Read Maasai Bible – Biblia Sinyati Malaki 3 Bible Online

Malaki 3 - Maasai Bible – Biblia Sinyati bible

Malaki 3

¹“Ng'ura ajo ekairriu nanu olkipaaret lai pee eitobir enkoitoi te dukuya nanu, ore ilo Aitoriani ling'oruru, nelotu nabo kata atua enkaji enye. Ore olkilikuai leilo ning'o lishipakinono, ng'ura elotu ninye, ejo Olaitoriani loo lororani.

²“Kake aing'ae oidim ating'iria ina olong e lotunoto enye? Naa aing'ae oidim aitasho tenelioyu ninye? Amu etiu ninye anaa enkima o lasikani, netiu sii anaa osabuni oishu oloirerio.

³Kelo ninye aton anaa olasilani osil enkosholai, naa kesil aitisidan ilayiok le Lawi neitisidan ninche anaa saabu o enkosholai o metaba anaa neitarasaki Olaitoriani ilasarri ooishiaakino.

⁴Neaku ore olasar le Yuda o Yerusalem neitiship Olaitoriani anaa inkolong'i apa e moitie oo larin ootulusoitie.

⁵“Natum taa atinyikaki intae te nkiguana, aaku olchakeni osieku agilunore ilkuyantik, nagilunore iloololoito, nagilunore lelo oonya ilmuma le lejare, nagilunore lelo ooitorogonyisho too laakinot enye, tenebo inkolia o nkera okishin, nagilunore lelo ooinyal ilomon nemaaure ninche nanu, ejo Olaitoriani loo lororani.

⁶“Ore nanu Olaitoriani nemaibelekenya, ore naa intae, na ishoi e Yakobo, neitu emuti intae.

⁷Ore ebaiki nkolong'i oo loo papaai linyi itapaasha nkiguanat aainei neitu imbung'ubung'u ninche. Entushukunye enatii, naa kashukokino sii nanu intae ejo Olaitoriani loo lororani. Kake ijojo ntae; ‘Kaji kinko tenikishukunye?’

⁸Kepur oltung'ani Enkai? Eji nikipurritoto intae nanu. Nijojo ntae, ‘Kaji doi kinkuna tinikipur iyie?’ Te matua inyi e tomon o too lasarri.

⁹Etediaaki intae to ldeket, amu kipurritoto intae nanu, intae olosho pooki.

¹⁰Eyau ematua e tomon pooki atua enkaji ai nashumishoreki pee eaku ketii endaa atua enkaji ai; entetemaki sii iyie, ejo Olaitoriani loo lororani tenemaboloki intae ilusien e shumata, nabuku abori imayianat naadooyo.

¹¹Kaisikong sii ilo maati omutisho te nkop peyie meitoki aainyal ilng'anayio le nkop ino. Ore osabibu otii enkurma nemeitoki alau eishoi, ejo Olaitoriani loo lororani.

¹²Ore iloshon pooki nikimpot aajo olomayiana, amu iaku enkop nashipakinoi, ejo Olaitoriani loo lororani.

¹³“Ore irorei linyi naaitame nanu katukul, Olaitoriani ojo. Nijojo ake, ‘Kaji kinkuna tinikiro mbaa torrok tialo iyie?

¹⁴Itejo intae ‘Pesho ti nikisiaai Enkai,’ ainyoo esidano ti nikimbung enkitanapata enye anaa tinikipuo anaa ilooata osina te dukuya Olaitoriani loo lororani?

¹⁵Ore anaa enatiu, ekidol iloowuasa anaa kemayiana, ore ilarruok neme kebul ake kake tenetem ninche Enkai neimisho.’ ”

¹⁶Ore lelo ooure Olaitoriani, neiro maate naa keirrugoki Olaitoriani ninche enkiok ainining ninche. Neigeri embuku nadamunyeki te dukuya ninye o lelo pooki ooure Olaitoriani, neing'oru sii enkarna enye.

¹⁷“Keaku ninche iltung'ana laainei, ejo Olaitoriani loo lororani, intokitin aainei kiroteti teina olong naasisho naa kaleku nanu ninche anaa oltung'ani opalaki enkerai enye naisiaaita.

¹⁸Nitum taa ina kata ategela ilo oitashe too sipat o laasani loo ng'ok o ilo oisiaai Enkai o lemeisiaai ninye.”