Read Maasai Bible – Biblia Sinyati Enkikena 3 Bible Online

Enkikena 3 - Maasai Bible – Biblia Sinyati bible

Enkikena 3

¹Kuna ninche iishoritin e Aron o Musa teina kata pee eirorie Olaitoriani Musa to ldoinyo le Sinai.

²Kuna ninche inkarn oo layiok le Aron: Nadab olkikau, o Abihu o Eleasar o Itamar;

³kuna ninche inkarn oo layiok le Aron, lelo apolosak ootubukokoki eilata aaput, laa ninche etegelua pee eisiaaisho anaa ilapolosak.

⁴Kake ore Nadab o Abihu netuata te dukuya Olaitoriani ina kata apa pee eishoru olasar le nkima lemesinya te dukuya Olaitoriani ti ong'ata e Sinai; nemeeta apa ninche inkera. Neaku Eliesa o Itamar apa ooisiaishote anaa lapolosak te nkata e nkishui e Aron papaai lenye.

⁵Neitoki Olaitoriani ajoki Musa,

⁶“Toriku olosho le Lawi intinyiku, nipik ninche dukuya Aron ilo apolosani, pee etum ninche aaisiaayia ninye.

⁷Inchoo ninche eitabaya enkisiaayiare te ninye o to lturrur pooki te dukuya ilo ng'obor le ntumo, anaa enaisiaisho ninche tiatua olng'obor le Nkai.

⁸Inchoo ninche eitaisheiki imasaa pooki e ilo ng'obor le ntumo, nejing enkisiaayiare te nkaraki iltung'ana le Israel anaa te neisiaaisho ninche to lng'obor.

⁹Ninchooyo iyie ile Lawi aisho Aron o layiok lenyena; eishooki ninche ninye tukul tiatua iltung'ana le Israel.

¹⁰Nigelu iyie Aron o layiok lenyena, nejing ninche esiaai enye e mpolosare; kake te nelotu likae tung'ani anyiku neari metua.”

¹¹Neitoki Olaitoriani ajoki Musa,

¹²“kaitayu nanu ile Lawi aitung'uaa atua iltung'ana le Israel te rishata e pooki kikau too ltung'ana le Israel. Keaku ore ile Lawi naa ilaainei,

¹³amu ore ilkikaunot pooki naa ilaainei; ore apa ina olong nataara nanu metuata ilkikaunot pooki te nkop e Misiri, aitisinyaka nanu kewan ilkikaunot pooki tiatua Israel aa olayioni le tung'ani o le eng'ues; keaku ninche ilaainei: Kara nanu Olaitoriani.”

¹⁴Neitoki Olaitoriani ajoki Musa ti ong'ata e Sinai,

¹⁵“Inkena ilayiok le Lawi, anaa too nkajijik oo loo menye o too lmareita; ore pooki lee lo lapa obo neilep inkenai.”

¹⁶Neaku eikena apa Musa ninche te risioroto o rorei lo Laitoriani, anaa enaitanapaki.

¹⁷Naa kulo apa ilayiok le Lawi anaa too nkarn enye: Gershon o Kohat o Merari.

¹⁸Naa kuna ninche inkarn oo layiok le Gershon too lmareita lenye: Libni o Shimei.

¹⁹Ore ilayiok le Kohat anaa too lmareita lenye naa: Amram o Ishar o Hebron o Usiel.

²⁰Ore ilayiok le Merari anaa too lmareita lenye naa; Mahili o Mushi. Kulo ninche ilmareita loo lawi anaa too nkajijik oo loo menye.

²¹Ore apa ile Gershon naa olmarei le Libni o lmarei le Shimei; kulo apa ilmareita loo le Gershon.

²²Ore esiana enye te risioroto e nkikena oo lewa pooki ebaiki olapa obo neilep naa inkalifuni naapishana o iip imiet.

²³Ore ilmareita loo le Gershon neun ilng'oborri ti oriong olng'obor le Nkai te nchoto o loo ntoluo,

²⁴te nebo Eliasaaf, olayioni le Lael aa ninye endukuya e nkaji oo loo menye too le Gershon.

²⁵Ore apa enkitanapata oo layiok le Gershon te ilo ng'obor le ntumo, naa pee eing'or ilo ng'obor le Nkai, olng'obor kewan o enkimulumulata enye o enkikenet e kutuk aji e ilo ng'obor le ntumo o neeikishoreki to lgoriet,

²⁶o enkikenet o lgoriet, ilo omanita olng'obor le Nkai o lperere lo lasar o nkeenta enyena o enkisiaayiare pooki naipirta kuna.

²⁷Ore too le Kohat naa olmarei loo le Amram, olmarei loo le Ishart o lmarei loo le Hebron o lmarei loo le Usiel; kulo ninche ilmareita loo le Kohat.

