Read Maasai Bible – Biblia Sinyati Enkikena 29 Bible Online

Enkikena 29 - Maasai Bible – Biblia Sinyati bible

Enkikena 29

¹“Ore te nkolong e dukuya o lapa liopishana, enturrurroto embung'a eumata nasinya; miasiasa esiaai nagol. Enkolong ina te intae nioshiosho imowuarak,

²ninchooyoyo olasar opejori, esong'ouna narropil to Laitoriani: oloing'oni obo oti o lmeregesh obo o sitiman oopishana le kerra lo lari obo lemeeta entioto;

³o lasar sii lenye le ntapa napuyiapui, naipurjaki te ilata o ematua e uni e tomon e efa to loing'oni ake, ematua e are e tomon to lmeregesh,

⁴o ematua nabo e tomon to sitima ake le ker le lelo oopishana;

⁵te nebo ositima obo le kine oaku olasar le ng'oki, pee eitobir osotua lo lning'o te nkaraki intae.

⁶Nepudare ilo asar opejori lo lapa ng'ejuk, olasar lenye le ntapa o ilo asar opejori le anaake o lasar lenye le ntapa o lasar lenye ooki, te risioroto e ina kitanapa enye, esong'ouna narropil, olasar le nkima oishori Olaitoriani.

⁷“Ore te nkolong e tomon ele apa li opishana, ninturrurrorro intae aaibung eumata sinyati, nieniene ate, nimiasiasa esiaai,

⁸kake entarasai olasar opejori aaisho Olaitoriani, esong'uona narropil: oloing'oni obo oti o lmeregesh obo o sitiman oopishana le kerra lo lari obo; nchoo eaku meeta ntiot;

⁹o lasarri lenye le ntapa napuyiapui naipurja te ilata o matuan uni e tomon e efa, to loing'oni obo o matuan are e tomon to lmeregesh obo,

¹⁰o e matua nabo e tomon te pooki sitima le ker le lelo oopishana:

¹¹o sitima obo le kine oaku olasar le ng'oki, te nebo ilo asar lenye leilo sotua lo lning'o o ilo asar le anaake opejori o ilo asar lenye le ntapa o lasarri lenye ooki.

¹²“Ore te nkolong e tomon o imiet o lapa li opishana, ninturrurrorro aaibung eumata nasinya; miasiasa esiaai nagol embung'a osirua lo Laitoriani inkolong'i naapishana;

¹³ninchooyoyo olasar opejori, ilo asar le nkima, esong'ouna narropil to Laitoriani, iloing'ok tomon o okuni o lmeregeshi oaare o sitiman tomon o ong'uan le kerra lo lari obo; naa lelo lemeeta ntiot;

¹⁴o lasari lenye le ntapa napuyiapui naipurja te ilata o matuan uni e tomon e efa ti obo ake le lelo oing'ok tomon o okuni o matuan are e tomon to lmeregesh ake obo te lelo pokira are,

¹⁵o ematua nabo e tomon te pooki sitima le lelo sitiman le kerra tomon o ong'uan;

¹⁶o sitima obo le kine oaku olasar le ng'oki epudare ilo asar le anaake o lasar lenye le ntapa o lasarri lenye ooki.

¹⁷“Ore te nkolong e are entopolos iloing'ok tomon o are ooti o lmeregeshi oaare o sitiman tomon o ong'uan lo lari obo lemeeta intiot,

¹⁸te nebo olasar le ntapa o lasar ooki te lelo oing'ok o loo lmeregeshi o loo sitiman le kerra, te nkikenata te risioroto e nkitanapata;

¹⁹o sitima obo le kine oaku olasar le ng'oki, epudare ilo asar opejori li anaake o lasar lenye le ntapa o lasarri lenye ooki.

²⁰“Ore te nkolong e uni naa iloing'ok tomon o obo o lmeregeshi oaare o sitiman le kerra tomon o ong'uan lo lari obo lemeeta ntiot,

²¹te nebo olasar le ntapa o lasarri ooki te lelo oing'ok o loo lmeregeshi o loo sitiman le kerra, te nkikenata te risioroto e nkitanapata.

²²Te nebo sii ositima obo le kine to lasar le ng'oki, epudare ilo asar opejori le anaake o lasar lenye le ntapa o lasar lenye ooki.

²³“Ore te nkolong e ong'uan naa iloing'ok tomon o lmeregeshi oaare o sitiman tomon o ong'uan le kerra lo lari obo lemeeta entioto,

²⁴te nebo ilo asar le ntapa o lasarri ooki, te lelo oing'ok, o lelo meregeshi o te lelo sitiman le kerra, te nkikenata te risioroto e nkitanapata;

²⁵te nebo ositima obo le kine oaku olasar le ng'oki, epudare ilo asar opejori le anaake o lasar lenye le ntapa o lasar lenye ooki.

²⁶“Ore te nkolong e imiet naa iloing'ok ooudo o lmeregeshi oaare o sitiman le kerra tomon o ong'uan lo lari obo lemeeta entioto,

²⁷te nebo ilo asar le ntapa o lelo asarri ooki te lelo oing'ok o te lelo meregeshi o lelo sitiman le kerra, te nkikenata te risioroto e nkitanapata;

²⁸te nebo sii ositima obo le kine to lasar le ng'oki; epudare ilo asar opejori le anaake o ilo asar lenye le ntapa o ilo asar lenye ooki.

²⁹“Ore te nkolong e ile naa iloing'ok isiet o lmeregeshi oaare o sitiman tomon o ong'uan le kerra lo lari obo lemeeta ntiot,

³⁰te nebo ilo asar le ntapa o lasarri ooki te lelo oing'ok o too lmeregeshi o te lelo sitiman le kerra, te nkikenata te risioroto e nkitanapata;

³¹te nebo sii ositima obo le kine oaku olasar le ng'oki, epudare ilo asar opejori le anaake, ilo asar lenye le ntapa o lelo asarri lenye ooki.

³²“Ore te nkolong e naapishana naa iloing'ok oopishana o lmeregeshi oaare o sitiman tomon o ong'uan lo lari obo lemeeta ntiot,

³³te nebo olasar le ntapa o lasar ooki, te lelo oing'ok o lelo meregeshi o lelo sitiman le kerra, te nkikenata te risioroto e nkitanapata;

³⁴te nebo sii ositima obo le kine oaku olasar le ng'oki, epudare ilo asar opejori le anaake, ilo asar lenye le ntapa o ilo asar lenye ooki.

³⁵“Ore te nkolong e isiet embung'a eumata nasinya: miasiasa esiaai nagol,

³⁶kake enchooi olasar opejori, ilo asar le nkima, esong'ouna narropil to Laitoriani; aapolos oloing'oni obo o lmeregesh obo o sitiman oopishana le kerra lo lari obo lemeeta intiot

³⁷o lasar le ntapa o lasarri ooki, to loing'oni ake o to lmeregesh o te lelo sitiman le kerra, te nkikenare te risioroto e nkitanapata;

³⁸te nebo sii ositima obo le kine oaku olasar le ng'oki, epudare ilo asar opejori le anaake o ilo asar lenye le ntapa o ilo asar lenye ooki.

³⁹“Kuna ninche intarasakiki Olaitoriani te lelo siruai linyi oogeluno, te nebo lelo asarri linosie olmumai o lasarri linyi le yieunoto, te nkaraki lelo asarri linyi oopejori o lasarri linyi le ntapa o lasarri linyi ooki o lasarri linyi le seriani.”

⁴⁰Neliki Musa iltung'ana le Israel pooki toki anaa ake enaitanapa Olaitoriani ninye.