Read Maasai Bible – Biblia Sinyati Enkikena 21 Bible Online

Enkikena 21 - Maasai Bible – Biblia Sinyati bible

Enkikena 21

¹Ore ake pee ening ilo Kanaani aiguanani le Arad apa omanya Negeb, inchere kelotu Isiraeli aaimu enkoitoi e Afarim, nearare ninye Israel, neibung kulikae lenye araya.

²Nenya Israel olmumai to Laitoriani, nejo, “Ti ninchoru iyie ele orere apik enkaina ai, nalo naa nanu aidaikie inkanas enye tukul.”

³Nening Olaitoriani oltoilo le Israel, neishooyo lelo le Kanaan; neidaikie Siraeli ninche o nkanas enye. Neaku keji ine wueji Horma.

⁴Nedumunye to ldoinyo le Hor neim enkoitoi Enaiposha Nanyokie, aapuo aamanaa te nkop e Edom; nesi iltung'ana te nkoitoi.

⁵Neiro ninche mbaa torrok tialo Enkai o Musa. Neing'unyung'uny ninche nejo, “Kainyoo pee iyaua iyiook aitupuku te nkop e Misiri maetu aaye tene tiong'ota? Amu metii endaa nemetii enkare, neitirika iyiook ena daa nemeeta tipat.”

⁶Neirriu Olaitoriani ilasuriaa oopi atua iltung'ana, neony ninche iltung'ana o metuata iltung'ana kumok le Israel.

⁷Nepuonu iltung'ana enetii Musa, nejoki, “Kitaasa iyiook eng'oki, amu kiroro iyiook imbaa torrok tialo Olaitoriani o tialo iyie; toomono Olaitoriani pee eiwuang'ie ninye ilasuriaa te iyiook.” Neomonoki Musa iltung'ana.

⁸Nejoki Olaitoriani Musa, “Intobiru olasurai opi nipik shumata eng'ape; ore ake pooki ng'ae oonyi, te neing'or ninye, nepok.”

⁹Neaku eitobirua Musa olasurai lo suyai nepik shumata e ng'ape; naa te nelo neony olasurai likae tung'ani, neing'or ninye ilo asurai lo suyai nepok.

¹⁰Nedumunye iltung'ana le Israel nepuo aaun ilng'oborri te Obot.

¹¹Neitoki aadumunye te Obot nepuo aaun ilng'oborri te Iye-abarim, te ilo purkel oipirare Moab, te nchoto e nkilepunoto e nkolong.

¹²Nedumunye teine aapuo, neun ilng'oborri to erata le Sared.

¹³Nedumunye teine aapuo neun ilng'oborri te nkae shoto e Arnon, naa ninye natii ina ong'ata, nelo abaiki olpolosie loo le Amori; amu ore apa Anon naa ninye olpolosie le Moab, te rishata e Moab o le Amori.

¹⁴Neaku etejoki apa te mbuku oo njorin o Laitoriani, “Waheb te Sufa, o erat le Arnon,

¹⁵o lelo ooshong'ishong le lelo erat oopuo aabaya entonata e Ari, nepuo o meikobo olpolosie le Moab.”

¹⁶Nepuo teine o metabaiki Beeri, aa taa, olchorro apa laa ninye etiaakinye Olaitoriani Musa, “Inturrurro iltung'ana te nebo, pee aisho nanu enkare.”

¹⁷Nerany apa Israel ele sinkolio: “Turukunye, na shorro! - Entaranyaki ninye!

¹⁸Ena shorro apa natuturo ilkituaak, natoota ilooyanyiti loo ltung'ana, too rinkan lenye le nkitoo o too ng'usidin enye.” Neitoki aadumunye to lpurkel nepuo Matana.

¹⁹Nedumunye te Matana nepuo Nahaliel, nedumunye te Nahaliel nepuo Bamot,

²⁰nedumunye te Bamot nepuo ilo erata otii enkop e Moab, enchumata e Pisga, ine nerumaki kop o lpurkel.

²¹Neitoki Israel airriwaki Sihon ilkiliku, ilo aiguanani le Amori, nejoki,

²²“Inchooki nanu maima atua enkop ino; mikimbelekenya iyiook aapuo olokeri aashu enkurma oo sabibu, mikiok iyiook enkare enchorro; eikipuo iyiook aaim ina oitoi nalala o laiguanani o metaba anaa nikimpang tiatua enkop ino.”

²³Kake etanya Sihon eisho Israel meima atua enkop enye. Neiturrur ninye iltung'ana lenyena pooki te nebo, neipang alo aarare Israel to lpurkel, nebau Yahas, nearare Israel.

²⁴Nesesekuan Israel ninye te nepi o lalem, neya enkop enye ebaiki Arnon o metabaiki Yabok o meshomo abaiki ile Amori; amu Yaser apa olpolosie loo le Amori.

²⁵Neya Israel nena anas pooki, nemany Israel nena anas pooki oo le Amori, te Heshbon o nkang'itie enyena pooki kutiti.

²⁶Amu Heshbon apa enkanasa e Sihon ilo aiguanani loo le Amori, laa ninye otaarare olaiguanani le dukuya le Moab, neya enkop pooki aitung'uaa ninye o metabaiki Arnon.

²⁷Neaku kejo ilaranyak loo nkaatini, “Wootu Heshbon, nchoo esheti ninye, nchoo enkanasa e Sihon metesheti aaitagol.

²⁸Amu eipang'ua enkima te Heshbon, eipang'ua olng'ejep le nkima te nkanasa e Sihon, Eidaikie Ari e Moab, o lkituaak loo neeika e Arnon.

²⁹Oi iyie, Moab! Indaaitie lo tung'ana le Kemosh! Eitaa ninye ilayiok lenyena ilaisikak, neitaa intoyie enyena iyararot, o laiguanani le Amori, oji Sihon.

³⁰Eidaayie eishoi enye te Heshbon, o metabaiki Dibon, kindaikie iyiook o metaba anaa nebaiki enkima Medeba.”

³¹Nemany apa Israel enkop oo le Amori.

³²Neirriwaa Musa iltung'ana meshomo aaikitalan Yaser; neya ninche inkang'itie enye kutiti, neiwuang'ie lelo apa le Amori oomanya ine.

³³Neitoki ninche aaibelekenya neilep aaim enkoitoi e Bashan; ore Oog olaiguanani le Bashan nelotu aarare ninche, ninye o ltung'ana lenyena pooki, pee epuo aaitayu olarrabal te Edrei.

³⁴Kake etiaaka Olaitoriani Musa, “Miureyu iyie ninye; amu aishorua nanu ninye apik atua inkaik inono, o ltung'ana lenyena pooki o enkop enye; naa ilo iyie aitaas ninye anaa enintaasa Sihon olaiguanani le Amori, apa omanya Heshbon.”

³⁵Neaku etasesekuana apa Isiraeli Oog o layiok lenyena o ltung'ana lenyena pooki o metaba anaa neaku meetae obo aa taa olaishirani otelekua te ninye; neya ninche ina kop aaitaa enenye.