Read Maasai Bible – Biblia Sinyati Malaki 1 Bible Online

Malaki 1 - Maasai Bible – Biblia Sinyati bible

Malaki 1

¹Ele olkilikuai oishoo Olaitoriani Malaki metoliki Isiraeli.

² Ejo Olaitoriani: Atonyorra intae. Kake itejo intae “Kaji doi inkuna tininyorru iyiook?” “Amaa Esau aime olalashe le Yakobo?” Olaitoriani ojo. “Natonyorra nanu Yakobo

³naibayu Esau, naitomijoono nanu enkop enye oo ldoinyo, naing'ueiki enjung'ore enye imbariak o lpurkel.”

⁴Tenejo eishoi e Esau, ile Edom; “Etumutaki iyiook kake aikintoki aashet ineeidaaitie”, newal Olaitoriani loo lororani ajo, “Keidim ninche aateshet, kake kasulaki nanu enkop ometaba anaa neipoti aajo enkop e ntorroni, iltung'ana ootagorokine Olaitoriani intarasi.”

⁵Idolidolo ena too nkonyek inyi maate, nijojo ina kata; “Aikitok Olaitoriani negiroo enkitoo enye ilpolosien loo Siraeli!”

⁶“Keyanyit olayioni menye, neyanyit osinka olkitok lenye. Amaa naa tenaa kara papaai linyi, koree enkanyit ai naairare? Naa tenaa kara olkitok, koree euriata ai naairare? Ejo Olaitoriani loo lororani. Lo apolosak kulo oomen enkarna ai. Ijojo intae, ‘Kaji doi kinkuna tinikimenu enkarna ino?’

⁷Aliki intae ajoki; tinintayuyu endaa naiduruk aapik shumata olperere lo lasar lai. Nijojo sii; ‘Kaji doi kinkuna tinikindurukie ninye?’ Amu ijojo ntae ore emisa o Laitoriani naa entoki namenari.

⁸Amaa tinintayuyu ilasarri loo masaa modook, aime eng'oki ina sapuk? Amaa sii tinintayuyu ilasarri loo ntokitin ng'ojiniaa anaa inaamuoi, aime eng'oki ina? Entetem sii intae enchoo nena olkitok linyi, aijojo keshipakino intae anaa eisho intae omom? Ejo Olaitoriani loo lororani.

⁹“Ajoki intae, engoru omom e Nkai peyie eidim aing'urrie iyiook. Amaa teina kishooroto naing'uaa inkaik inyi, aijojo keidim aing'urrie hoo obo linyi? Ejo Olaitoriani loo lororani.

¹⁰Oi te naa ketii obo linyi oidim aikeno kutuk aji peyie mikintokiki aainuaaki enkima e pesho to lperere lo lasar! Mashipakino nanu intae, ejo Olaitoriani loo lororani, nemang'amaa sii olasar linyi too nkaik inyi.

¹¹Amu ore eiteru te nkilepunoto e nkolong ometabaiki endoyioroto, aikitok enkarna ai too loreren pooki, ore te pooki wueji, neitayuni enkorropil te nkaraki enkarna ai, neitayuni sii ilasarri oosinya amu aikitok enkarna ai neyanyiti too loreren pooki, ejo Olaitoriani loo lororani.

¹²Kake isarkionie intae ninye pee ijojo eidurukieki emisa o Laitoriani, ore sii endaa enye nemenuni.

¹³Ijojo intae, eng'ura sii intae eneba enauri, nikidasakiki nkineji, ejo Olaitoriani loo lororani. Kiyakiki sii intokitin naapurruno anaa ing'ojiniaa o naamuoi, eji naa ninche kipuonunu aaitaikinye olasar! Aijojo kang'amaa ina too nkaik inyi? Ejo Olaitoriani.

¹⁴Metedeki olalejani pooki ooata olkuoo supat te luaata enye, nenya olmumai ejo ekaishoru eji neitoki apolosaki Olaitoriani ina naata eleyiata. Amu kara nanu olaiguanani kitok, ejo Olaitoriani loo lororani naa keurei enkarna ai too loreren pooki.