Read Maasai Bible – Biblia Sinyati Yona 3 Bible Online

Yona 3 - Maasai Bible – Biblia Sinyati bible

Yona 3

¹Neitoki ororei lo Laitoriani alotu enetii Yona enkata e are, nejoki,

²“Tudumunye shomo Ninawi, ina anasa kitok, nimbalakinye ninye ilo kilikuai laaliki nanu iyie.”

³Nedumunye Yona nelo Ninawi, te risioroto o rorei lo Laitoriani. Ore apa Ninawi naa enkanasa kitok oleng, elototo oo nkolong'i uni.

⁴Neiteru Yona alo atua ina anasa, nelo elototo e nkolong nabo. Neishir ninye ajo, “Nkolong'i artam ake naang'or pee eidaikieki Ninawi!”

⁵Neiruk iltung'ana le Ninawi Enkai; neibalie ninche eenata e ate e mpukoroto, neishop ilkuniyiani, ebaiki olkitok lenye o metabaiki oloti lenye.

⁶Nebaiki lelo omon olaiguanani le Ninawi, nedumunye ninye to lorika lenye le nkitoo, neitayu olkila lenye, neimulumul kewan too lkuniyiani, netonie nkuruon.

⁷Nedung'u ninye enkitanapata neitubulaa tiatua Ninawi pooki ejo, “Ore te nkitanapata o laiguanani o lkituaak lenyena: Mincho oltung'ani aashu eng'ues, o nchoo aashu nkerrai eishamisham hoo toki; inchoo ninche etoni medaa, aashu eok enkare,

⁸kake nchoo oltung'ani o eng'ues eimulumuli too lkuniyiani, naa nchoo ninche eishiraki oleng Enkai; ee nchoo pooki ng'ae eibelekenya aing'uaa enkoitoi enye torrono neing'uaa ina torroni nataasa too nkaik enyena.

⁹Kaing'ae nayiolo nchere keidim Enkai neibelekenya teina goro enye napi, pee mikindaaya iyiook?”

¹⁰Ore ake pee edol Enkai ina nataasa ninche, ina naibelekenyate ninche aaing'uaa enkoitoi enye torrono, neibelekeny Enkai ina torroni apa natejo ninye aitaas ninche; neitu ninye eas ina.