Read Maasai Bible – Biblia Sinyati Sefania 2 Bible Online

Sefania 2 - Maasai Bible – Biblia Sinyati bible

Sefania 2

¹Enturrurroto, Enturrurroto ele osho lemedol enkurruna,

²eton eitu kirewi anaa nguetat, eton eitu elotu shumata iyie engoro napi o Laitoriani, eton eitu elotu shumata iyie ina olong e ngoro o Laitoriani.

³Eng'oru Olaitoriani, intae pooki oobor lena kop, lelo ooibung inkitanapat enyena; eng'oru esupatisho, eng'oru emborron; pee eidimayu neisudori intae teina olong e ngoro o Laitoriani.

⁴Keing'uari Gasa, naa keaku Ashkelon mijooni; nearari iltung'ana le Ashdod enaipirie enkolong, nedotuni Ekron.

⁵Woi intae iloomanya olomanaa le naiposha, intae ilo osho le Kereti! Eipirare intae ororei lo Laitoriani, iyie Kanaan na kop oo Lfilisti; kaidurukie nanu intae o metaa meleku ninye obo.

⁶Ore iyie, Lo omanaa le naiposha, naa iaku endaata oo ntare, ilookeri loo lchekuti o muatat oo luaat oo ntare.

⁷Keaku olomanaa le naiposha ewueji e ilo pisiai otelekua le nkaji e Yuda, naa ninye eirritishore ninche, ore tiatua nkajijik e Askelon neirragie ninche teipa. Amu ore Olaitoriani Enkai enye kedamu ninche neitopok ninche.

⁸“Atoning'o nanu imorot e Moab o esukeny oo le Amon, ina natusukenya ninche iltung'ana laainei nerup ate ti alo enkop enye.

⁹Neaku ore anaa enaishu nanu,” Olaitoriani loo lororani ojo, Enkai e Israel, “Ketiu Moab anaa Sodom, ore ile Amon netiu anaa Gomora, enkop oo suut o ngumot e munyan, neaku olmuaate ntarasi. Ore ilo pisiai otelekua loo ltung'ana laainei neraya ninche, ore ilo pisiai otelekua lo losho lai neya ninche.”

¹⁰Ena eitalakuni te ninche to lwuasa lenye, te nkaraki natusukenya nerup ate ti alo iltung'ana lo Laitoriani loo lororani.

¹¹Kegilunore Olaitoriani ninche; keishie ninye nkaitin pooki e nkop, neaku ninye eirrugokinoi, pooki ake te wueji enye, nkuapi pooki oo loreren.

¹²Ore sii intae, ile Etiopia, keari intae to lalem lai.

¹³Naa keitorioo ninye enkaina enye aarare moikuape, neidaikie Asiria; neitaa ninye Ninawi olmuaate, ewueji netoyio anaa olpurkel.

¹⁴Keirrag iluaat te mpolos enye, ing'uesi pooki e ong'ata; ore olmotonyi o enjolis nemany ilpaashen lenyena; neishiraki emotonyi oo nkiyiaa ilusien enye neru olkurruk te mbata e kishomi enye; ore nkeek oo lpaashen lenye neitomijooni.

¹⁵Enkanasa naturupa kewan ena apa natobiko te seriani, apa najo ninye makewan, “Nanu ake nemeetae ae.” Ketaa ninye olmuaate anaa nyoo, ewueji neirragie ing'uesi e ntim! Ore pooki ng'ae ogiroo ninye neiputukuny nenunuk enkaina enye aikirikirie.