Read Maasai Bible – Biblia Sinyati Enkikena 11 Bible Online

Enkikena 11 - Maasai Bible – Biblia Sinyati bible

Enkikena 11

¹Neing'unyung'unyaki iltung'ana Olaitoriani te nkaraki enyamali enye; ore ake pee ening Olaitoriani ina neyupuyup engoro enye, nepej engoro o Laitoriani atua ninche, nenya kulie wuejitin e lelo ng'oborri.

²Neitoki iltung'ana aaishiraki Musa, neomon Musa Olaitoriani neye ina kima.

³Neaku keji apa enkarna eine wueji Tabera te nkaraki natapejo enkima o Laitoriani atua ninche.

⁴Ore apa iltung'ana loo loreren ootii atua ninche netum kuuru oleng, neitoki sii iltung'ana loo Siraeli aaishir nejo, “Oi naaji kitum inkiri nikinya!

⁵Eikidamu isinkir apa likinya te Misiri pesho o nkaitubulu naaijo ilmalenken o kitunkuu o mbenek naainosi, o kulie tokitin kumok;

⁶kake ore taata eishunye engolon ang, nemeetae hoo ae toki meteleku ake ena manna king'or.”

⁷Ore apa ina manna neikununo anaa ilanterera, kutiti; ore emua enye naa aisikitok neibor.

⁸Nemanimanaa apa iltung'ana aapuo aasotu, neidong too soito ooiutuutishoreki aashu eidong'i te nkidong'et neitokitokie too motioo, neitayunye imukateni; ore enkishamu enye neikununo anaa enoo mukateni naayiera te ilata.

⁹Te nedoiki enkolieelio ilng'oborri kewarie neitadou manna.

¹⁰Nening Musa iltung'ana eyietu aaishir too lmareita lenye, oltung'ani ake te kutukaji o lng'obor lenye; neyupuyup airowuaju engoro o Laitoriani oleng, neisinanuo Musa.

¹¹Nejoki Musa Olaitoriani, “Kainyoo iye pee intaasa entorroni osinka lino? Naa kainyoo nanu pee eitu atum omon too nkonyek inono, neaku kinteleikia nanu olola le kulo tung'ana pooki?

¹²Katoiwuo nanu te nutai kulo tung'ana pooki? Kai nanu otoiuo ninche, metaa eikijoki iyie nanu, ‘Tanapa to lgoo lino, anaa enanap enkaibung'ani enkerai nanakita, aya ina kop ninosie iyie olmumai pee incho iloo menye?’

¹³Kaji nanu atumie inkiri naisho kulo tung'ana pooki? Amu keyietu ninche aaishir te dukuya nanu nejo, ‘Inchoo iyiook inkiri, pee kitum aainosa.’

¹⁴Maidim nanu atanapa kulo tung'ana openy, keiroishi ele ola oleng te nanu.

¹⁵Tenaa kena kintaas nanu taaraki matua nabo kata, te nanoto omom too nkonyek inono, pee madol nanu entorroni ai.”

¹⁶Nejoki Olaitoriani Musa, “Nturrurrokoki nanu iltung'ana intomoni naapishana loo ilpayiani le Israel, lelo liyiolo iyie ajo ilpayiani lo lorere o larikok loo ltung'ana, nincho ninche meitasho teine te nebo iyie.

¹⁷Naa kadou nanu alotu airorie intae teine. Naa kaya nanu embata e ina kiyang'et natii shumata iyie napik shumata ninche; naa kenap ninche ilo ola le kulo tung'ana te nebo iyie, pee mintoki iyie anap openy.

¹⁸Nijoki iyie iltung'ana, ‘Entisinya ate taaisere ninyanya inkiri; amu inchirakita Olaitoriani, ijojo, “Kaing'ae naisho iyiook inkiri nikinya? Amu keikash apa kitii Misiri.” Ore naa keisho intae Olaitoriani inkiri, naa inyanya intae.

