Read Maasai Bible – Biblia Sinyati Hagai 1 Bible Online

Hagai 1 - Maasai Bible – Biblia Sinyati bible

Hagai 1

¹Ore to lari li are le Dario ilo aiguanani le Pasia, to lapa le ile, te nkolong e dukuya o lapa, nelotu ororei lo Laitoriani aimu Hagai ilo oiboni le Nkai, alotu enetii Serubabel olayioni le Shealtiel, olgafanai le Yuda, o Yoshua olayioni le Yehosadak, ilo apolosani kitok.

²“Nji ejo Olaitoriani loo lororani: Ejo kulo tung'ana inchere eton eitu ebau enkata pee eigili aashet enkaji o Laitoriani.”

³Neitoki ororei lo Laitoriani alotu eimu Hagai ilo oiboni le Nkai, ejo,

⁴“Ke nkata naishiaakino nitonini intae tiatua nena ajijik inyi naaikodo too mbaoi, eton etii ena aji enkidaaroto.

⁵Ore naa nji ejo Olaitoriani loo lororani; Entadamu eninkunariri intae.

⁶Ituunishote oleng, ninkesikese nkuti; idaa intae, kake miraposhosho; niokishosho, kake miishushu aekata enkure; ninchopishopo ate, kake meetae oloirouaju; naa ore ilo ong'amu olekoisiaayio, neng'amu olekoisiaayio nepik embene naudo.

⁷“Nji ejo Olaitoriani loo lororani: Entadamu eninkunariri intae.

⁸Elepa enchom ildoinyo niyauu ilkeek lishetietie ena aji, pee atum atishipakinoyu natum sii ataliooyu te nkitoo ai, Olaitoriani ojo.

⁹Isiligutua intae nkumok, naa ng'ura, etaa kuti; ore pee iyauu intae ang, nakutaa nanu. Aainyo? Olaitoriani loo lororani ojo. Te nkaraki ena aji ai nairragita te nkidaaroto amijoonu, intanyamaluoluo maate oltung'ani ake te nkaji enye makewan.

¹⁰Ore enkaraki ina, eibooyie keper natii shumata intae enkoileelio, ore enkop neibooyo ilng'anayio lenyena.

¹¹Naipotuo nanu olameyu meeu shumata enkop o ldoinyo, meeu shumata nkurman, o sabibu, o eilata, te nena pooki naabulu te nkop, too ltung'ana o nkishu, o too siaaitin enye pooki.”

¹²Nesuj Serubabel olayioni le Shealtiel, o Yoshua olayioni le Yehosadak, ilo apolosani kitok, te nebo nena lekunot oo ltung'ana ilo pisiai pooki loo ltung'ana ororei lo Laitoriani Enkai enye, o rorei le Hagai ilo oiboni le Nkai anaa enairriwayie Olaitoriani Enkai enye ninye; neureishoyu iltung'ana te dukuya Olaitoriani.

¹³Neitoki Hagai, ilo kilikuai lo Laitoriani, airorie iltung'ana to lkilikuai lo Laitoriani, ejo, “Atii nanu te nebo intae, ejo Olaitoriani.”

¹⁴Neputu Olaitoriani enkiyang'et e Serubabel le Shealtiel, ilo balusui le Yuda, o enkiyang'et e Yoshua olayioni le Yehosadak, ilo apolosani kitok, o enkiyang'et e lelo lekunot pooki loo ltung'ana; nepuonu ninche aas esiaai e ina aji o Laitoriani loo lororani Enkai enye,

¹⁵te nkolong e tikitam o ong'uan o lapa, to lapa le ile.