Read Maasai Bible – Biblia Sinyati Enkikena 31 Bible Online

Enkikena 31 - Maasai Bible – Biblia Sinyati bible

Enkikena 31

²“Intalaku elap oo ltung'ana le Israel too ltung'ana le Midian; ore te siadi ina naa ilo iyie eneiturrurrore iltung'ana linono apa ootuata.”

³Nejoki Musa olorere, “Enterreten iltung'ana tiatua intae oopuo enjore pee etum aashom aataarare iltungana le Midian, pee eitalaku elap o Laitoriani te Midian.

⁴Irriwai ilewa enkalifu nabo ake to losho pooki le Israel pee epuo enjore.”

⁵Neaku eishoruaki apa kulo lewa, ooing'uaa lelo oora inkalifuni le Israel, oing'uaa ake enkalifu nabo olosho obo, nenapa lelo oora inkalifuni tomon o are aapuo enjore.

⁶Neirriwaa Musa ninche meshomo enjore eing'uaa ake enkalifu nabo olosho obo, te nebo Finehas olayioni le Eliesa ilo apolosani, tenebo nena masaa eine wueji sinyati, neeta te nkaina enye esekekua naosh.

⁷Nearare ninche iltung'ana le Midian anaa enaitanapa Olaitoriani Musa, near metua olee ake ninye pooki.

⁸Near metuata ilaiguanak le Midian te nebo lelo kulikae ootasesekuanaki: Efi o Rekem o Surian o Hur o Reba lelo aiguanak imiet te Midian neitoki sii aasesekuan Balaam olayioni le Beor to lalem.

⁹Ore lelo tung'ana le Israel neraya nena kituaak e Midian o nkera enye; neraya sii inkishu enye pooki, o nkerrai o ntokitin enye pooki.

¹⁰Ore inkanas enye pooki too wuejitin neemanya o lng'oborri lenye pooki, nepejoo te nkima,

¹¹neya nena pooki naataarutua, aa iltung'ana o nkishu.

¹²Neyau lelo o yarunot o masaa naaruno enetii Musa o Eliesa ilo apolosani o ina umata oo ltung'ana le Israel, te lelo ng'oborri ootii enkisiashata e Moab te mbata o lkeju le Yordan te netaaniki Yeriko.

¹³Ore Musa o Eliesa ilo apolosani o lelo arikok pooki le ina umata, neipang aapuo aanang'are ina jore ti auluo.

¹⁴Netagorokine apa Musa lelo kituaak le njore, lelo arikok loo nkalifuni o lelo arikok loo maa iip, ooetuo eing'ua enjore.

¹⁵Nejoki Musa ninche, “Itapala intae inkituaak pooki eishu?

¹⁶Kuna apa naaishoo iltung'ana le Israel, te nkiteng'enare e Balaam metogolong'aki Olaitoriani, teina bae e Peor, neaku eewuo olmeitai atua eumata o Laitoriani.

¹⁷Ore naa taata entaar pooki lee tiatua nena kera kutiti metua, niariara pooki kitok nataboitare olee metua.

¹⁸Kake ore nena silan pooki kutiti neitu ai kata eboitare olee entapal eishu metaa inkuninyi.

¹⁹Nchoo etoni ti auluo inkolong'i naapishana; pooki ng'ae ake ninye linyi otasesekuana oltung'ani o pooki ng'ae oiseyie olmeneng'ani, entisinya ate o lelo yarunot linyi te nkolong e uni o te nkolong e naapishana.

²⁰Entisinya enkila ake pooki o pooki toki o lchoni o pooki toki naitobiraki too lpapit loo nkineji o pooki toki naguetuno te nchata.”

²¹Nejoki Eliesa ilo apolosani lelo tung'ana ooshomo enjore: “Ena ninye enkikoo e ina kitanapata naitanapa Olaitoriani Musa:

²²saabu ake o enkosholai o suyai o esekenkei o empirbil o ntokitin naaikununo neijia,

²³Ore pooki toki nemenya enkima, niimiemie atua enkima naa kesinyayu ninye asidanu. Ore ake etiu neijia, keitukui sii te nkare e nkitisinyata, ore pooki toki nemepikayu enkima, niimiemie atua enkima.

²⁴Entukuo ilkilani linyi te nkolong e naapishana, niakuku taa sidain; ore te siadi ina nipuonunu taa atua ilng'oborri.”

²⁵Nejoki Olaitoriani Musa,

²⁶“Nkena nena tokitin naataaruaki, aa iltung'ana o aa nchoo, iyie o Eliesa ilo apolosani o lukuny oo nkajijik oo loo menye e ina umata;

²⁷nior nena naataaruaki katitin are, aoriki lelo murran apa ooshomo enjore o e umata pooki.

