Read Maasai Bible – Biblia Sinyati Sakaria 13 Bible Online

Sakaria 13 - Maasai Bible – Biblia Sinyati bible

Sakaria 13

¹“Ore kenya teina olong, naa ketumi enkong'u enkare nabolo te nkaraki enkaji e Daudi o lelo oomanya Yerusalem pee eitukuoo ing'ok enye o pooki nemesinya.

²Naa ore teina olong, Olaitoriani loo lororani ojo, ekajutoo aiwuang'ie nkarn oo nkitaanyaanyukot oo nkaitin teinakop, ometaa meigili aekata aadamu; naiwuang'ie sii iloibonok o nkiyang'eta torrok.

³Naa teneitoki ake ninye oltung'ani alotu anaa oloiboni naa kejoki ninye menye otoiwuo tenebo ng'otonye, ‘Mintoki taa aishu, amu iroro elejare te nkarna o Laitoriani;’ ore menye o ng'otonye naatoiutuo ninye neng'or ninche ninye meipang'a ina kata eibonisho.

⁴Ore kenya teina olong naa kekurru pooki oiboni teneibonisho te nduata enye; meitoki aishop olkila oju pee etum atelejisho.

⁵Ekeaku kejo, ‘Mara nanu oloiboni, ara olaturoni le nterit; amu ara apake olaturoni ebaiki lelero ai.’

⁶Naa teneikilikuan likae ajoki ninye, ‘Kainyoo doi kulo baa ootii enkoriong ino?’ Naa kejo, ‘Ilbaa laatipikaki tiatua enkaji oo lchoreta laainei.’ ”

⁷“Inyo lo alem tudumakinoyu olchekut lai, tigilunore ilo tung'ani oitashe te mbata nanu:” Olaitoriani loo lororani ojo. “Toosho ilo shekut, pee etum ntare aaidapashata; naa kaibelekeny, enkaina ai agilunore lelo ooti.

⁸Ore tiatua enkop pooki, Olaitoriani ojo, ore ematua e are te uni tiatua iltung'ana naa kemuta, neaku ematua nabo te uni eing'uari eishu.

⁹Naa kapik nanu ina matua nabo te uni atua enkima, naa kasil nanu ninche anaa olosil enkosholai naitoki atem ninche anaa enatemi saabu. Naa keipot ninche enkarna ai, nawaliki nanu ninche. Naa kajo nanu, ‘Iltung'ana laainei ninche, Olaitoriani Enkai ang.’ ”