Read Maasai Bible – Biblia Sinyati Malaki 4 Bible Online

Malaki 4 - Maasai Bible – Biblia Sinyati bible

Malaki 4

¹“Kesipa elotu enkolong napejisho anaa olmoti le nkima, ina pee eaku ilooitokoos o laasak pooki loo ng'ok isuut; ore ina olong nalotu napejoo ninche, ejo Olaitoriani loo lororani, melekaki ninche entonai anaa olng'osila.

²Kake ore iyie oure enkarna ai, keilepaki intae enkolong e supatisho eetae enkishiunoto too naipuko enyena. Ipuopuo intae intigiranana anaa ilasho ooti ooitigiran[1] epuku to lale.

³Naa intunyokiki enkop iltorrok. Amu keaku ninche nkuruon tiabori ndapi oo nkejek inyi ina olong naas ina, Olaitoriani loo lororani ojo.

⁴“Entadamu inkiguanat o sinka lai Musa o nkitanapat naitanapa ninye to ldoinyo le Horeb naaipirta Israel pooki.

⁵“Ng'ura ajo kairriwaki nanu intae Eliya oloiboni le Nkai eton eitu elotu ina olong torrono o Laitoriani.

⁶Naa keitutum ninye intoiwuo o nkera enye malotu ake aosh enkop to ldeket.”