Read Maasai Bible – Biblia Sinyati Enkikena 27 Bible Online

Enkikena 27 - Maasai Bible – Biblia Sinyati bible

Enkikena 27

¹Neitoki aanyiku nena toyie e Selofehad olayioni le Hefer, olayioni le Gilead, olayioni le Makir, olayioni le Manase, olayioni le Yosef. Ore apa inkarn e nena toyie enyena naa: Mahala o Noa o Hogla o Milka o Tirsa.

²Neitashe ninche te dukuya Musa o Eliesa ilo apolosani o te dukuya lelo arikok o ina umata, te kutukaji e ilo ng'obor le ntumo, nejo,

³“Etua apa papa lang tiong'ota; metii apa ninye ina umata e lelo ooiturrurrote aapaashare Olaitoriani te ncholiek e Kora, kake etua te nkaraki eng'oki enye makewan; nemeeta apa ilayiok.

⁴Kainyoo naa pee eiwuang'ieki enkarna e papa lang to lmarei lenye, te nkaraki nemeeta olayioni? Nchoo iyiook erubata tiatua ilalashera le papa.”

⁵Neyau Musa ilo omoni lenye dukuya Olaitoriani.

⁶Nejoki Olaitoriani Musa,

⁷“Etisipa nena toyie e Selofehad; nchoo ninche erubata e njung'ore tiatua ilalashera le menye, nincho ina jung'ore e menye lenye meshomo aaku enenye,

⁸Nijoki iyie iltung'ana le Israel, ‘Te neye oltung'ani, nemeeta olayioni, nincho enjung'ore enye meshomo aaku ene ntito enye.

⁹Naa te nemeeta entito, nincho enjung'ore enye eaku enoo lalashera lenyena.

¹⁰Naa te nemeeta ilalashera, nincho naa enjung'ore enye ilalashera le menye.

¹¹Naa te nemeeta menye ilalashera nincho naa enjung'ore enye oltung'ani lenye, laa ninye onyikare olmarei lenye, pee eya ninye. Naa keaku ena enkitanapata o enkikoo too ltung'ana le Israel, anaa enaitanapa Olaitoriani Musa.’ ”

¹²Nejoki Olaitoriani Musa, “Ilepa shomo enchumata ele doinyo le Abarim, pee idol ina kop naishoo nanu iltung'ana le Israel.

¹³Naa ore ake pee indip atoduaa ina kop, nintoki sii iyie alo eneiturrure iltung'ana linono apa ootuata anaa apa enashomo olalashe lino Aron,

¹⁴te nkaraki nitogolong'aka ororei lai ti ong'ata e Sin, ina kata apa eing'unyung'uny eumata maayanyit aaitisiny nanu te nena ariak apa naatii dukuya inkonyek enye. (Inkariak kuna e Meriba e Kadesh tiong'ata e Sin.)

¹⁵Nejoki Musa Olaitoriani,

¹⁶‘Nchoo Olaitoriani, Enkai oo nkiyang'eta e pooki naaishu egelu oltung'ani oitasheiki ena umata,

¹⁷oipang alo dukuya ninche, nejing'u alotu te dukuya ninche, orikoo ninche aipang'ie neriku ninche aitijing'u; pee metiu eumata o Laitoriani anaa nkerra nemeeta olchekut.’ ”

¹⁸Nejoki Olaitoriani Musa, “Iwa Yoshua olayioni le Nuni, ilo tung'ani otii enkiyang'et atua ninye, ninteleiki inkaik shumata ninye.

¹⁹Nchoo ninye meitasho te dukuya Eliesa ilo apolosani o ina umata pooki, nintanap aisho enkitoo te dukuya ninche.

²⁰Inchopoki ninye embata e nkitoria ino, pee etum eumata pooki oo ltung'ana le Israel aatoning.

²¹Naa keitashe ninye te dukuya Eliesa ilo apolosani, laa ninye oikilikuanisho te nkaraki ninye, te nkiguana e Urim te dukuya Olaitoriani; to rorei lenye eipang ninche aapuo naa to rorei lenye ninche ejing'u atua, ninye o ltung'ana pooki le Israel ootii te nebo ninye, ina umata pooki.”

²²Neas Musa anaa enaitanapa Olaitoriani; neya ninye Yoshua neitasheyie ninye te dukuya Eliesa ilo apolosani o ina umata pooki,

²³eiteleiki ninye inkaik enyena shumata ninye, neitanap ninye aisho enkitoo anaa enatuutua Olaitoriani aimunye Musa.