kaing'ae eimua ena torroni naewuo shumata iyiook.” Neosh ninche enkukuo, nedoiki enkukuo Yona.

⁸Neitoki ninche aajoki ninye, “Toliki iyiook ajo kaing'ae eimua ena torroni naewuo shumata iyiook? Kainyoo esiaai ino? Naa kaji ing'uaa? Kaa enkop inyi? Naa eira iyie oli alo orere?”

⁹Nejoki ninye ninche, “Kara nanu Olburaniai; naure nanu Olaitoriani, Enkai e keper, laa ninye oitobira enaiposha o enkop natoyio.”

¹⁰Neitoki lelo tung'ana aairut oleng, nejoki ninye, “Kainyoo ena nitaasa iyie!” Amu etayioloito iltung'ana nchere keisikita apa ninye ailany Olaitoriani, te nkaraki natolikio ninye ninche.

¹¹Neitoki ninche aajoki ninye, “Kaa iyiook kintaas iyie, pee etum enaiposha aitirring'ayu te iyiook?” Amu etoponari enaiposha ailugo oleng.

¹²Nejoki Yona ninche, “Entudumuaki nanu entanang'akaki atua enaiposha; pee etum enaiposha aitirring'ayu te intae; amu ayiolo ajo te nkaraki nanu pee eewuo ele kutati sapuk shumata intae.”

¹³Ore ake eyia neijia netonyuaa lelo tung'ana aajo kireu emeli meeu enkop natoyio, kake etalaikinote amu etoponari enaiposha ailugo oleng oleng ti alo ninche.

¹⁴Neaku eishirakitia ninche Olaitoriani, ejo, “Kisai iyie, Olaitoriani, mincho iyiook kindak te nkaraki enkishui ele tung'ani, niminteleiki iyiook osarge lemeeta entioto; amu itaasa iyie Olaitoriani anaa enikintiship iyie.”

¹⁵Nedumu ninche Yona nenang'aki ninye atua enaiposha; neitirring'a enaiposha te nkilugoto enye.

¹⁶Neureyu lelo tung'ana Olaitoriani oleng, neitaiki ninche Olaitoriani olasar, nenya olmumai.

¹⁷Neirriu Olaitoriani osinkirri sapuk metoijoi Yona; netii apa Yona enkoshoke o sinkirri nkolong'i uni o nkewarieitin uni.