Read Maasai Bible – Biblia Sinyati Sakaria 4 Bible Online

Sakaria 4 - Maasai Bible – Biblia Sinyati bible

Sakaria 4

¹Ore ilo malaika laairorie nanu, enyaaka arrinyunye, naainyoyie nanu, anaa oltung'ani otuputuoki too njo.

²Naajoki ninye nanu, “Kainyoo idolita?” Iyie. Najo nanu, “Adolita naa ng'ura, enkitashet oltaa naitobiruno pooki te saabu, neeta olbakuli otii shumata ninye, o ltaai oopishana te nchumata ninye, o ltampii oopishana otii lelo taai otii shumata e ina kitashet.

³Netii embata iloirienito aare, obo te nkalo e tatene ilo bakuli netii olikae kedianye enye.”

⁴Naajoki ilo malaika laairorie nanu, “Ainyoo doi kuna, olkitok lai?”

⁵Ina pee aawaliki nanu ilo malaika laairorie ejo, “Aimiyiolo doi ajo ainyoo kuna?” Najo, “A'a, olkitok lai.”

⁶Ina pee aajoki ninye nanu, “Ore ele naa ororei lo Laitoriani oirriwakaki Serubabel: Ime te nkidimata, neme te ngolon, kake te Nkiyang'et ai Sinyati, Olaitoriani loo lororani ojo.

⁷Koree iyie, iyie lo doinyo sapuk? Ore te dukuya Serubabel naa iyaku enkisiashata; naa keyau ninye dukuya ilo soit le shumata ebuakitae aajo, ‘Empiris, Empiris te ninye!’ ”

⁸Ore ake sii eewuo ororei lo Laitoriani enatii aajoki,

⁹“Inkaik e Serubabel naaitasheyie olkitamanyunoto lena aji; naa inkaik enyena ake sii naaidip ninye. Ina pee iyiolouu aajo aairriwua nanu Olaitoriani loo lororani enitii.

¹⁰Amu ore pooki ng'ae otemenayie ina olong oo ntokitin kutiti naa keshipa, naa kedol ina temet te nkaina e Serubabel. Ore kuna naapishana naa nena onyek o Laitoriani, nena naapuo tiatua enkop pooki.”

¹¹Naitoki nanu ajoki ninye, “Kainyoo eutu kulo oirienito aare ootii enkaina e tatene o enkaina e kedianye tene netii enkitashet oltaa?”

¹²Naitoki ajoki ninye eniare, “Ainyoo eutu kulo ng'osil pokira lo loirien, lelo ootii embata lelo goso ooitobiruno te saabu oobukunyeki ina ilata aaitayu?”

¹³Naajoki ninye nanu, “Aimiyiolo ajo ainyoo kulo?” Najo, “A'a olkitok lai.”

¹⁴Ina pee ejo, “Ore kulo naa lelo aare ootubukoki eilata aaput ooitashe te mbata Olaitoriani laa olopeny enkop pooki.”