Read Maasai Bible – Biblia Sinyati Enkikena 4 Bible Online

Enkikena 4 - Maasai Bible – Biblia Sinyati bible

Enkikena 4

²“Inkena esiana oo layiok le Kohat, tirishu tiatua ilayiok le Lawi, anaa too lmareita lenye o too nkajijik oo loo menye,

³ebaiki ilarin tomoni uni o metabaiki ilarin onom, lelo pooki ooidim aatijing enkisiaayiare, pee easisho tiatua ilo ng'obor le ntumo.

⁴Ena ninye enkisiaayiare oo layiok le Kohat tiatua ilo ng'obor le ntumo: nena tokitin naasinya oleng.

⁵Te nedotuni ilng'oborri, nejing Aron o layiok lenyena atua olng'obor aaitayu olkarasha lo lodung'oro, neimulumul ilo sanduku le shakenisho te ninye;

⁶neitoki aapik shumata ninye enkimulumulet e ndapana e nkine, neisalaashaki shumata ina kila pus alak, neitokini aapik nkeek enyena.

⁷Ore enchumata e ina misa o emukate naishori Enkai neisalaashaki ninche enkila pus, neiteleiki shumata ninye isaanini o masaa e nkorropil o embakuli o nkikompeni te nkaraki ilo asar ooki; ore sii nena mukateni e anaake netii shumata ina misa;

⁸neitoki aaisalaashaki shumata ninche enkarasha sintet, neitoki aaimulumulaki shumata endapana e nkine, nepik nkeek enyena.

⁹Neitoki ninche aaya enkarasha pus, neimulumul ina kitashet o ltaa te nkaraki ewang'an, te nebo iltaai lenyena o ltoneta loo ltaai o mbakulini enye o masaa pooki e ilata naapikieki.

¹⁰Nepik ninche te nebo imasaa enyena pooki neimulumuli te ndapana e nkine nepiki ninye shumata nkeek enyena naanapieki.

¹¹Ore shumata ilo perere lo lasar oitobiruno te saabu neisalaashaki enkarasha pus, neimulumul shumata ninye te ndapana e nkine, neitokini aapik nkeek enyena.

¹²Neitoki ninche aaya nena masaa pooki e nkisiayiare naasishoreki tiatua ine wueji sinyati; nepik ninche atua enkila pus, neitoki aaimulumul ninche te ndapana e nkine, neiteleiki ninche nkeek enyena naanapieki.

¹³Neitoki ninche aaitayu inkuruon to lperere lo lasar, neisalaashaki ninche enkarasha sintet;

¹⁴neiteleiki shumata ninye nena masaa pooki o lperere lo lasar, naa ninche easishoreki te nkisiaayiare teine o motioo e nkima o njipeta o lkurteta, o mbakulini, nena masaa pooki o lperere lo lasar; neisalaashaki shumata ninche nena endapana e nkine, neisuroki nkeek enyena.

¹⁵Naa ore ake pee eidip Aron o layiok lenyena aaimulumula ine wueji sinyati o nena masaa pooki e wueji sinyati, ina kata edumuni ilng'oborri, neitoki ilayiok le Kohat aapuonu aanap kuna, kake meibung ninche nena tokitin sinyat, pee meye ake. Kuna ninche intokitin e ilo ng'obor le ntumo naa ninche enap ilayiok le Kohat.

¹⁶“Ore Eliesa olayioni le Aron ilo apolosani neitasheiki eilata oo ltaai o enkorropil, ilo asar le ntapa li anaake o ina ilata naputishoreki o enkitasheikinoto pooki eilo ng'obor le Nkai o nena pooki naatii atua o ine wueji sinyati o masaa enyena.

¹⁷“Nejoki Olaitoriani Musa o Aron,

¹⁸Mincho olosho loo lmareita le Kohat eimisieki aaiwuang'ie too le Lawi;

¹⁹kake entaasa ninche ena pee etum ninche aatopok nemeye te nepuonu aanyikaki nena tokitin naasinya aaisul: inchoo elo Aron o layiok lenyena atua olng'obor negelaki ake oltung'ani esiaai enye o lola lenye,

²⁰kake mejing ninche atua aapuo aaing'or nena tokitin naasinya hoo te nkata ninye nabo, pee meye ake.”

²¹Nejoki Olaitoriani Musa,

²²“Inkena sii esiana oo layiok le Gershon, too lmareita lenye o too nkajijik oo loo menye;

²³ebaiki ilarin tomoni uni o metabaiki ilarin onom, inkena ninche, lelo pooki ooidim aatijing enkisiaayiare, pee easisho tiatua ilo ng'obor le ntumo.

