Read Maasai Bible – Biblia Sinyati Sakaria 2 Bible Online

Sakaria 2 - Maasai Bible – Biblia Sinyati bible

Sakaria 2

¹Naraposhu inkonyek aainei aing'orisho, naa ng'ura, oltung'ani oata enkopito natemishoreki te nkaina enye.

²Naitoki nanu ajo, “Kaji doi iloito iyie?” Naajoki ninye nanu, “Kalo atem Yerusalem, pee ayiolou eneba endapasho enye o eneba enkadori enye.”

³Naa ng'ura, ore ilo malaika laairorie eewuo dukuya, nelotu likae malaika dukuya anang'are ninye, nejoki ninye,

⁴“Kueta, shomo tiaaki lido barnoti, ekeaku Yerusalem enkanasa nemeeta isunta tenkaraki enkumoi o lorere o nkishu naatii atua.

⁵Amu kaaku nanu te ninye esuntai enkima namanita ninye, Olaitoriani ojo, naaku sii enkisisa tiatua ninye!”

⁶Oi! Oi! Enkuet entung'uai ina kop e kopikop, Olaitoriani ojo; amu aidapasha intae aitalamaa anaa enatii inkaloli ong'uan enkijape e keper, Olaitoriani ojo.

⁷Oi! Isikaki Sion, iyie ilo oboitare ina tito e Babilon.

⁸Amu inji ejo Olaitoriani loo lororani, te nkitoo enye laa ninye makewan laairriwaka lelo oreren ooidaikie intae, amu ore ilo likiseyie iyie, naa enerok enkong'u ai eiseyie:

⁹Ing'ura, ekaikirikirie enkaina ai te shumata ninche, naa keidaikie ninche lelo ooisiaai ninche. Nitum taa atayiolo nchere Olaitoriani loo lororani ninye lairriwua nanu.

¹⁰Taranya nishipayu, iyie Yerusalem; Amu ng'ura ajo, kalotu naa kabik tiatua intae, Olaitoriani ojo.

¹¹Naa keibung'are iloreren kumok Olaitoriani teina olong, naa keaku ninche iltung'ana laainei; naa katon nanu tiatua intae, niyiolouu aajo Olaitoriani loo lororani laairriwua nanu atua intae.

¹²Naa kejung Olaitoriani Yuda anaa erubata enye tiatua ina kop enye sinyati, neitoki ake agelu Yerusalem!

¹³Entigirata, pooki toki naishu te dukuya Olaitoriani; amu etudumunye ninye tiatua ina manyisho enye sinyati.