²⁸Neitalaki iltungana le njore o Laitoriani kodi naing'uaa lelo tung'ana le njore ooshomo enjore, obo ake tiatua iip imiet, too ltung'ana o too lmong'i o too sirkon o too nkerrai;

²⁹intayu olpisiai lenye nincho Eliesa ilo apolosani pee eaku olasar to Laitoriani.

³⁰Ore to lpisiai loo Siraeli loo ltung'ana, le nena tokitin ntayu nabo tiatua onom ake ninye, too ltung'ana o too lmong'i o sirkon o too nkerrai o too nchoo pooki, ninchosho ninche ile Lawi laa ninche ooing'or olng'obor lo Laitoriani.”

³¹Neas Musa o Eliesa ilo apolosani anaa enaitanapa Olaitoriani Musa.

³²Ore apa nena yarunot naatelekutua naawaita lelo tung'ana le njore naa nkerra inkalifuni iip ile o ntomoni naapishana o imiet,

³³o nkishu inkalifuni intomoni naapishana o are

³⁴o isirkon inkalifuni intomoni ile o obo,

³⁵o ltung'ana inkalifuni tomoni uni o are o nkituaak neitu ai kata eboitare olee.

³⁶Ore ilo pisiai leina rubata e le lelo apa ooshomo enjore, ore esiana enye naa nkerra inkalifuni iip uni o tomoni uni o opishana o iip imiet,

³⁷ore elaakinoto o Laitoriani naa nkerra iip ile o ntomoni naapishana o imiet.

³⁸Ore nkishu naa inkalifuni tomoni uni oile, ore te kuna naa intomoni naapishana oaare elaakinoto o Laitoriani.

³⁹Ore isirkon naa inkalifuni tomoni uni o iip imiet, ore te kuna naa intomoni ile o obo elaakinoto o Laitoriani.

⁴⁰Ore iltung'ana naa inkalifuni tomon o ile, ore erubata o Laitoriani naa iltung'ana tomoni uni o are.

⁴¹Neishooyo Musa ina laakinoto, naa ninye olasar to Laitoriani, neisho Eliesa ilo apolosani, anaa enaitanapa Olaitoriani Musa.

⁴²Ore inaaing'uaa ilo pisiai te nkalo oo ltung'ana le Israel apa naategelayie Musa aitung'uaa ine, lelo tung'ana apa ooshomo enjore

⁴³ore apa olpisiai le nena teina umata naa nkerra inkalifuni iip uni o tomoni uni o opishana o iip imiet (337,500),

⁴⁴o nkishu nkalifuni tomoni uni o ile (36,000),

⁴⁵o sirkon inkalifuni tomoni uni o iip imiet (30,500),

⁴⁶o ltung'ana inkalifuni tomon o ile (16,000).

⁴⁷Ore inaaing'uaa ilo pisiai loo ltung'ana le Israel neya Musa nabo te pooki onom, aa too ltung'ana o too nchoo, neisho ninche lelo le Lawi ooing'or olng'obor lo Laitoriani; anaa enaitanapa Olaitoriani Musa.

⁴⁸Neitoki lelo kituaak ooitasheiki inkalifuni e njore o lelo arikok loo nkalifuni o lairikok le lelo maa iip aapuonu aanyikaki Musa,

⁴⁹nejoki ninche Musa, “Eikena isinkan linono lelo tung'ana le njore ootii abori erikore ang, nemetii oltung'ani oiwuang'a te yiook.

⁵⁰Nikiyautua iyiook olasar lo Laitoriani, entoki ake ninye nanoto oltung'ani, ntokitin e saabu, ilkataarri o mankek o ilgiso o sakankarri o saen, pee kipuonu aaitobiraki ate osotua lo lning'o te dukuya Olaitoriani.”

⁵¹Ore Musa o Eliesa ilo apolosani neng'amaa te ninche ina saabu pooki apa naitaaki imasaa.

⁵²Ore ina saabu pooki oo nkishoorot naishoo ninche Olaitoriani, eing'uaa lelo arikok le lelo oora nkalifuni le njore o lelo le maa iip naa shekeli inkalifuni tomon o ile o iip naapishana o onom.

⁵³(Ore apa lelo tung'ana le njore newaita nena naataarutua ewa ake oltung'ani inenyena.)

⁵⁴Ore Musa o Eliesa ilo apolosani neng'amaa ina saabu te lelo arikok le njore loo nkalifuni o loo maa iip neyau atua ilo ng'obor le ntumo, pee eaku entoki nadamuni too ltung'ana le Israel te dukuya Olaitoriani.