Read Maasai Bible – Biblia Sinyati Enkikena 5 Bible Online

Enkikena 5 - Maasai Bible – Biblia Sinyati bible

Enkikena 5

¹Nejoki Olaitoriani Musa,

²“Intanapa iltung'ana le Israel pee eipang'ie tiatua ilng'oborri pooki ng'ae ake ninye oata enkeeya oolbolot o pooki ng'ae oata olbae loo nkimek o pooki ng'ae lemesinya oiseyie oltung'ani otua;

³impang'ie pokira, olee o eng'oruoi. Tipika ninche auluo ilng'oborri, pee meisarkionie ilng'oborri lenye, laa empolos enye ninye emanyisho ai.”

⁴Neas ina iltung'ana le Israel, neipang'ie ninche too lng'oborri meshomo auluo; ore anaa enatiaaka Olaitoriani Musa, ina etaasa iltung'ana le Israel.

⁵Neitoki Olaitoriani ajoki Musa,

⁶“Tiaaki iltung'ana le Israel Te neas olee aashu enkitok pooki ng'oki ake ninye naas iltung'ana aagil enkirukoto to Laitoriani, neaku ilo tung'ani olarruoni,

⁷nelimu ninye aibalunye ina ng'oki nataasa, neitobir ninye elaata nalulung'a teina kitarruoroto enye, aponaa erubata e imiet teina, neisho ilo laa ninye einyala.

⁸Kake te nemeeta oltung'ani iltung'ana lenye ooidimi aatalaaki teina kitarruoroto, ore ina laakinoto neaku eno Laitoriani te nkaraki olapolosani neponikini ilo ker lo lning'o lo sotua laa ninye eitobirakinyeki ninye olning'o lo sotua.

⁹Ore inkishoorot pooki o ntokitin pooki naasinya oo ltung'ana le Israel, nena naayaki ninche ilo apolosani neaku inenyena;

¹⁰o ntokitin naasinya e pooki tung'ani ake ninye neaku inolapolosani; ore pooki toki naba anaa enaisho oltung'ani olapolosani neaku enenye.”

¹¹[1] Neitoki Olaitoriani ajoki Musa,

¹²“Tiaaki iltung'ana le Israel, te nelo nepong'ori enkitok e likae moruo ake ninye, neas emamalisho tialo ninye,

¹³te nelo neboitare olee ninye, neisudori ina bae too nkonyek o lmoruo lenye, neaku mejurrunoyu hoo neinosie kewan olduruk, nemeetae olchakeni oishakenoki ninye, amu eitu eibung'akini ina bae;

¹⁴naa te nelotu oltau lo lom shumata ilo lmoruo, netum olom tialo ina kitok enye natipika kewan olduruk; aashu te nelotu oltau lo lom shumata ninye, netum ninye olom tialo ina kitok enye hoo neitu ninye einosie ina kitok kewan olduruk.

¹⁵Inchoo naa eriku ilo lee ina kitok enye enetii olapolosani, neyau enkishooroto naipirta ina kitok, erubata e tomon e efa e ntapa napuyiapui; nemebukoki ninye eilata shumata ina tapa nemepik enkorropil, amu olasar le ntapa lo lom ilo. Olasar le ntapa le ndamunoto, odamunyeki entorroni.

¹⁶“Neyau olapolosani ina kitok aitinyiku, nepik ninye dukuya Olaitoriani,

¹⁷neitoki olapolosani ayau enkare nasinya te moti oo nkulupuok, neya enkiti terit to ltiren le ina aji e Nkai nepik atua ina are.

¹⁸Nepik ilo apolosani ina kitok dukuya Olaitoriani, nelak ilpapit le ndukuya enye, nepik inkaik enyena ina tapa o lasar le ndamunoto, aa ninye o lasar le ntapa lo lom. Ore te nkaina enye neibung olapolosani ina are e nduaran naa ninye nayau oldeket.

¹⁹Neinosie taa olapolosani ina kitok olmumai, ejo, ‘Te nemeetae olee litaboitare, naa te neitu iyie imbelekenya aibelekenyakino olduruk, eton itii abori enkitoria o lmoruo lino, talakunoyu iyie tena are nadua nayau oldeket.

²⁰Kake ti nitapong'ori iyie hoo nitii abori enkitoria o lmoruo lino, naa ti ninosie kewan olduruk neaku kitaboitare likae lee leme lmoruo lino,’

²¹(inchoo naa olapolosani einosie ina kitok olmumai lo ldeket, nejoki ina kitok), ‘Kintaa iyie o Laitoriani oldeket o lmumai tiatua iltung'ana linono, ti nikincho Olaitoriani meibibiari enkupes ino neiteijia osesen lino;

²²metaa ore ena are nayau enduaran, inchoo elo atua enkoshoke ino, neiteijia osesen lino neibibiaa enkupes ino.’ Nejo ina kitok, ‘Eesai, Eesai.’

²³“Neitoki olapolosani aiger kulo deketa tiatua embuku, nejut ninche teina are e nduaran,

²⁴neitook ninye ina kitok ina are e nduaran nayau oldeket, ore ina are nayau oldeket nelo atua ninye nepik ninye emion kitok.

²⁵Neitoki olapolosani aya ilo asar le ntapa otii enkaina e ina kitok, neyuk ilo asar le ntapa te dukuya Olaitoriani neitoki ayau enchumata o lperere lo lasar.

²⁶Neitoki olapolosani aya emborei e nkaina e ilo asar le ntapa anaa erubata enye nadamuni, nepej ninye te nchumata o lperere lo lasar; ore te siadi neitoki aitook ina kitok enkare.

²⁷Ore ake pee eidip aitooko ina kitok enkare, te nelo ninye neaku einosie kewan olduruk neas emamalisho tialo olmoruo lenye, ore ina are nayau oldeket nejing atua ninye nepik emion kitok, nejeyu osesen lenye neibibiari enkupes enye, neaku ina kitok oldeket tiatua iltung'ana lenyena.

²⁸Kake te neitu einosie ina kitok kewan olduruk metaa meeta ninye entioto, nelakunoyu ninye naa keiu inkera.

²⁹“Ena ninye enkitanapata too mbaa naatii olom, te nelo enkitok natii abori enkitoria o lmoruo lenye aimalimal neinosie kewan olduruk.

³⁰Aashu te nelotu oltau lo lom shumata oltung'ani netum ninye olom tialo enkitok enye; nepik ninye ina kitok dukuya Olaitoriani, nedung'oki olapolosani enkiguana tena kitanapata pooki.

³¹Inchoo olee eton meeta entioto kake ore enkitok keitalaki entorroni enye.”