Read Maasai Bible – Biblia Sinyati Enkikena 1 Bible Online

Enkikena 1 - Maasai Bible – Biblia Sinyati bible

Enkikena 1

¹Eirorie apa Olaitoriani Musa tiong'ata e Sinai, tiatua ilo ng'obor le ntumo, te nkolong e dukuya o lapa li aare, to lari li aare ina kata eidipa aatupuku te nkop e Misiri.

²Nejoki, “Nkena esiana e umata pooki oo ltung'ana le Israel, anaa ilmareita o anaa inkajijik oo loo menye, inkajijik te risioroto e siana oo nkarn, pooki lee, pooki lukunya o lee,

³ebaiki ilarin tikitam neilep, pooki tiatua Israel ooidim aashom enjore, enkena intae o Aron ninche, anaa ilturrurri.

⁴Neret intae oltung'ani obo kitok te nkaji oo loo menye te pooki osho.

⁵Naa kuna inkarn e lelo tung'ana oopuonu aaku te nebo intae: Neing'uaa olosho le Ruben Elisur olayioni le Shedeur;

⁶Neing'uaa olosho le Simion Shelumiel olayioni le Shurishadi;

⁷Neing'uaa olosho le Yuda Nahashon olayioni le Aminadab;

⁸Neing'uaa olosho le Isaakar Natanel olayioni le Saur;

⁹Neing'uaa olosho le Sebulon Eliab olayioni le Helon;

¹⁰ore too layiok le Yosef o te Efraim, naa Elishama olayioni le Amihud;

¹¹Neing'uaa olosho le Manase Gamaliel olayioni le Pedasur;

¹²Neing'uaa olosho le Benchamen Abidan olayioni le Gideon; Neing'uaa olosho le Dan Ahieser olayioni le Amishadai;

¹³Neing'uaa olosho le Asheri, Pagiel olayioni le Oharan;

¹⁴Neing'uaa olosho le Gad Eliasaf olayioni le Deuel;

¹⁵Neing'uaa olosho le Naftali Ahira olayioni le Enan.”

¹⁶Kulo apa lelo ootegeluaki to lturrur, lelo arikok loo loshon lenye, aa ninche ilukuny oo loshon le Israel.

¹⁷Nerik Musa o Aron kulo tung'ana ootegeluaki;

¹⁸ore te nkolong e dukuya o lapa li are, neiturrur ninche eumata pooki te nebo, neiger ninche ate anaa ilmareita, anaa inkajijik oo loo menye, te risioroto oo nkarn ebaiki ilarin tikitam neilep, ilukuny pooki

¹⁹anaa enaitanapa Olaitoriani Musa. Neaku eikena apa ninye ninche ti ong'ata e Sinai.

²⁰Ore iltung'ana le Ruben ilo kikau le Israel, iishoritin enye, too lmareita lenye, too nkajijik oo loo menye te risioroto e siana oo nkarn o lukuny pooki o pooki lee ebaiki ilarin tikitam neilep, lelo pooki ooidim aashom olarrabal,

²¹ore esiana o losho le Ruben naa inkalifuni artam o ile o iip imiet.

²²Ore too ltung'ana le Simeon, iishoritin enye, too lmareita, lenye too nkajijik oo loo menye, lelo apa lenye ooikenaki, te risioroto e siana oo nkarn, ilukuny pooki, pooki lee ebaiki ilarin tikitam neilep, lelo pooki ooidim aashom enjore:

²³nera apa esiana o losho le Simeon inkalifuni onom o oudo o iip uni.

²⁴Ore too ltung'ana le Gad, iishoritin enye, too lmareita lenye, too nkajijik oo loo menye, te risioroto e siana oo nkarn ebaiki ilarin tikitam neilep, lelo pooki ooidim aashom olarrabal:

²⁵nera esiana o losho le Gad inkalifuni artam o miet o iip ile o onom.

²⁶Ore too ltung'ana le Yuda, iishoritin enye, too lmareita lenye, too nkajijik oo loo menye, te risioroto e siana oo nkarn, ebaiki ilarin tikitam neilep o pooki lee ooidim ashomo olarrabal

²⁷nera esiana o losho le Yuda inkalifuni ntomoni naapishana oo ong'uan o iip ile.

²⁸Ore too ltung'ana le Isaakar, iishoritin enye, too lmareita lenye, too nkajijik oo loo menye, te risioroto e siana oo nkarn, ebaiki ilarin tikitam neilep; pooki tung'ani oidim ashomo olarrabal,

²⁹nera esiana o losho le Isaakar inkalifuni onom oong'uan o iip ong'uan.

