Read Maasai Bible – Biblia Sinyati Sefania 3 Bible Online

Sefania 3 - Maasai Bible – Biblia Sinyati bible

Sefania 3

¹Woi ninye ina anasa e Yerusalem natogolong'ua, neiduruk, neitorogonyisho!

²Mening ninye hoo likae toilo, meng'amaa ninye ererioroto enkikoo. Meisilig ninye Olaitoriani, menyikaki ninye Enkai enye.

³Ore lelo kituaak lenyena ootii atua naa ilng'atunyo ooipur; ore ilarishak lenyena naa isuyian le nteipa lelo lemeing'uaa toki o mekenyu.

⁴Pesho iloibonok lenyena, iltung'ana lemeeta enkirukoto; ore ilapolosak lenyena neisarkionie ine wueji sinyati, neinyala ninche nkitanapat.

⁵Ore Olaitoriani otii atua ninye naa kaasipani, meitarruoo ninye; ore anaake tadekenya neitodolu ninye esupatisho e nkiguana enye, ore anaake ekenyu melai; kake ore lelo torrok nemedol enkurruna.

⁶“Aiwuang'ie nanu iloshon; eidaaitie nkanas enye; aitomijoono nanu nkoitoi enye e nkanasa o metaa melo hoo oltung'ani aim ninche; eitaaki nkanas enye ilmuaateni, nemetii oltung'ani, nemetii olomanya.

⁷Atejo nanu, ‘Esipa kaaureyu ninye, keng'amu ninye enkikoo; merikino ninye nena pooki naitanapa nanu ninye.’ Kake etoponari ninche eyieu neitarruoo nkiasin enye.”

⁸“Metaa entaanyuaki nanu,” Olaitoriani ojo, “teina olong nadumunye nanu ara olchakeni. Amu ore enatudung'o nanu naa pee aiturrur nkuapi, pee aun nkitoriat, nabukoki ninche engoro ai, ina kirowuaj pooki e ngoro ai; amu teina kima e ngoro o lom lai emuti enkop pooki.

⁹“Ee, teina kata kenya aibelekeny nanu nkutukie oo ltung'ana, aitaa nkirorot sidain, pee etum ninche pooki aaipoto enkarna o Laitoriani, neisiaai ninye to ltau obo.

¹⁰Ebaiki te telido kekun lol lkejek le Etiopia aayaki nanu lelo laasai nkishoorot, ina tito oo looidapashari laainei.

¹¹“Ore kenya teina olong nimikintukurruni iyie te nkaraki nena kiasin nikitogolong'aka nanu; amu kaiwuang'ie nanu teina kata te mpolos inyi lelo linyi oowuasa oorup ate, nimintoki iyie awuasa te ilo doinyo lai sinyati.

¹²Amu kaleku nanu tiatua iyie iltung'ana supati oobor. Naa keing'oru ninche enkisudoroto te nkarna o Laitoriani,

¹³ore lelo ootelekuaki te Israel; nemeas ninche entorroni nemeiro elejare, nemetumi too nkutukie enye olng'ejep le lejare. Amu kedaa ninche neirrag nemeetae oloiture ninche.”

¹⁴Tabuaku taranya, Yerusalem; tabuaku Israel! Ting'idayu nishipayu to ltau lino pooki, na tito e Yerusalem!

¹⁵Eiwuang'ie Olaitoriani nena dungokinot e nkiguana ti alo iyie, etaarayie ninye ilmang'ati linono. Ilo aiguanani le Israel, Olaitoriani ninye otii empolos inyi; mingil aekata iyie aureyu entorroni.

¹⁶Ore kenya teina olong naa keji te Yerusalem: “Miureshoyu iyie Sion; mincho nkaik inono elepori.

¹⁷Olaitoriani, Enkai ino, otii empolos ino, olmurrani oishoru enkishuroto; eikishipakino ninye iyie te nchipai, eikintang'ejuk ninye iyie te nyorrata enye kepik ninye shumata iyie embuakunoto o sinkolio

¹⁸anaa te nkolong o sirua. “Kaiwuang'ie nanu osina te iyie, pee mitum iyie esulare te ninye.

¹⁹Ore kenya teina kata naa Kagilunore nanu lelo pooki likintorogong. Naa kaitajeu nanu lelo maiman naiturrurru lelo ooidapashari, naibelekeny nanu enkurruna enye metaa errepet, neyiolouni tiatua enkop pooki.

²⁰Ore kenya teina nalotu kata naa kayau nanu intae ang, teina kata naiturrur nanu intae te nebo; ee, kaisho nanu metayiolouni intae nerrepi tiatua iloreren pooki le nkop, teina kata nalo nanu arrinyoki karsisisho inyi dukuya nkonyek inyi,” Olaitoriani ojo.