Read Maasai Bible – Biblia Sinyati Enkikena 17 Bible Online

Enkikena 17 - Maasai Bible – Biblia Sinyati bible

Enkikena 17

¹Neirorie Olaitoriani Musa nejoki,

²“Irorie iltung'ana le Israel, niyau te ninche eng'udi, nabo ake te nkaji oo loo menye, niyau too larikok pooki te risioroto oo nkajijik oo loo menye, ing'usidin tomon oaare. Ing'ero ake enkarna o ltung'ani te ng'udi enye

³ninger enkarna e Aron te ng'udi e Lawi. Amu keaku keetae eng'udi nabo te ndukuya e pooki aji oo loo menye.

⁴Shomo tipika ninche atua ilo ng'obor le ntumo, dukuya ina shakenisho, teine naalotu atumore.

⁵Ore eng'udi e ilo lagelu nejing inkaitubulu. Naisho taa meisha te nanu ina king'unyung'uny oo ltung'ana le Israel niking'unyung'unyaki ninche iyie.”

⁶Neirorie Musa iltung'ana le Israel neisho lelo arikok lenye pooki ing'usidin, nabo ake to larikoni, ore te risioroto oo nkajijik oo loo menye, ing'usidin tomon oaare, ore eng'udi e Aron naa nabo e nena ng'usidin enye.

⁷Nepik Musa nena ng'usidin dukuya Olaitoriani tiatua ilo ng'obor le shakenisho.

⁸Ore pee ekenyu nelo Musa atua ilo ng'obor le shakenisho; naa ng'ura, ore eng'udi e Aron te nkaji e Lawi etijing'a inkaitubulu nejing ilng'osil neitapuku, neiu ilng'anayio ooto.

⁹Neyau Musa nena ng'usidin pooki aitung'uaa dukuya Olaitoriani, ayau dukuya iltung'ana pooki le Israel; neing'or neya ake oltung'ani eng'udi enye.

¹⁰Nejoki Olaitoriani Musa, “Torrinyoki eng'udi e Aron dukuya shakenisho, pee eshumi aitaa enkitoduaata too loogolong'u, pee etum atapal enking'unyung'uny enye naaing'unyung'unyaki ninche nanu, pee meye ake.”

¹¹Ina etaasa Musa. Ore anaa enaitanapa Olaitoriani neas ninye ina.

¹²Nejoki iltung'ana le Israel Musa, “Ng'ura, eikindaaya iyiook, kiisha iyiook, kiisha iyiook pooki.

¹³Ore pooki ng'ae olotu anyikaki olng'obor lo Laitoriani neye. Eikindaaya iyiook pooki?”