²⁸Ore esiana oo lewa pooki ebaiki olapa obo neilep naa inkalifuni isiet o iip ile, lelo ooisiaaisho te wueji sinyati.

²⁹Ore ilmareita loo layiok le Kohat neun ilng'oborri lenye te nchoto e kopikop o lng'obor le Nkai,

³⁰te nebo Elisafan olayioni le Usiel, aa ninye endukuya te nkaji oo loo menye too lmareita loo le Kohat.

³¹Ore enaitanapaki ninche naa pee eing'or osanduku, o emisa o iketa oo iltaai o lpereren loo lasarri nena masaa e wueji sinyati naa ninche eisiaaishore ilapolosak o lkarasha lo lodung'oro o enkisiaayiare pooki naipirta kuna baa.

³²Ore Eliesa olayioni le Aron ilo apolosani neaku ninye olkitok loo larikok loo Lawi neitasheiki lelo aitasheikinok le wueji sinyati.

³³Ore too ile Merari naa olmarei loo le Mahili o lmarei loo le Mushi: kulo ninche ilmareita le Merari.

³⁴Ore esiana enye te risioroto e nkikena oo lewa ebaiki olapa obo neilep naa inkalifuni ile o iip are.

³⁵Ore endukuya e nkaji oo loo menye lo lmarei le Merari naa Suriel olayioni le Abihail; neun ninche ilng'oborri lenye te nchoto e moikuape o lng'obor le Nkai.

³⁶Ore esiaai nategeluaki aaitanap ilayiok le Merari naa irubat oo sunta e ilo ng'obor le Nkai, inkeek o ng'apeta o ntoneta oo ng'apeta o ntokitin naaidikidikore enkisiaayiare pooki naipirta kuna baa;

³⁷te nebo sii nena ng'apeta o lgoriet naamanaa o ntoneta enye o ncheito enye o nkeenta.

³⁸Ore ilooun olng'obor lenye te dukuya olng'obor le Nkai te nchoto o loosaen, te dukuya ilo ng'obor le ntumo te nchoto e nkilepunoto e nkolong naa Musa o Aron o layiok lenyena, eitaisheiki mbaa pooki e seremare teine wueji sinyati o pooki naasi, te nkaraki iltung'ana loo Siraeli; naa ore ake oltung'ani onyiku neari metua.

³⁹Ore lelo pooki apa ooikenaki too le Lawi, laa ninche apa eikena Musa o Aron te nkitanapata o Laitoriani, anaa too lmareita, ore ilewa pooki ebaiki olapa obo neilep naa inkalifuni tikitam o are.

⁴⁰Neitoki Olaitoriani ajoki Musa, “Inkena ilewa kikaunot pooki loo ltung'ana le Israel, ebaiki olapa obo neilep, niya esiana enye anaa too nkarn.

⁴¹Nincho ile Lawi metaa ilaainei - Kara nanu Olaitoriani, te rishata oo lkikaunot pooki loo ltung'ana le Israel, inkishu oo le Lawi te rishata oo lkikaunot pooki loo nkishu oo ltung'ana le Israel.”

⁴²Neaku eikena apa Musa ilkikaunot pooki tiatua iltung'ana le Israel, anaa enaitanapa Olaitoriani ninye.

⁴³Neiken ilkikaunot pooki lewa, te risioroto e siana oo nkarn, ore ebaiki olapa obo neilep anaa enaikenaki naa inkalifuni tikitam oaare o iip are o ntomoni naapishana o okuni.

⁴⁴Neitoki Olaitoriani ajoki Musa,

⁴⁵“Iwa ile Lawi te rishata oo lkikaunot pooki tiatua iltung'ana le Israel o nkishu oo le Lawi te rishata oo nkishu enye; neaku Ilawi ilaainei: Kara nanu Olaitoriani.

⁴⁶Ore te nkordunoto e lelo kikaunot iip are o ntomoni naapishana o kuni le lelo kikaunot loo ltung'ana le Israel, ootulusoitie aagiroo esiana oo le Lawi,

⁴⁷iwa shekeli imiet ake te pooki tung'ani, neitorisiokini shekeli e wueji sinyati; ore ina shekeli gera tikitam na ilo aya ninche

⁴⁸nincho nena pisai e lelo ootuluso esiana enye, oolootalakuaki, nincho Aron o layiok lenyena.”

⁴⁹Neaku ewa apa Musa nena pisai oo ltung'ana ootuluso, ootalakutua ile Lawi ootalakuaki.

⁵⁰Ore too lkikaunot loo ltung'ana le Israel neya iropiyiani, shekeli enkalifu nabo o iip uni o ntomoni ile o imiet, naaitorisiokoki shekeli e wueji sinyati;

⁵¹neisho Musa nena pisai e lakunoto Aron o layiok lenyena te risioroto ororei lo Laitoriani, anaa enaitanapa Olaitoriani Musa.