Read Maasai Bible – Biblia Sinyati Mika 3 Bible Online

Mika 3 - Maasai Bible – Biblia Sinyati bible

Mika 3

¹Atejo nanu: entoning intae ilukuny e Yakobo o larikok le nkaji e Israel! Aimeishiaakino intae niyiolouu esipata,

²intae ilooiba esupatisho ninyorrinyorro entorroni, intae ilooyieng iltung'ana laainei, nirishushu nkiri enye too loik lenye

³intae ilooinos nkiri oo ltung'ana laainei, nenang'aa ilonito lenye aaidie ninche, nigiligili iloik lenye aaitaa ng'iligilat, nigiligil anaa iloik oopiki emoti, netiu anaa nkiri naatii emoti.

⁴Neitoki ninche aaishiraki Olaitoriani, kake mewaliki ninye ninche; eisudoo ninye enkomom enye te ninche teina rishata, enkaraki naitaa ninche nkiaasin enye torrok.

⁵Nji ejo Olaitoriani tialo lelo oibonok ooitapong'oo iltung'ana laainei. Lelo ooishir aajo, “Eseriani” ina kata eeta ninche endaa nainos, neitayu olarrabal te ilo lemeeta endaa naisho meinosa.

⁶Ore enkaraki ina, kemutu te ntae nimintokiki aata nduaat nemisimisu te ntae nimintokiki aata nkitumusumusot. Kedoyio enkolong too loibonok, neman emisimisi ninche;

⁷ore lelo aduaak netusulaki, neitukurruni lelo aitumusumusok; kepuo pooki aaiken nkutukie enye, amu metii ewalata naing'uaa Enkai.

⁸Kake ore nanu, aaiputa engolon, o Enkiyang'et o Laitoriani, te sipata o te nkidimata, pee aibalakinye Yakobo enkitapong'oto enye, naibalekinye Israel eng'oki enye.

⁹Entoning ena, intae ilarikok le nkaji e Israel, intae ooibooyo esipata, nimbelekenyenye enkiguana nasipa.

¹⁰Ilo oshet Sion to sarge neshet Yerusalem te ntorroni.

¹¹Edung ilarikok lenye enkiguana te ropare, neiteng'enisho ilapolosak lenye te laakinoto, neibonisho iloibonok lenye too ropiyiani; eji neigarakino ake sii Olaitoriani ejo, “Aimetii Olaitoriani atua iyiook? Meetae entorroni nalotu shumata iyiook.”

¹²Ore naa te nkaraki iyie kepuoi aatur Sion anaa enkurma; keaku Yerusalem osototi le nkidaata; neaku ilo doinyo le nkaji entim.