Read Maasai Bible – Biblia Sinyati Sakaria 11 Bible Online

Sakaria 11 - Maasai Bible – Biblia Sinyati bible

Sakaria 11

¹Tabolo nchomito inono, iyie Lebanon, Pee etum enkima ainosa atumuta iltarakua linono!

²Teyietu inchira iyie lo shani onyaanyukie oltarakuai, amu eturori oltarakuai, ore lelo keek oata enkishiaa sidai einyalaki pooki. Enchira niyietutu lo keek oogol le Bashan; ore ina tim nasur too lkeek netumutaki aadung!

³Entoning olkiyioi le lelo shekuti; amu eiwuang'ieki aaoru enkitoo enye! Entoning, enkikurrukur e lelo ng'atunyo ore entim natii embata e Yordan, netumutaki aaidaikie.

⁴Inji ejo Olaitoriani Enkai ai: “Taa olchekut le nena tare naapuoi aayieng.

⁵Ore lelo ooinyang'u ninche neyieng ninche nepuo eitu eitamei ninche. Emir ninche inkiri nejo, ‘Meisisi Olaitoriani ataa nanu karsis.’ Ore ilchekuti lenye maate nemeetayie ninche olng'ur.

⁶Amu maitoki nanu aing'urrie lelo oomanya ena kop, Olaitoriani ojo, ng'ura, kaisho nanu iltung'ana metabatatakinoyu, oltung'ani ake, inkaik olchekut lenye, oltung'ani ake nkaik o laiguanani lenye, naa kepuo ninche aarrarrakino enkop, nemakordu nanu hoo obo too nkaik enye.”

⁷Metaa ataa nanu olchekut le nena tare naaiguanareki pee eyiengi te lelo oomir intare, naya nanu ing'udisin are. Ore nabo naisho enkarna ajo “Empiris,” ore enkae naisho enkarna aajo, “Naboisho,” Nairrita nanu ntare.

⁸Ore to lapa obo, naidaikie lelo shekuti okuni. Ataa nanu olemeeta eng'iriata te ninche, naaibayie sii.

⁹Metaa atejo, “Maaku nanu olchekut linyi. Ore ilo oye inchoo eye; ore ina namuta inchoo emuta; ore lelo ootelekutua nchoo eidaikie iseseni loo lkulikae maate.”

¹⁰Nadumu eng'udi ai naji “Empiris,” nagil ninye pee atum atujuto ilo sotua apa oitayio Olaitoriani too loshon pooki.

¹¹Metaa etua apa ilo sotua ina olong. Ore lelo amirak o lainyang'ak le nena tare naagira aaing'or, neyiolou aajo ororei lo Laitoriani.

¹²Na pee ajoki ninche, “Tinidolidolo eishaakino too nkonyek inyi, enchooki olekoisiaayio lai naa tenemeishaakino, niminchoruru.” Metaa aatalaakita ninche nanu olekoisiaayio lai shekeli tomoni uni e nkosholai.

¹³Ina pee aajoki Olaitoriani nanu, “Tipika ninche atua olbene le nkaji Enkai.” Ina laata sapuk natejo ninche ekaaishaakino. Meeta atudumua nena shekeli tomoni uni enkosholai napik atua olchumati otii atua enkaji o Laitoriani.

¹⁴Naitoki agil eng'udi ai e are naji “Naboisho.” Neaku etaraki Naboisho oo lalashera, Yuda o Israel.

¹⁵Ina pee aajoki Olaitoriani nanu, “Nyaaki ake iwa imasaa olchekut lemeeta tipat.

¹⁶Amu ng'ura, ekadumu aitasheyie tena kop olchekut lemeret lelo ooye, aashu eing'oru nena naaidapashari, aashu eishiunye nena ng'ojiniaa, aashu eitoti nena naatelekutua, kake nenya nkiri e nena naapir nepolol o metabaiki iloisotok lenye.

¹⁷Oi ele shekut lai lemeeta tipat, ilo olo aing'uaa intare! Metara olalem enkaina enye tenebo enkong'u enye e tatene! Inchoo enkaina enye eikaolo pooki, ore enkong'u enye e tatene nemodoku tukul!”