Read Maasai Bible – Biblia Sinyati Enkikena 12 Bible Online

Enkikena 12 - Maasai Bible – Biblia Sinyati bible

Enkikena 12

¹Etukurra Miriam o Aron Musa te nkaraki ina kitok oo Lkushi nayama, amu entito oo Lkushi apa eyama Musa.

²Nejo ninche, “Ke Musa ake eirorie Olaitoriani? Keitu sii ninye eirorie iyiook?” Nening Olaitoriani ina.

³Ore apa ilo tung'ani oji Musa naa oltung'ani obor oleng alang iltung'ana pooki ootii oriong enkop.

⁴Ore nabo kata nejoki Olaitoriani Musa o Aron o Miriam, “Entupuku wootu, intae pokira okuni atua ilo ng'obor le ntumo.” Nepuku pokira uni aapuonu.

⁵Nedou Olaitoriani alotu enkop te ng'ape e nkatampoi neitashe te kutukaji o lng'obor, neipot Aron o Miriam, nepuonu pokira are dukuya.

⁶Nejoki ninche, “Entoning irorei laainei: Tenaa ketii oloiboni atua intae, ore nanu Olaitoriani makewan naitayiolo kewan ai ninye te nduata nairorie ninye te nkidetidet.

⁷Mme neijia to sinka lai Musa; ninye eishooki enkaji ai pooki.

⁸Ore ninye kairorie nanu kiwalikino too nkutukie, te nkibalakinoto, neme te nkiroroto misil; naa keing'or ninye eneikununo Olaitoriani. Kainyoo naa pee miurere intae aatukur ilo sinka lai Musa?”

⁹Neyupuyup engoro o Laitoriani tialo ninche, nelo aing'uaa.

¹⁰Ore ake pee eiwuang ina atampoi te shumata ilo ng'obor nejing Miriam enkeeya oo lbolot naibor anaa enturoto. Neibelekenya Aron aing'or Miriam, nedol etijing'a ninye enkeeya oo lbolot.

¹¹Nejoki Aron Musa, “Oi lo kitok lai, mintame iyiook amu kitaasa iyiook te modai, nikitaasa eng'oki.

¹²Mincho ninye etiu anaa enatua, naidaaitie inkiri o sesen apa pee eiu ng'otonye.”

¹³Neishiraki Musa Olaitoriani ejo, “Nchiunye ninye, Na Ai, aatasayia.”

¹⁴Kake etiaaka Olaitoriani Musa, “Amaa naaji tenaa ketonotaka menye miriam enkomom enye, aimekurru ninye nkolong'i naapishana? Inchoo ninye eikenori ti auluo ilng'oborri inkolong'i naapishana, ore te siadi ina neidimi aanyaaki aaitijing'u.”

¹⁵Neaku eikenoyioki apa Miriam ti auluo ilng'oborri inkolong'i naapishana, neitu edumunye iltung'ana aapuo o metaba anaa neitokini aaitijing'u Miriam.

¹⁶Ore te siadi ina nedumunye iltung'ana aapuo te Haserot nepuo aaun ilng'oborri ti ong'ata e Paran.