Read Maasai Bible – Biblia Sinyati Enkikena 30 Bible Online

Enkikena 30 - Maasai Bible – Biblia Sinyati bible

Enkikena 30

¹Nejoki Musa ilukuny oo loshon loo ltung'ana loo Siraeli, “Ena ninye eitanapishe Olaitoriani.

²Te nenya oltung'ani olmumai te nkaraki Olaitoriani, aashu te nenya olmumai pee een kewan te mbae natejo, nchoo ninye eaku olemeibelekeny enatejo; nchoo ninye eas te risioroto e ina pooki naimua enkutuk enye.

³Aashu te nenya enkitok olmumai te nkaraki Olaitoriani, neen kewan enye teina bae natejo, ina kata eton etii enkaji e papaai lenye, te kitisho enye,

⁴nening menye ilo mumai lenye o ina natejo ninye, nateenie ninye kewan, nemejoki ninye ae, ore ilo mumai lenye pooki neunoyu. Ore pooki natejo ninye aen kewan neunoyu.

⁵Kake te neany menye enyorraa ilo mumai ina olong apa pee ening, nemeitoki atii olmumai te ninye, nemetii eenata e kewan nauno, naa kepaliki Olaitoriani ninye te nkaraki naa menye otomitikio ninye.

⁶Naa te neyami ina kata eton etii eenata eilo mumai lenye, aashu nena kirorot e nkutuk enye naateenie ninye kewan,

⁷nening olpayian lenye ina, neitu ejoki ae ina kata pee ening, ore naa ilo mumai lenye naa keuno, ore nena baa enyena naateenie kewan naa keunoyu.

⁸Kake ore teina olong apa natoning'o olpayian lenye, neany ninye enyorraa, neitaa naa parmetii ilo mumai lenye apa oinosa, o nena kirorot e nkutuk enye, apa naa ninche eteenie kewan. Naa kepaliki Olaitoriani ninye.

⁹Kake ore pooki mumai le nkoliai, aashu le nkitok natung'uayie olmoruo lenye, ore ake ninye entoki nateenie kewan, naa keitalakuni te ninye.

¹⁰Naa te nenya ninye olmumai tiatua enkaji olpayian lenye, aashu een kewan enye to lmumai,

¹¹nening olpayian lenye ina, neitu ejoki ninye ae, neitu erishie ninye; ore ilo mumai lenye pooki naa keunoyu, ore enkiroroto ake pooki nateenie ninye kewan naa keunoyu.

¹²Kake te neitaa olpayian lenye ilo mumai parmetii neitaa pesho ina olong apa pee ening, neaku naa, ore embae pooki naimu enkutuk enye naipirta olmumai lenye aashu naipirta ina enata e kewan nemelo aunoyu; eitaa olpayian lenye pesho, naa kepaliki Olaitoriani ninye.

¹³Ore olmumai pooki o enata olmumai nainosie oltung'ani kewan osina, keidim olpayian lenye atuuno, aashu eidim aitaa parmetii.

¹⁴Kake te nemejoki olpayian lenye ae te nkolong ake ninye, neitubulaa naa ilo mumai le nkitok enye, o nena pooki naatejo ninye aenie kewan, nena naatii shumata ninye; eitubula ninye ninche te nkaraki neitu ejoki ae ina olong apa naning nena baa.

¹⁵Kake te neitaa olpayian nena baa pesho neitaa parmetii eidipa ninye atoning'o, nenap naa ninye eng'oki e nkitok enye.”

¹⁶Kuna ninche inkitanapat naaitanapa Olaitoriani Musa, naaipirta olee o enkitok enye, olpayian o entito enye, te lelero enye, eton etii enkaji e papaai lenye.