Read Maasai Bible – Biblia Sinyati Enkikena 35 Bible Online

Enkikena 35 - Maasai Bible – Biblia Sinyati bible

Enkikena 35

¹Nejoki Olaitoriani Musa too nkisiashat e Moab, te mbata o lkeju le Yordan, etalita Yeriko,

²“Intanapa iltung'ana le Israel, nchere pee eisho ile Lawi enjung'ore naaku enenye, inkanas naapuo aamany; nincho sii lelo le Lawi indaat oo nchoo naamanita nena anas.

³Ore nena anas naa nkunenye naamany, ore nena daat oo nchoo naa inoo nkishu enye o masaa enye o enoo ng'uesi enye.

⁴Ore nena daat oo nchoo e nena anas nipuopuo intae aaisho ile Lawi, inchoo ebaiki esuntai e nkanasa neito idia alo nelo iroruat iip ong'uan o onom too nkaloli pooki.

⁵Entetem auluo enkanasa, ore te nchoto o loosaen naa iroruat inkalifuni are, ore te nchoto e kopikop naa iroruat inkalifuni are, ore te nkalo o loo ntoluo naa iroruat inkalifuni are, ore nchoto e moikuape naa iroruat inkalifuni are, neaku ina anasa naitorit, keaku ena enenye, nairritishore too nkanas enye.

⁶Ore inkanas nilo iyie aisho ile Lawi, nera ile naa nena anas naasaruni naa ninche inchosho oltung'ani oitayu loikop metasaru, ore te nebo nena ipuopuo intae aaishooyo inkanas artam o are.

⁷Ore nena anas pooki nipuopuo intae aaisho ile Lawi naa artam o isiet te nebo ndaat enye oo nchoo.

⁸Naa ore te nena anas nipuopuo intae aaishooyo naaing'uaa imasaa oo ltung'ana le Israel, ore to losho kitok niyaya inkumok, ore to losho oti niyaya inkuti; olosho ake te risioroto e njung'ore natujung'o ninye, neisho ake nkanas enyena ile Lawi.”

⁹Neitoki Olaitoriani ajoki Musa,

¹⁰“Tiaaki iltung'ana le Israel, te nipuopuo aalang olkeju le Yordan aapuo enkop e Kanaan,

¹¹nigelulu naa inkanas naaku inkanas naasaruni te nkaraki intae, pee etum pooki ng'ae oitayu iloikop, eitu eotiki atasaru.

¹²Ore nena anas naa keaku te intae inaasaruni te nkaraki ilo oitalaku elap, pee meari ilo otasesekuanishe metua o metaba anaa neitashe te dukuya eumata pee eiguanareki.

¹³Ore nena anas ninchooyoyo naa nena anas inyi ile naasaruni.

¹⁴Enchoru inkanas uni te lido kekun lo lkeju le Yordan, o nkanas uni te nkop e Kanaan naaku nkanas naasaruni.

¹⁵Ore kuna anas pokira ile naa keaku inaasaru iltung'ana le Israel o ilo omoni o ilo otamanyishe tiatua ninche, pee etum pooki ng'ae oitayu loikop, eitu eotiki atasaru.

¹⁶“Kake te neosh oltung'ani olikae to sekenkei, neaku etua ilo, naa oloo loikop ninye; ore ilo oitayio iloikop naa keari metua.

¹⁷Naa te nenang ninye olikae to soit oata te nkaina neaku etua ilo tung'ani, naa oloo loikop ninye; ore oltung'ani oitayu iloikop naa keari metua.

¹⁸Aashu te neosh ninye olikae te nchata naibung'ita te nkaina, naidim ataara oltung'ani metua neaku etua ilo, netaa ninye oloo loikop; ore oltung'ani oitayu iloikop neari ninye metua.

¹⁹Ore ilo oitalaku osarge ninye makewan oar ilo oitayio iloikop metua; te nenang'are ninye near ninye metua.

²⁰Naa tenerem oltung'ani olikae te nkaraki enkiba, anaa eipony ninye, aashu etarresho ninye, neaku etua,

²¹aashu ore te mang'atisho neosh ninye te nkaina enye, neaku etua ilo, ore naa ilo otooshishe neari ninye metua; oloo loikop ninye; ore ilo oitalaku osarge near ilo oitayio loikop metua, te nenang'are ninye.

²²“Kake tenetaremo ninye nabo kata to lbuket metii mang'atisho, aashu enang ninye ti ae toki eitu eresh aanyu,

²³anaa easishore osoit oidim atara oltung'ani metua, neaku etua ilo tung'ani, hoo duoo neme olmang'atinta lenye, nemeyieuaki duoo entorroni,

²⁴neiguanare naa ina umata ilo oitayio loikop o ilo oitalaku osarge te risioroto e kuna kikoot.

²⁵Ore ina umata nekordu ilo oitayio iloikop te nkaina e ilo oitalaku osarge, ore ina umata nepik ninye atua ina anasa enye nasaruni, naa ninye elo aisikaki, nelo ninye aton teine o metaba anaa neye ilo apolosani kitok apa otubukokoki eilata nasinya aaput.

²⁶Kake te nelo ilo tung'ani oitayio iloikop, te nkata ake ninye pooki agiroo ilpolosien le ina anasa enye nasaruni, apa naa ninye eisikaka,

²⁷ore ilo oitalaku osarge neinepu ninye ti oriong ilpolosien le ina anasa enye nasaruni, near ilo oitalaku osarge ilo oitayio iloikop, nemeeta entioto o sarge.

²⁸Amu meeta inchere meton ilo tung'ani tiatua ina anasa enye nasaruni o metabau keeya o lapolosani kitok; kake ore te siadi keeya o lapolosani kitok neidim ilo tung'ani atorrinyoyu ashomo enkop enye.

²⁹“Ore kuna baa naa keaku enkitanapata o endung'oto e nkiguana te intae, too iishoritin inyi pooki o tiatua emanyisho inyi pooki.

³⁰Te near oltung'ani ake olikae metua, ore ilo oitayio iloikop neari metua te shakenisho oo lchakenini; kake meetae oltung'ani oari metua te shakenisho olchakeni obo.

³¹Ore ake eyia, eming'amaa intokitin e lakunoto e nkishui e ilo oitayio iloikop, oata enkitarruoroto e keeya; kake keari ninye metua.

³²Niming'amaa entoki e lakunoto e ilo oisikaka enkanasa enye nasaruni, pee etum ninye atorrinyoyu alo aton teina kop te dukuya keeya o lapolosani kitok.

³³Emisarkionie naa ena kop nitii; amu keisarkionie osarge enkop, nemeetae entoki naitobiri naidim aipoo, amu ore ilo sarge otubukokine enkop, meteleku ake osarge le ilo oibukoyie.

³⁴Emisarkionie naa ena kop nimanyanya naa ninye sii nanu atii atua; amu ore nanu Olaitoriani namanya atua iltung'ana le Israel.”