²⁴Ena ninye enkisiaayiare oo lmareita loo le Gershon, te nkisiaayare o te napata oo lolan:

²⁵kenap ninche ilkarash lo lng'obor le Nkai, o lng'obor le ntumo te nebo enkimulumulet enye o enkimulumulet e ndapana e nkine natii shumata ninye o enkikenet e kutuk aji e ilo ng'obor le ntumo

²⁶o nkisiong'at o lgoriet o enkikenet e ine nejing'ieki olgos lo lgoriet omanita ine wueji sinyati o lperere lo lasar o nkeenta enyena o masaa pooki e nkisiaayiare; naa keas ninche nena pooki naaishiaakinore ninche neas.

²⁷Ore esiaai pooki oo layiok loo le Gershon naa Aron o layiok lenyena ooitasheiki teina pooki napuo ninche aanap.

²⁸Ena ninye enkisiaayiare oo lmareita loo layiok le Gershon tiatua ilo ng'obor le ntumo, ore esiaai enye naa keaku abori enkitasheikinoto e Ltamar olayioni le Aron ilo apolosani.

²⁹“Ore tialo ilayiok le Merari nkena ninche anaa too lmareita lenye o too nkajijik oo loo menye;

³⁰ebaiki ilarin tomoni uni neilep o metabaiki ilarin onom. Inkena pooki ng'ae ake ninye oidim enkisiaayiare, pee eas esiaai tiatua ilo ng'obor le ntumo.

³¹Naa ena apa eitanapaki ninche metaasa, anaa esiaai enye pooki tiatua ilo ng'obor le ntumo; nena rubat oo sunta o lng'obor le Nkai, te nebo inkeek enyena, ing'apeta o ntoneta

³²o ng'apeta e ilo goriet omanita te nebo intoneta o ncheito o nkeenta te nebo imasaa enyena pooki o ntelon enyena pooki. Nioriki aipotoki nena masaa naaishiaakino ninche nenap.

³³Ena ninye enkisiaayiare oo lmareita loo layiok le Merari, ninye enkisiaayiare enye nalulung'a tiatua ilo ng'obor le ntumo ti abori enkitasheikinoto e Ltamar olayioni le Aron ilo apolosani.”

³⁴Neitoki Musa o Aron o larikok lo lturrur aaiken ilayiok le Kohat, anaa too lmareita lenye o too nkajijik oo loo menye,

³⁵ebaiki ilarin tomoni uni, pooki ng'ae ake ninye oidima enkisiaayiare, pee eas esiaai tiatua ilo ng'obor le ntumo.

³⁶Ore esiana enye anaa too lmareita lenye naa inkalifuni are o iip naapishana o onom.

³⁷Ena apa ninye esiana oo lmareita loo le Kohat, lelo pooki ooisiaaisho tiatua ilo ng'obor le ntumo, laa ninche eikena Musa o Aron te risioroto e nkitanapata naitanapa Olaitoriani Musa.

³⁸Ore esiana oo layiok le Gershon, anaa too lmareita lenye o too nkajijik oo loo menye,

³⁹ebaiki ilarin tomoni uni o metabaiki ilarin onom, pooki ng'ae oidim atijing'a enkisiaayiare aisiaaisho tiatua ilo ng'obor le ntumo.

⁴⁰Ore esiana enye anaa too lmareita lenye o too nkajijik oo loo menye naa inkalifuni are o iip ile o tomoni uni.

⁴¹Ena ninye esiana oo lmareita loo layiok le Gershon, lelo pooki apa ooisiaaisho tiatua ilo ng'obor le ntumo, laa ninche eikena Musa o Aron te risioroto e nkitanapata o Laitoriani.

⁴²Ore esiana oo lmareita loo layiok le Merari, anaa too lmareita lenye o too nkajijik oo loo menye,

⁴³ebaiki ilarin tomoni uni o metabaiki ilarin onom, pooki ng'ae ake ninye oidim atijing'a enkisiaayiare, pee eas esiaai tiatua ilo ng'obor le ntumo,

⁴⁴ore esiana enye anaa too lmareita naa inkalifuni uni o iip are.

⁴⁵Kulo ninche lelo apa ooikenaki too lmareita loo layiok le Merari, ooikena Musa o Aron te risioroto e nkitanapata naitanapa Olaitoriani Musa.

⁴⁶Ore lelo pooki ooikenaki too le Lawi, laa ninche eikena Musa o Aron o Larikok le Israel, anaa too lmareita lenye o too nkajijik oo loo menye,

⁴⁷ebaiki ilarin tomoni uni neilep ometabaiki ilarin onom, pooki ng'ae ake ninye oidim atijing'a enkisiaayiare neasisho anap ilolan tiatua ilo ng'obor le ntumo,

⁴⁸ore lelo lenye ooikenaki naa nkalifuni isiet o iip imiet o ntomoni isiet.

⁴⁹Ore te risioroto e nkitanapata o Laitoriani naimua Musa negeluni ninche, oltung'ani ake te siaai enye e nkisiaayiare aashu te napare; kaae neiken ninye ninche aiko neijia, anaa enaitanapa Olaitoriani Musa.