Read Maasai Bible – Biblia Sinyati Habakuk 1 Bible Online

Habakuk 1 - Maasai Bible – Biblia Sinyati bible

Habakuk 1

¹Olkilikuai lo Laitoriani ele otoduaa oloiboni le Nkai oji Habakuk.

²Iyie Olaitoriani, ke nkata nabaa aishir nanu te nkaraki eretoto, nimining iyie? Aishir nanu ajo, “olarrabal!”, Neitu iyie kintajeu?

³Kainyoo iyie pee kincho nanu matoduaa ntorrok, naing'or enyamali? Etii enkidaata o larrabal dukuya nanu; naatudumakine enyamali o enchankar.

⁴Etaa enkitanapata pesho nemeas aekata esipata esiaai amu etamuata iltorrok aaman lelo loo sipat, neaku keibelekenyi esipata.

⁵Ing'ura atua iloshon, pee idol; ning'asia nimputukuny. Amu aasita nanu esiaai too nkolong'i inyi, nimindimidimi intae aairuko tenelikini intae.

⁶Amu eng'ura, kailepunye nanu Ilkaldayo ilo osho odua neisosion, nelo aibulu enkop pooki, nepuonu aaya imanyishoritin neme nkunenye.

⁷Iltung'ana ooitureisho ninche; ore isipat enye o nkiguanat enye naa ninche maate epukunye.

⁸Eneneng mbartan enye aalang ilowuarak kerin, nepi aalang isuyian le nteipa; ore lakedok lenye loo mbartan nenyok oleng to lwuasa. Ee enelakua eing'uaa lakedok lenye loo mbartan, nepuo tiai anaa olkurragos oipirri alo anya eng'ues.

⁹Eetuo pooki te nkaraki olarrabal; neirut pooki ng'ae teina rasakinoto. Neiturrur ninche iyarunot anaa osinyai.

¹⁰Ore te dukuya ilaiguanak nesukenyisho ninche. Ore ilaitoriak neiguranie ninche. Ekueniyie ninche pooki sempewuet, amu kerup ninche enterit neya ine.

¹¹Nepuo ninche neor enkop epuo anaa olkutati, aapuo ninche eeta entioto, kulo tung'ana ooitaa engolon enye enkai enye.

¹²Aimira iyie oloo ntarasi, iyie Olaitoriani Enkai ai, lo Sinyati lai? Mikiye iyiook, Olaitoriani itegelua iyie ninche aitaa iladung'ok le nkiguana; ore iyie na dapidapoi, nintasheyie ninche pee eitameisho.

¹³Iyie oloata nkonyek sidain nemeidim aaing'ura entorroni nemeidim aaing'ura enkarruoisho, kainyoo iyie pee ing'or iltung'ana lemeisiligayu, nintirring'a iyie eijoo ilarruok, lelo supati aalang ninche.

¹⁴Amu ntotiu iyie iltung'ana anaa sinkir le naiposha, anaa nena tokitin naaikurtutari nemeeta oloitore.

¹⁵Eyau olmang'atinda ninche pooki to ltarge, neyietu ninche pooki to rreshet neiturruru ninche to rreshet lenye sapuk; netum taa atishipayu neitokoos.

¹⁶Ore te nkaraki ina eitayio ninye olasar te nkaraki orreshet lenye, nepej enkorropil te nkaraki orreshet lenye sapuk; amu te nkaraki ninche pee eishu ninye te sikar, nepir endaa enye.

¹⁷Keitayu ninye lelo ootii orreshet lenye, near ninye iloshon metuata nemeing'urrie ntarasi?