¹⁹Minyanya intae enkolong nabo, aashu inkolong'i are, aashu inkolong'i imiet, aashu inkolong'i tomon, aashu inkolong'i tikitam,

²⁰kake olapa olulung'a, o metaba anaa neimu intae inkumeishin, nirikaka, te nkaraki nitanyaita intae Olaitoriani otii te nebo intae, ninchirishiri te dukuya ninye, ijojo, “Kainyoo iyiook pee kitupukutuo te nkop e Misiri?’ ”

²¹Kake etejo Musa, “Ore kulo tung'ana latii nanu atua oobaya inkalifuni iip ile oopuo too nkejek; eji nijo iyie, ‘Kaisho nanu inkiri, pee etum aainosa olapa olulung'a!’

²²Ke nkishu o nkerrai eyieng'i te nkaraki ninche, pee eitaraposhi ninche? Aashu ke sinkir pooki le naiposha eiturrurruni te nkaraki ninche, pee eitaraposhi ninche?”

²³Nejoki Olaitoriani Musa, “Keitodorropaki enkaina o Laitoriani? Ore taata idol iyie tenaa kesipayu ororei lai te iyie aashu mesipayu.”

²⁴Neaku eipang'a apa Musa alo ajoki iltung'ana irorei lo Laitoriani; neiturrur ninye iltung'ana intomoni naapishana loo lpayiani loo ltung'ana, neitaman ninche olng'obor.

²⁵Nelotu Olaitoriani te nkatampoi airorie ninye, neya embata e ina kiyang'et natii shumata ninye nepik shumata lelo payiani intomoni naapishana; ore pee eirrag ina kiyang'et te shumata ninche, neibonisho ninche. Kake eitu eigil aaiko neijia.

²⁶Neing'uari apa iltung'ana aare too lng'oborri, neji obo Eldad ore o likae neji Medad, netonie enkiyang'et ninche; neaku ninche te nebo lelo ooigeroki kake eitu ninche eipang aapuo ilo ng'obor, neaku eibonishote ninche tiatua ilo ng'obor.

²⁷Nekuet olbarnoti obo alo ajoki Musa, “Eibonisho Eldad o Medad to lng'obor.”

²⁸Ore Yoshua olayioni le Nuni, ilo aisiaayiani le Musa, obo le lelo tung'ana oogeluno, nejo, “Olkitok lai Musa, tomitiki ninche.”

²⁹Kake etiaaka Musa ninye, “Iata iyie olom te nkaraki nanu? Oo naaji tenaa ore iltung'ana pooki lo Laitoriani, naa iloibonok, nepik Olaitoriani enkiyang'et enye shumata ninche!”

³⁰Nerrinyo Musa o lpayiani le Israel aapuo ilng'oborri.

³¹Nedumunye olkutati oing'uaa Olaitoriani, neyau inkurlen aitung'uaa enkalo e naiposha, neisho ninche edou te mbata oo lng'oborri, eneba anaa elototo e nkolong nabo tena shoto o elototo e nkolong nabo te nkae shoto, te manaroto oo lng'oborri, naa eneba anaa intemat are e nkaina eirrag ti oriong enkop.

³²Nedumunye iltung'ana ina olong pooki o enkewarie pooki o ina olong pooki natusujua nesotu inkurlen, ore olotasotuo inkuti naa ilbenia tomon, neisalaashaki ninche ate aaitaman ilng'oborri.

³³Ore ina kata eton etii nena kiri irishat oo lala lenye eton eitu enya aamut, neyupuyupoki engoro o Laitoriani iltung'ana, near Olaitoriani olorere to lmeitai kitok.

³⁴Neaku etejoki apa enkarna e ine wueji Kibrot-hatafa. Te nkaraki naa teine apa etunukayioki lelo tung'ana lo lorok.

³⁵Nedumunye iltung'ana te Kibrot-hatafa nepuo Haserot nebik ninche te Haserot.