Read Maasai Bible – Biblia Sinyati Enkikena 15 Bible Online

Enkikena 15 - Maasai Bible – Biblia Sinyati bible

Enkikena 15

¹Nejoki Olaitoriani Musa, “Tiaaki iltung'ana le Israel,

²Ti nipuonunu kenya ina kop nipuopuo aamany,

³ina naisho nanu intae, ninchosho Olaitoriani inkishoorot naaing'uaa eluaata oo nkishu, aashu enoo ntare, olasar le nkima aashu olasar opejori, aashu olasar ake duo, pee intabayaya ilo mumai aashu olasar lo lpela, aashu too lasarri linyi ootegeluaki pee intobirakiki esong'ouna narropil Olaitoriani.

⁴Ore naa ilo oyau inkishoorot enyena neisho sii Olaitoriani olasar le ntapa le matua e tomon e ntapa napuyiapui eipurjaki te rubata e ong'uan e ilata,

⁵o enaisho te nkaraki olasar ooki, ore erubata e ong'uan nintobir te nebo olasar opejori, aashu te nkaraki olasar, to lkuo ake le ker.

⁶Aashu ore to lmeregesh nintobir to lasar le ntapa intemat are e matua e tomon e efa e ntapa napuyiapui naipurja too mboreitin uni e ilata,

⁷naa ore to lasar ooki nintayu mboreitin uni e naisho pee eaku olng'usil orropil to Laitoriani.

⁸Naa ti nintobir oloing'oni pee eaku olasar opejori, aashu olasar, pee intabaya olmumai, aashu olasar le seriani to Laitoriani,

⁹neitayu ake oltung'ani te nebo ilo oing'oni olasar le ntapa loo mboreitin uni e matua e tomon e efa entapa napuyiapui, naipurjaki te ilata naitorit empiribil.

¹⁰Ninchooyo to lasar ooki empirbil naitorit e naisho oo sabibu pee eaku olasar le nkima, olng'usil orropil to Laitoriani.

¹¹Neijia epuoi aaiko te pooki oing'oni aashu to lmeregesh, aashu te pooki sitima le ker aashu to le kine.

¹²Ore te risioroto e ina siana nintobiriri, naa neijia enkuna te pooki ng'ae te risioroto e siana enye.

¹³Ore lelo pooki inot linyi nchoo eas kuna baa tena oitoi, aaishooyo olasar le nkima, esong'ouna narropil to Laitoriani.

¹⁴Naa te neewuo oltung'ani leiking'a amanyisho te nebo intae, aashu te netii likae tung'ani atua intae too ishoritin inyi, neyieu ninye neishoru olasar opejori, esong'ouna narropil to Laitoriani, inchoo ninye eas anaa eniasiasa.

¹⁵Amu ore te umata naa keaku enkitanapata nabo ake, te intae o to lomoni otii te nebo intae, enkitanapata nabikoo tiatua iishoritin inyi pooki, ore anaa enitiuu naa neijia etiu ilo omoni te dukuya o Laitoriani.

¹⁶Keaku enkitanapata nabo o enkikoo nabo te iyie o te ilo omoni omanyisho te nebo intae.”

¹⁷Nejoki Olaitoriani Musa,

¹⁸“Tiaaki iltung'ana le Israel, te nipuonunu atua ina kop nayau nanu intae,

¹⁹naa ore ake pee inyanya endaa e ina kop, nintaikiki Olaitoriani enkishooroto.

²⁰Ore ina tapa inyi e dukuya ninchooyoyo emukate naaku olasar; ore anaa olasar oing'uaa osoit oiutuutishoreki, ninchooyoyo.

²¹Ore ilo asar linyi le ntapa e dukuya enchorie Olaitoriani olasar tiatua iishoritin inyi pooki.

²²“Kake tinintarruoo nimimbung'ubung'u kuna kitanapat naairoro Olaitoriani aimunye Musa,

²³ebaiki ina olong apa naishorua Olaitoriani inkitanapat neito dukuya tiatua iishoritin inyi pooki,

²⁴kake te neitadiaki te nkaraki meyiolo eumata neitayu naa ina umata pooki oloti oing'oni oaku olasar opejori, esong'ouna narropil to Laitoriani, te nebo olasar lenye le ntapa o lasar lenye ooki te risioroto e nkitanapata o sitima obo le kine oaku olasar le ng'oki.

²⁵Neitobir olapolosani olning'o lo sotua te nkaraki ina umata pooki oo ltung'ana le Israel, naa kepalakini ninye, amu enkitapong'oto apake, neyautua ninche olasar lenye, ilo asar le nkima oishori Olaitoriani, neyau ilo asar lenye le ng'oki dukuya Olaitoriani, te nkaraki ina kitarruoroto enye.

²⁶Ore ina umata pooki oo ltung'ana le Israel naa kepalakini o ilo omoni otii te nebo ninche, amu etijing'a apa ilo orere pooki ina kitarruoroto.

²⁷“Te neas oltung'ani eng'oki eitu eotiki, neitayu ninye esupen e kine o lari obo naaku olasar le ng'oki.

²⁸Neitobir olopolosani osotua lo lning'o te dukuya o Laitoriani te nkaraki ilo tung'ani otaasa enkitarruoroto, teneas ninye eng'oki eitu eotiki, naa kepalakini ninye.

²⁹Inchoo eaku enkitanapata nabo iata te ilo oas pooki toki eitu eotiki, o te ilo ora oinoti le Israel o te ilo omoni otamanyishe tiatua intae.

³⁰Kake ore ilo tung'ani oas pooki toki te otikinoto, aa oinoti aashu olomoni neinyala Olaitoriani, ore ilo tung'ani naa keiwuang'ieki aaitung'uaa iltung'ana lenye

³¹te nkaraki natemenayie ninye ororei lo Laitoriani, netigila enkitanapata enye, ore ilo tung'ani keiwuang'ieki tukul, ore eng'oki enye naa keaku shumata ninye.”

³²Ore apa eton etii iltung'ana le Israel olpurkel netum ninche oltung'ani osotu ilkeek te nkolong e Sabato.

³³Ore apa lelo oonoto ninye esotu ilkeek, neyau ninye enetii Musa o Aron o ilo turrur pooki.

³⁴Neikenori ninye, amu eitu apa eibalunyeki enaitaasi ninye.

³⁵Nejoki Olaitoriani Musa, “Keari ilo tung'ani metua; naa kenang ilo turrur pooki ninye too soito o metua ti auluo ilng'oborri.”

³⁶Neyau ilo turrur pooki ilo tung'ani auluo nenang ninye o metua too soito, anaa enaitanapa Olaitoriani Musa.

³⁷Nejoki Olaitoriani Musa,

³⁸“Irorie iltung'ana le Israel nintanap ninche pee epik ilkisialisal ilcholo loo lkilani lenye tiatua iishoritin enye pooki ore ake olkisialisialati le pooki sholoi enkeene pus;

³⁹naa keaku te iyie olkisialisialati oing'or nedamuni inkitanapat pooki o Laitoriani, pee easi ninche, mme pee isujaa oltau lino makewan o nkonyek inono makewan.

⁴⁰Neaku entadamu niasiasa inkitanapat aainei pooki niakuku sinyat to Laitoriani Enkai inyi.

⁴¹Kara nanu Olaitoriani Enkai inyi, ilo apa likintayio iyie aitupuku te nkop e Misiri, pee aaku Enkai inyi. Kara nanu Olaitoriani Enkai inyi.”