Read Maasai Bible – Biblia Sinyati Enkikena 8 Bible Online

Enkikena 8 - Maasai Bible – Biblia Sinyati bible

Enkikena 8

¹Neitoki apa Olaitoriani ajoki Musa,

²“Tiaaki Aron, ti nindip atipika iltaai inkitasheta, ore lelo taai oopishana neitawang dukuya ina kitashet oo ltaai.”

³Neiko neijia Aron; nepik ninye iltaai lenyena meitawang'a dukuya ina kitashet oo ltaai, anaa enaitanapa Olaitoriani Musa.

⁴Naa ena apa enkitobirunoto e ilo iket lo ltaa, naa saabu naidong'oki ebaiki entonata enye o metabaiki ntapuka enyena esiaai e nkidong'ore, te risioroto e ilo rrekie otuutaka Olaitoriani Musa. Neaku eitobirua ninye ilo iket.

⁵Neitoki Olaitoriani ajoki Musa,

⁶“Toriko ile Lawi intung'uai iltung'ana le Israel, nintisiny ninche.

⁷Naa neijia inkuna ninche, intukuo ninche, isuaaki ninche enkare e nkitisinyata, nebarn ninche iseseni lenye, neituku inkilani enye, neitisiny ate.

⁸Inchoo ninche eya oloti oing'oni o lasar lenye le ntapa napuyiapui naipurjaki te ilata, nintoki aya likae oti oing'oni oaku olasar le ng'oki.

⁹Niyau iyie lelo le Lawi meetu dukuya ilo ng'obor le ntumo, ninturrur ina umata pooki oo ltung'ana le Israel.

¹⁰Ore ake pee iyau lelo le Lawi dukuya Olaitoriani, ore iltung'ana le Israel, neiteleiki inkaik enye lelo le Lawi.

¹¹Neishooyo Aron ile Lawi te dukuya Olaitoriani pee eaku olasar oyuki oing'uaa iltung'ana le Israel pee eaku enenye enkisiaayiare o Laitoriani.

¹²Neitoki lelo Lawi aaiteleiki inkaik enye ilukuny e lelo oing'ok; nipolos iyie obo pee eaku olasar le ng'oki ore olikae neaku olasar opejori oishori Olaitoriani, pee eitobir osotua lo lning'o lo Laitoriani too le Lawi.

¹³Inchoo iyie ile Lawi meetu abori Aron o layiok lenyena, pee eishooyo ninche anaa olasar oyuki to Laitoriani.

¹⁴“Neijia inkuna nteng'ela ile Lawi ntung'uai atua iltung'ana le Israel, neaku ile Lawi ilaainei.

¹⁵Ore te siadi ine nepuo ile Lawi atua aaisiaaisho tiatua ilo ng'obor le ntumo, te nindip iyie aitukuo ninche ninchooyo ninche anaa olasar oyuki.

¹⁶Amu aaishooki nanu ninche tukul iltung'ana le Israel; te rishata oo lkikaunot pooki le Israel, ore ilkikaunot pooki loo ltung'ana le Israel aawa nanu makewan ninche.

¹⁷Amu ore ilkikaunot pooki loo ltung'ana le Israel naa ilaainei o lo ltung'ani o le ng'ues; ore apa teina olong nataara nanu metuata ilkikaunot pooki te nkop e Misiri aitisinyaka nanu ninche kewan,

¹⁸naawa nanu ile Lawi te rishata oo lkikaunot pooki tiatua iltung'ana le Israel.

¹⁹Naishooyie nanu ile Lawi anaa enkishooroto aisho Aron o layiok lenyena, aitung'uaa iltung'ana le Israel, pee eas enkisiaayiare te nkaraki iltung'ana le Israel tiatua ilo ng'obor le ntumo, neitobir osotua lo lning'o te nkaraki iltung'ana le Israel, pee mejing ake olmeitai[4] atua iltung'ana le Israel te nelo nenyikaki iltung'ana le Israel enkaji e Nkai.”

²⁰Ina apa eitaasa Musa o Aron o lturrur pooki loo ltung'ana le Israel ile Lawi; ore te risioroto e ina pooki naitanapa Olaitoriani Musa too naaipirta ile Lawi neitaas ninche iltung'ana le Israel ina.

²¹Neitisiny ile Lawi ate aalam ing'ok, neituku inkilani enye; neishooyo Aron ninche anaa olasar oyuki te dukuya Olaitoriani, neitobir Aron osotua lo lning'o te nkaraki ninche eituku ninche.

²²Ore te siadi ina nepuo ile Lawi atua aas enkisiaayiare enye tiatua ilo ng'obor le ntumo, aasisho ti abori Aron o layiok lenyena. Ore anaa enaitanapa Olaitoriani Musa too naaipirta ile Lawi ina ninye eitaasa ninche.

²³Neitoki Olaitoriani ajoki Musa,

²⁴“Kuna baa naaishiaakino too le Lawi: ore ebaiki ilarin tikitam o miet neilep, kepuo ninche aas enkisiaayiare tiatua ilo ng'obor le ntumo;

²⁵naa ore ebaiki ilarin onom neing'uaa ninche enkisiaayiare nemeitoki aaisiaaisho,

²⁶kake keisiaai ilalashera lenye tiatua olng'obor le ntumo, neibung iutarot, kake meisiaaisho ninche. Inji iyie ilo aaitaas ile Lawi arishaki isiaaitin enye.”