Read Maasai Bible – Biblia Sinyati Sakaria 1 Bible Online

Sakaria 1 - Maasai Bible – Biblia Sinyati bible

Sakaria 1

¹Ore to lapa le isiet tiatua olari liare le nkitoria e Dario, eewuo ororei lo Laitoriani enetii Sakaria olayioni le Berekia olayioni le Ido, ilo oiboni le Nkai ejoki,

²“Etagore apa Olaitoriani oleng tenkaraki iloo papaai linyi.

³Metaa tiaaki ninche, ena ejo Olaitoriani loo lororani: Entushukunye enatii, ejo Olaitoriani loo lororani, naa kashukokino sii nanu intae, ejo Olaitoriani loo lororani.

⁴Emitiuu anaa enaikununo apa iloo papaai linyi, laa ore apa lelo oibonok le Nkai le dukuya eishirakita ninche ejoki, Nji ejo Olaitoriani loo lororani, Entushukunye entung'uai nkoitoi inyi torrok o nkiasin inyi torrok! Kake eitu ninche aaning aashu aashilaa nanu, ejo Olaitoriani.

⁵Amaa taata iloo papaai linyi koree taata ninche? O loibonok, kebikoo sii ninche intarasi?

⁶Kake ore irorei laainei o nkiguanat aainei, nena apa naitanapa isinkan laainei lelo oibonok le Nkai, keitu ninche egiroo iloo papaai linyi? Metaa eirridutua ninche ejo, Anaa enatumuta Olaitoriani loo lororani pee eitame iyiook tenkaraki inkoitoi ang o siaaitin ang, neaku ina eitaasa ninye iyiook.”

⁷Ore te nkolong e tikitam oong'uan o lapa le tomon oobo, olapa le Shebat[1] to lari liare le nkitoria olaiguanani Dario, eewuo ororei lo Laitoriani enetii Sakaria olayioni le Berekia olayioni le Ido ilo oiboni le Nkai; nejo Sakaria,

⁸“Atoduaa tena kewarie naa ing'ura, oltung'ani okedito embarta nanyokie! Negira duoo aitashe tiatua ilkeek oo nyori ooji mihadasi[2] tiatua oyerata ore tesiadi ninye netii kulie bartan pilei, o naanyokie o naaibor.

⁹Naitoki ajo, ‘Kainyoo doi kuna Olaitoriani lai?’ Ore ilo malaika laairorie nanu, aatiaaka, ‘Ekaaitodol aitayiolo ajo ainyoo ninche.’

¹⁰Metaa etawala ilo tung'ani oitashe tiatua lelo keek ooji mihadasi ajoki ore kuna naa inaairriwua Olaitoriani meetu aaman enkop pooki.

¹¹Newaliki ilo malaika lo Laitoriani otii atua ilkeek ooji mihadasi ejo, ‘Kishomo aarrip enkop pooki, naa ng'ura, nikitoduaa aajo eeta enkop pooki enkiyeng'iyengata!’

¹²“Neitoki ilo malaika lo Laitoriani ajoki, iyie Olaitoriani loo lororani, ke rishata nabaa miata olng'ur tiatua Yerusalem o nkanas e Yuda, nena nitagorokine tiatua kulo arin intomoni naapishana?

¹³Newaliki Olaitoriani ilo malaika laairorie too rorei supati le nkitagoloto e oshoke.”

¹⁴Metaa ore ilo malaika laairorie aatiaaka, Inchira tabuaku tejo, ena ejo Olaitoriani loo lororani: Aata olom sapuk tenkaraki Yerusalem o Sion.

¹⁵Natagorokine oleng lelo oshon oodol ate anaa keserian. Amu ore apa pee agorokino ninche penyo, neitaa lelo oshon osina sapuk te ninche.

¹⁶Metaa, ina ejo Olaitoriani, atushukokine Yerusalem to lng'ur sapuk; naa ekesheti enkaji ai tiatua ninye, ejo Olaitoriani loo lororani nepiki enkopito e nkitorioroto shumata Yerusalem.

¹⁷Nyaaki inchira tejo, nji Olaitoriani loo lororani; Ekeitoki inkanas aainei aatum dupoto nalus, naa keitoki Olaitoriani aitagol Sion oshoke neigil agelu Yerusalem.

¹⁸Naraposhu inkonyek aainei aingorisho, naa ng'ura, imowuarak ong'uan!

¹⁹Najoki ilo malaika laairorie nanu, “Kainyoo doi kuna?” Naawaliki ninye ajoki, “Ore kuna mowuarak naa ninche naaidapasha Yuda, o Israel o Yerusalem.”

²⁰Naaitoki Olaitoriani aitodol ilkunono oong'uan.

²¹Najo nanu, “Kainyoo doi epuonu kulo aas?” Newal ajo, “Ore kuna naa imowuarak naa ninche naaidapasha Yuda metaa meetae oltung'ani oraposhu endukuya; neetuo kuna aaiture ninche, pee etum aitadou abori imowuarak oo loshon, lelo ootudumutua imowuarak enye aaitame ina kop e Yuda aaidapash ninye.”