³⁰Ore too ltung'ana le Sebulon, iishoritin enye, too lmareita lenye, too nkajijik oo loo menye, te risioroto e siana oo nkarn, ebaiki ilarin tikitam neilep, pooki tung'ani oidim ashomo olarrabal,

³¹nera esiana o losho le Sebulon inkalifuni onom o oopishana o iip ong'uan.

³²Ore iltung'ana le Yosef aa taa iltung'ana le Efraim, iishoritin enye, too lmareita lenye, too nkajijik oo loo menye, te risioroto e siana oo nkarn, ebaiki ilarin tikitam neilep, pooki lee ake ninye oidim ashomo olarrabal,

³³nera esiana o losho le Efraim inkalifuni artam o iip imiet.

³⁴Ore too ltung'ana le Manase, iishoritin enye, too lmareita lenye, too nkajijik oo loo menye te risioroto e siana oo nkarn, ebaiki ilarin tikitam neilep, pooki lee ake ninye oidim ashomo olarrabal,

³⁵nera esiana o losho le Manase inkalifuni tomoni uni o are o iip are.

³⁶Ore too ltung'ana le Benchamen, iishoritin enye, too lmareita lenye, too nkajijik oo loo menye, te risioroto e siana oo nkarn ebaiki ilarin tikitam neilep, pooki lee oidim ashomo olarrabal,

³⁷nera esiana o losho le Benchamen inkalifuni tomoni uni o imiet o iip ong'uan.

³⁸Ore too ltung'ana le Dan, iishoritin enye, too lmareita lenye, too nkajijik oo loo menye, te risioroto e siana oo nkarn, ebaiki ilarin tikitam neilep, pooki lee oidim ashomo olarrabal,

³⁹nera esiana o losho le Dan inkalifuni ntomoni ile o are o iip naapishana.

⁴⁰Ore too ltung'ana le Asheri, iishoritin enye, too lmareita lenye, too nkajijik oo loo menye, te risioroto e siana oo nkarn ebaiki ilarin tikitam neilep, pooki lee oidim ashomo olarrabal,

⁴¹nera esiana o losho le Asheri inkalifuni artam o obo o iip imiet.

⁴²Ore too ltung'ana le Naftali, iishoritin enye, too lmareita lenye, too nkajijik oo loo menye, te risioroto e siana oo nkarn, ebaiki ilarin tikitam neilep, pooki lee oidim ashomo olarrabal,

⁴³nera esiana o losho le Naftali nkalifuni onom o okuni o iip ong'uan.

⁴⁴Kulo apa lelo laa ninche eikenaki, laa ninche eikena Musa o Aron te retoto oo lpayiani le Israel, iltung'ana tomon o are, ore ake oltung'ani netii te rishata e nkaji e papaai lenye.

⁴⁵Neaku ore esiana pooki oo ltung'ana le Israel, too nkajijik oo loo menye, ebaiki ilarin tikitam neilep, pooki ng'ae ooidim ashomo olarrabal te Israel

⁴⁶ore apa esiana enye pooki naa inkalifuni iip ile o okuni o iip imiet o onom.

⁴⁷Kake eitu apa eikenari ile Lawi aaitusuj iloshon loo loomenye te nebo ninche.

⁴⁸Amu etiaaka Olaitoriani Musa,

⁴⁹“Olosho le Lawi ake ninye minken, nimisir ninche aiken te nebo iltung'ana le Israel;

⁵⁰kake tegelu ile Lawi meitasheiki olng'obor le shakenisho neitasheiki nena masaa enyena, neitasheiki nena tokitin pooki eine; nenap ninche ilo ng'obor o ntokitin enyena, neisiai ninye, neitaman ilo ng'obor emanyisho.

⁵¹Naa ore te nkata naidurrieki ilo ng'obor, naa te nepuoi aaun, naa ile Lawi ooun. Naa tenenyiku likae tung'ani, neari ninye metua.

⁵²Nchoo iltung'ana le Israel eun ilng'oborri lenye anaa ilturrurri, oltung'ani ake to lng'obor lenye makewan, oltung'ani ake te rishata enye makewan;

⁵³kake ore ile Lawi neitaman ilng'oborri lenye ilo ng'obor le shakenisho, pee metumi ake embae naitagorisho tialo eumata oo ltung'ana le Israel; naa ile Lawi ooitasheiki ilo ng'obor le shakenisho.”

⁵⁴Neijia apa eikuna iltung'ana le Israel; etaasa apa ninche te risioroto e nena pooki naaitanapa Olaitoriani Musa.