Read Maasai Bible – Biblia Sinyati Sakaria 14 Bible Online

Sakaria 14 - Maasai Bible – Biblia Sinyati bible

Sakaria 14

¹Ng'ura, elotu enkolong o Laitoriani, naa ore iyarunot naawaki aitung'uaa intae naa keori te dukuya inkonyek inyi.

²Amu kaiturrurru iloreren pooki metudumakinoto Yerusalem to larrabal, naa keyai ina anasa, nepurri inkajijik, neikonyi inkituaak. Eyae ematua e nkanasa te yararoto. Ore ilkulikae tung'ana nemeyae ninche te nkanasa.

³Ina pee elo Olaitoriani aarare lelo oshon, anaa enataarishe ninye te nkolong o larrabal.

⁴Ore kenya teina olong naa keitashe nkejek enyena toldoinyo loo loirienito, ilo otii dukuya Yerusalem te nkalo o loosaen. Ore ilo doinyo loo loirienito naa keiperra kat are eiteru to loo saen o meshomo oloo ntoluo aaku eululu sapuk. Metaa ore ematua nabo oldoinyo nelo enkalo e moikuape ore enkae seshati oldoinyo nelo enkalo e kopikop.

⁵Ore ina ululu oo ldoinyo laainei nemeitoki aponari agutu neaku keibung'are isunta pokira oldoinyo, nitumutumu aaisika anaa apa ina kata nisikisiki aailany olokirikiri too nkolong'i e Usia olaiguanani le Yuda. Ina pee elotu Olaitoriani Enkai inyi tenebo lelo pooki sinyat eboitare ninye.

⁶Ore kenya teina olong, meetae hoo enkirobi aashu enkurriny e ndeem.

⁷Naa keaku endama enaado oleng (Olaitoriani oyiolo ena), ime endama neme enkewarie, amu ore enoshi kata nikijo iyiook emuto, eton ake etii ewang'an.

⁸Ore teina olong naa keruko inkariak e mpuaan naapuku aing'uaa Yerusalem. Ore ematua enye nabo nerukokino enaiposha enkalo oloo saen ore enkae matua nerukokino enaiposha e nkalo oloontoluo; naa keruko to lari pooki.

⁹Naa keaku Olaitoriani Olaiguanani le nkop pooki, ore kenya teina olong neaku Olaitoriani obo o enkarna enye nabo.

¹⁰Ore enkop pooki naa keibelekenyi aitaa enkop naisiasha eiteru te Geba o metabaiki Rimon natii kopikop e Yerusalem. Ore Yerusalem neaku ketala etii shumata ina kop namanita ninye; ebaiki enkanasa e Yerusalem epuku te nkishomi e Benchamen o metabaiki ewueji e nkishomi musana, ine apa ebaiki oltalet le Hananel o meshomo ina aji naironyieki enaisho oo sabibu o laiguanani.

¹¹Naa kemany iltung'ana ninye amu meitokini aata oldeket, keton Yerusalem te seriani.

¹²Naa ele olmeitai laa ninye emutie Olaitoriani iloreren pooki lelo oodumaki olarrabal Yerusalem. Ekeng'uoyu iseseni lenye eton eitashoo, naa keng'uoyu inkonyek enye etii atua ilukuny enye, naa keng'uoyu ilng'ejepa lenye tiatua inkutukie enye.

¹³Naa ore kenya teina olong naa kedoiki ninche olkirutoto sapuk oing'uaa Olaitoriani, ometaa keibung ake oltung'ani enkaina o likae, ore nkaik enye, nedumakino olikae olikae aarare.

¹⁴Ore sii iltung'ana le Yuda naa keara emitu Yerusalem. Naa kearu ninche enkarsisisho oo loshon pooki oomanita saabu, o enkosholai tenebo inkilani te nkumoi.

¹⁵Naa kedoiki olmeitai laaijo oloo mbartan, o nyumpui, o ntamesin, o sirkon o pooki ng'ues ake ninye natii atua lelo ng'oborri.

¹⁶Ore taa pooki ng'ae oimisho te lelo oshon pooki ooetuo aadumakino Yerusalem, neaku keilepu too larin pooki aapuonu aaserem olaiguanani, ilo Aitoriani loo lororani, neibung osirua loo lng'oborri.

¹⁷Naa tenetii olmare obo te nkop lemelo Yerusalem aserem Olaiguanani, Olaitoriani loo lororani, nemetum ninche enchan.

¹⁸Naa tenemelo olmarei loo Lmisiri aapuo aaitarasaa ate, nedoiki ninche olmetai laa Olaitoriani ninye oosh lelo oshon lemeilep aapuo aaibung osirua loo lng'oborri.

¹⁹Ena nalo aaku enkitamioto te Misiri o enkitamioto oo loshon pooki lemeilep aapuo aaibung osirua loo lng'oborri.

²⁰Naa ore kenya teina olong, naa keaku keetae iltualan loo mbartan nesirakino irorei oojo, “Sinyati to Laitoriani.” Ore imotioo naayierishoreki naatii atua enkaji Enkai naa keaku sinyat anaa ilbakulini otii dukuya olperere;

²¹neaku ore pooki moti natii atua Yerusalem o Yuda neaku pooki sinyati to Laitoriani loo lororani, metaa ore lelo pooki ooitayu olasar, nepuonu aaya ninche neitokitokie nena kiri o lasar tiatua ninche. Nemeitokini aata olamirani tiatua ina aji Olaitoriani loo lororani ina olong.