Read Maasai Bible – Biblia Sinyati Nahum 2 Bible Online

Nahum 2 - Maasai Bible – Biblia Sinyati bible

Nahum 2

¹Kiewuo olainyalani arasaki iyie Ninawi, intagolo iltimito, ing'ura enkoitoi terretena empolos ino; enturrurro engolon inyi pooki.

²(Amu kerrinyu Olaitoriani enkishiaa e nkitoo e Yakobo. Anaa enkishiaa e nkitoo e Israel, amu eibung'a apa ilainyalak ninche, neinyal ilng'osil lenye.)

³Ore ina long'o oo ltung'ana lenye magil naa kenyokie, neishopito isikarini lenye nkilani pilei neiwuang ngarrin enyena oo mbartan anaa olng'ejep le nkima, teneipotuni olarrabal neitureisho lelo ookuetu.

⁴Neruko ngarrin oo mbartan too nkoitoi e nkanasa nepuo idia alo neitu ena alo too wuejitin neetumoreki e nkanasa. Neiwuang'u te nkimerlel anaa sitimani, neimerlel anaa nkiwuang'at e nchan.

⁵Neipotuni lelo kituaak, nerrorro ninche epuoito, nekuetiki ninche esuntai, neidipaki aaitoluaa iloketa.

⁶Etaboloki nchmito o lkeju neiput enkaji e nkitoo enkuretisho.

⁷Ore ina aiguanani enye, etooruoki ilkilani, etanapaki aaya, neishirita nkaisiayak enyena neishir anaa nturkuluoni, neoshiosh ilgooitie lenye.

⁸Eikununo Ninawi anaa olchorro oruko enkare enye neishir ninche aajo, “Ntasho! Ntasho!” Kake meetae olorrinyunye.

⁹Ewaita enkosholai! Ewaita saabu! Meeta olchumati eneiting'ie anaa karsisisho e pooki toki e tipat.

¹⁰Olmuaate! Emijoonisho o enkidaata! Etalepori iltauja, neikirikira nkejek, eiputa olkirutoto mpolosi enye pooki, neipusita nkomomi enye pooki!

¹¹Koree enkapune oo lng'atunyo ina apune oo lkuoo loo lng'atunyo ine neyau olng'atuny eng'ues nataara, ine netii nkiyioitin enyena nemeeta entoki naitanyamal?

¹²Eibung'a olng'atuny eng'ues nanya neyiataa ina ng'ues neyaki ilkuoo lenyena, negor ina meinosa iliponga enyena. Neiput enkapune enye ing'uesi naatara ninye neiput isanagi lenyena nkiri.

¹³Kaagilunore nanu iyie, Olaitoriani loo lororani ojo, naa kapejoo ngarrin inono oo mbartan te mpuruo nemut olalem lelo ng'atunyo linono ooti; Kaiwuang'ie nanu nena ng'uesi inono te nkop. Nemeigili aekata aaning oltoilo loo lkiliku linono.