Read Maasai Bible – Biblia Sinyati Enkikena 25 Bible Online

Enkikena 25 - Maasai Bible – Biblia Sinyati bible

Enkikena 25

¹Ore apa ina kata emanya Israel Shitim neiteru iltung'ana aaiborrie onyek too ntoyie e Moab.

²Ore kuna ng'oruo neitoomon iltung'ana too lasarri loo nkaitin enye, nenya iltung'ana, neirrugokino inkaitin enye.

³Neaku eteenikia Israel kewan Baal e Peor. Neyupuyup engoro o Laitoriani tialo Israel;

⁴nejoki Olaitoriani Musa, “Iwa lelo arikok pooki loo ltung'ana, ililio ninche to ldalati te dukuya Olaitoriani, pee etum ina goro napi o Laitoriani atapaasha Israel.”

⁵Nejoki Musa lelo arishak le Israel, “Nchoo ake pooki ng'ae te intae esesekuan oltung'ani lenye oteenikia kewan esinkaisho e Baal e Peor.”

⁶Nelotu oltung'ani obo loo ltung'ana le Israel, ayau enkitok e Midian atua olmarei lenye, too nkonyek e Musa o too nkonyek e ina umata pooki oo ltung'ana le Israel ina kata apa eishirita ninche te kutukaji e ilo ng'obor le ntumo.

⁷Ore ake pee edol Finehas olayioni le Eliesa, ilo ayioni le Aron olapolosani, nedumunye ninye alo aing'uaa ilo turrur, nedumu empere te nkaina enye

⁸nelo asujaa ilo tung'ani le Israel o meshomo olgilata li atua, nerem pokira are, ilo tung'ani le Israel o ina kitok, aipang'ie empere to sesen lenye. Ina taa pee eiwuang'ieki olmeitai too ltung'ana le Israel.

⁹Ore ake eyia, lelo apa ootuata to lmeitai naa inkalifuni tikitam o ong'uan.

¹⁰Neitoki Olaitoriani ajoki Musa,

¹¹“Ore Finehas, olayioni le Eliesa, olayioni le Aron olapolosani, neiwuang'ie engoro ai too Siraeli nchere eeta ninye olom lai tiatua ninche, metaa eitu nanu amut iltung'ana le Israel to lom lai.

¹²Metaa tiaaki ninye, ‘Kaaisho nanu ninye osotua lai le seriani;

¹³naa keaku te ninye o te ishoi enye, te siadi ninye, ilo ning'o lo sotua le mpolosare e anaake, te nkaraki naata ninye olom te nkaraki Enkai enye, neitobira olning'o lo sotua too ltung'ana le Israel!’ ”

¹⁴Ore apa enkarna e ilo tung'ani le Israel otasesekuanaki te nebo enkitok e Midian, naa Simri olayioni le Salu, laa endukuya enkaji oo loo menye le nkaji oo le Simeon.

¹⁵Ore apa enkarna e ina kitok e Midian natasesekuanaki naa Kosbi entito e Suri, naa ninye apa endukuya o lorere le nkaji oo loo menye te Midian.

¹⁶Nejoki Olaitoriani Musa,

¹⁷“Ntanyamala ile Midian, niosh aar ninche;

¹⁸amu kintanyamala ninche iyie te nkeleekisho enye, amu ninye etelejie intae teina bae e Peor o teina bae e Kosbi, ina tito o lkitok le Midian, ina anashe enye apa nataraki metua te nkolong o lmeitai te mbae e Peor.”