Read Maasai Bible – Biblia Sinyati Nahum 3 Bible Online

Nahum 3 - Maasai Bible – Biblia Sinyati bible

Nahum 3

¹Woi ena anasa o sarge, ebore elejare o enkisima nemeiting aekata eyararoto enye!

²Entoning endarata e oshoto e nkeene, o ltoilo loo nkejek oo ngarrin enkuetata oo mbartan o elototo oo ngarrin oo mbartan!

³Ekuetu ilakedok loo mbartan, eimerlel ilalema neiwuang'u iremeta, olorora olo aye osototi loo mpopoki. Meeta eneiting'ie mpopoki enye nerrorro ninche te nena popoki enye!

⁴Ninawi! Itotiwuo iyie anaa emulayoi te nkaraki ina kiborrra oo nkonyek, nisakutisho niata esulare, nikaldaa iloshon te nkiborra oo nkonyek, nikaldaa iloreren too ntaleng'o inono.

⁵Ng'ura kaagilunore nanu iyie, Olaitoriani loo lororani ojo, naa kadumu nanu olkila lino lirrotianita apik enkomom ino, naisho nanu iloshon metoduaa emasipaisho ino, nedol nkitoriat enkurruna ino.

⁶Kaairriwaki nanu iyie olduruk naaitaas iyie mbaa e sulare, naitaa entoki torrono naing'asiakinoi.

⁷Ore lelo pooki liking'or iyie, nikilam ejo, “Etumute Ninawi; kaing'ae naishiraki ninye? Kaji nanu atumie iltung'ana ooitagol ninye?”

⁸Ira supat alang Tebes, apa natotona te mbata e Nail, neman enkare ninye, anaa enaiposha esuntai olpaashe lenye?

⁹Etiopia apa o Misiri engolon enye, nemeeta engolon enye enkiting'oto; Ilaretok lenyena apa ile Libia.

¹⁰Ore ake eyia etaarayioki ninye, neyae meshomo ninye eyararoto, ore nkera enyena neitaaki ndung'udung'ot, te nkiterunoto e pooki oitoi kitok, amu etooshoki enkukuo oo ltung'ana lenyena ooyanyiti, ore iltung'ana lenyena pooki kituaak eteenaki too lpisia.

¹¹Ilo sii iyie amera, ilo sii iyie aisudori, nilo aing'oru, enkisudoroto te nkaraki ilmang'ati.

¹²Ore isempewueti linono pooki, neikununo anaa ilng'abolo, ooto ilng'anayio le dukuya teneipiripiri, nerrarrunye, aadoiki enkutuk eilo onya.

¹³Ng'ura ilturrurri linyi ajo nkituaak naatii empolos inyi. Ore nchomito e nkop inyi naa kebolo aang'a too lmang'ati linyi, einosa enkima isekenke inyi.

¹⁴Entooku enkare enterreten emanata inyi, entagolo isempewueti linyi, enchom atua enterit entunyo esarng'ab, embung'a entobira enkitobirata oo lmatofali.

¹⁵Eikilo enkima anya teine, eikilo olalem ashurt nikimut iyie anaa olmaati. Entoponai ate anaa lmaat, entoponari anaa ntargeet!

¹⁶Itoponaiyie ilamirak linono aitulusoo too lakir le shumata. Eisalaash olmaati inaipuko nepuo.

¹⁷Eikununo ilkituaak linono anaa ntargeet neikununo ilaigerok linono pooki anaa emus o lmaat, neirragita too lpaashen te nkolong e nkirobi ore ake pee eilepu enkolong, nelaari aapuo; meetae oltung'ani oyiolo enetii ninche.

¹⁸Eirura ilairritak linono, lo aiguanani le Asiria; neimug iltung'ana linono kituaak. Eidapashate iltung'ana linono too ldoinyo, nemeetae oloiturrurr ninche.

¹⁹Meetae enkishiunoto too lbaa linono, aitorrono oleng olbae lino. Ore lelo pooki ooning mbaa inono, neosh nkaik te nkaraki iyie. Amu kaing'ae eitu ebaiki ina torroni ino nemeish aekata?