Read Maasai Bible – Biblia Sinyati Sefania 1 Bible Online

Sefania 1 - Maasai Bible – Biblia Sinyati bible

Sefania 1

¹Ele ororei lo Laitoriani oishooki Sefania olayioni le Kushi, olayioni le Gedalia, olayioni le Amaria, olayioni le Hesekia, too nkolong'i e Yosia ilo ayioni le Amon, olaiguanani le Yuda.

²“Kajutu nanu tukul pooki toki aiwuang'ie ti oriong enkop,” Olaitoriani ojo.

³“Kajutu nanu tung'ani o eng'ues; kajutu nanu aiwuang'ie ntaritik o loing'ang'e o sinkir le naiposha. Kanang'aa nanu aiturraa lelo torrok; kaishie nanu iltung'ana, aiwuang'ie ti oriong e nkop,” Olaitoriani ojo.

⁴“Kaitorioo nanu enkaina ai aarare Yuda, naarare sii lelo pooki oomanya Yerusalem; naa kaishie nanu aiwuang'ie tene wueji ilo pisiai le nkitanyaanyukoto e nkai naji Baal o ina arna e lelo apolosak ooserem nkitanyaanyukot;

⁵lelo ooirrugokino too nchumat oo nkajijik olorora le shumata; lelo ooirrugo neinosie Olaitoriani olmumai neitoki ake sii aainos olmumai te nkarna e nkai naji Milkom;

⁶lelo ooibelekenyate ootapala esujata o Laitoriani, lelo lemeing'oru Olaitoriani anaa eikilikuanishore ninye.”

⁷Ntirring'ayu te dukuya olaitoriani Enkai! Amu etataana enkolong o Laitoriani; eitobira Olaitoriani olasar neitisinya ilomon lenyena.

⁸Naa ore teina olong o lasar lo Laitoriani, “Kaitame nanu lelo kituaak o lelo ayiok lo laiguanani o lelo pooki ooishopote too nkilani oo loreren.

⁹Ore teina olong naitame nanu lelo pooki ooseremisho anaa iltung'ana lemeyiolo Enkai lelo oopurrisho near iltung'ana metuata pee etumi aaiputa nkajijik o lkitok lenye iyarunot.”

¹⁰“Ore kenya teina olong,” Olaitoriani ojo, “Naa kening'i olkiyioi teina Kishomi o Sinkirri, eyietunoto e nkishirata naing'uaa Endung'oto e Are, esulunoto kitok too ldoinyo.

¹¹Enteyietu enchira intae iloomanya abori enkanasa e Yerusalem, amu etuata ilbiasharani! Ore lelo pooki ooasishore enkosholai nedung'ori aaiwuang'ie.

¹²“Ore kenya teina olong naa kajur nanu Yerusalem too ltaai, naa kaitame nanu lelo tung'ana ooishiligate te okoto e naisho enye, oojo too ltauja lenye, ‘Meas Olaitoriani esidai nemeas entorrono.’

¹³Keisimari imasaa enye, neitomijooni nkajijik enye. Ore hoo neshet ninche nkajijik, memany ninche; ore hoo neun ninche nkurman oo sabibu meok ninche enaisho enye.”

¹⁴Ore ina olong kitok o Laitoriani netinyikua, etinyikua naa kesieku; kedua oltoilo le ina olong o Laitoriani, keyietu aishir oltung'ani magilani teine.

¹⁵Enkolong e ngoro napi ina olong, enkolong o sina o emion, enkolong e nkidaata o emutata, enkolong e naimin o enkimuntut[1], enkolong oo nkatampo o enaimin nagut,

¹⁶enkolong e oshoto e ntarumpeta o lkiyioi lo larrabal, egilunore nena anas naasheta isunta negilunore iltaleta lo larrabal.

¹⁷Kayau nanu osina shumata iltung'ana, o metaa kepuo ninche anaa ilmodook, te nkaraki nataasa ninche eng'oki ti alo Olaitoriani; keibukori osarge lenye anaa enterit, nepurrdi inkiri oo seseni lenye anaa emodiei.

¹⁸Mekordu ninche enkosholai enye aashu saabu enye teina olong e ngoro o Laitoriani. Ore tiatua enkima e ina goro enye o lom, keinosi aamut enkop pooki; amu te nkiting'oto nara ee enkiting'oto naluamisho keiting'ie ninye asioki lelo pooki oomanya enkop.