Read Maasai Bible – Biblia Sinyati Enkikena 19 Bible Online

Enkikena 19 - Maasai Bible – Biblia Sinyati bible

Enkikena 19

¹Nejoki Olaitoriani Musa o Aron;

²“Ena enkitanapata naitanapishe Olaitoriani, Tiaaki iltung'ana le Israel pee kiyaki enkashe nanyokie nemeeta eleyiata nemeeta entioto neitu ae kata eenikini enchata emurt.

³Nilo aisho ina ashe Eliesa olapolosani, neipang'ieki ninye aaya auluo nepuoi aayieng te dukuya ninye.

⁴Ore Eliesa olapolosani neya embata o sarge le ina ashe to lkimojino lenye, neisuaaki embata e ilo sarge dukuya e ilo ng'obor le ntumo katitin naapishana.

⁵Ore ina ashe nepejori, te dukuya ninye, nepejori olchoni lenye o nkiri enyena o sarge lenye nepejori sii imoyok enyena.

⁶Neya olapolosani inkeek o ltarakwai o mbenek e hisopo[11] o enkarasha nanyokie nenang'aki empolos eine nepejorieki ina ashe.

⁷Ore te siadi ina, neituku olapolosani ilkilani lenyena nebukoki kewan enkare, netum taa atijing'a ilng'oborri; kake keton ninye mesinya o metaa teipa.

⁸Ore ilo opejoo ina ashe neituku ilkilani lenyena te nkare neituku osesen lenye te nkare, neton ninye mesinya o metaa teipa.

⁹Ore oltung'ani osinya nesotu nkuruon e ina ashe nelo apik auluo ilng'oborri e ewueji nemetii olduruk; neshumi ninche te nkaraki eumata oo ltung'ana le Israel te nkaraki enkare naitisinyishoreki, te nkitukuoroto oo ng'ok.

¹⁰Ore ilo oiturrur nkuruon e ina ashe neituku ilkarash lenyena neton ninye mesinya o metaa teipa. Naa keaku ena te nkaraki iltung'ana le Israel o te nkaraki ilo omoni otamanyishe tiatua ninche, enkitanapata ena oo nkatitin pooki.

¹¹“Ore ilo oiseyie olmeneng'ani le likae tung'ani ake ninye, nesarkionu nkolong'i naapishana.

¹²Inchoo ninye eituku kewan te nkare te nkolong e uni o te nkolong e naapishana, pee etum taa atisinyayu; kake te nemeituku ninye kewan te nkolong e uni o te nkolong e naapishana, nemesinyayu ninye.

¹³Ore pooki ng'ae oiseyie olmeneng'ani, ilo sesen ake ninye lo ltung'ani otua, nemeituku kewan, neiduruku olng'obor lo Laitoriani, ore ilo tung'ani nedung'ori aaiwuang'ie tiatua Israel; te nkaraki neitu eisuaakini enkare enkitisinyata shumata ninye, keaku ninye mesinya keton olduruk lenye te shumata ninye.

¹⁴“Ena ninye enkitanapata te neye oltung'ani tiatua olng'obor: ore pooki ng'ae ojing'u atua olng'obor o pooki ng'ae otii atua olng'obor neaku olemesinya inkolong'i naapishana.

¹⁵Ore pooki toki nang'a nemepising'a neiduruku.

¹⁶Ore pooki ng'ae ti ong'ata oiseyie ilo otasesekuanaki to lalem, aashu olmeneng'ani, aashu oloito lo ltung'ani, aashu enkurare neaku olemesinya inkolong'i naapishana.

¹⁷Ore te ilo lemesinya inchoo eyai embata oo nkuruon e ilo asar otapejoyioki loo ng'ok o enkare naruko napiki empirbil;

¹⁸nelotu taa oltung'ani osinya aitayu imbenek e nchani naji hisopo, neitadoiki atua ina are, neisuaaki shumata ilo ng'obor o shumata imasaa pooki ilorikan o shumata lelo tung'ana ootii ine, o shumata ilo oiseyie oloito, aashu olotasesekuanaki, aashu olotua, aashu enkurare.

¹⁹Ore ilo tung'ani osinya neisuaki ilo tung'ani lemesinya te nkolong e uni o te nkolong e naapishana, ore te nkolong e naapishana neitisiny ninye, neituku ninye ilkilani lenyena neituku kewan te nkare, ore pee eaku teipa nesinyayu ninye.

²⁰“Kake ore ilo tung'ani lemesinya nemeituku kewan, nedung'ori ilo tung'ani aitung'uaa atua eumata, te nkaraki naidurukie ewueji sinyati o Laitoriani; te nkaraki neitu ebukokini enkare e enkitisinyata shumata ninye, mesinya ninye.

²¹Naa keaku enkitanapata oo nkatitin pooki te ninche. Ore ilo oisuaaya ina are naitisinyishoreki neituku ilkilani lenyena neaku mesinya o metaa teipa.

²²Ore entoki pooki naba anaa enaiseyie oltung'ani lemesinya neaku enemesinya; ore pooki ng'ae oiseyie ina neaku oltung'ani lemesinya o metaa teipa.”