Read Maasai Bible – Biblia Sinyati 1 Ilmakabayo 10 Bible Online

1 Ilmakabayo 10 - Maasai Bible – Biblia Sinyati bible

1 Ilmakabayo 10

¹Ore to lari le 160 Aleksanda Epifane. Enkerai e Antiok le ong'uan nebaya ninye Tolemai neibung ina anasa, neitoomon ltung'ana ninye anaa olaiguanani lenye.

²Ore peyie ening olaiguanani Demetrio, neiturrur enjore enye sapuk nelo anang'are ninye to larrabal.

³Ore ake teina rishata neirriwaki Demetrio Yonatan empalai eshoreisho nabore ilomon le seriani o saiya,

⁴esiling ajo ketum ninye Yonatan metaa ole nchoto enye, neitayu eseriani o Lyahudi eton eitu eing'oru Aleksanda olning'o o ninche te nkaraki ninye.

⁵Naa kejo ninye Demetrio ajo kedamu Yonatan nena baa torrok naitaasa ninye niche o lalashera lenyena o ina kop pooki oo Lyahudi.

⁶Neitaa Demetrio Yonatan olchore neisho ninye engolon naitobirie enjore neisho imasa o larrabal. Neitanap sii lelo oena to sempewuet le Yerusalem peyie eishori Yonatan.

⁷Nelo Yonatan Yerusalem neisomaki ina palai ltung'ana pooki o lelo otii osempewuet.

⁸Neureishoyu lelo tung'ana peyie eyolou ajo inchere eishooki olaiguanani, Yonatan engolon neitobirie enjore.

⁹Neishori ninye lelo pooki oena, neshuk ninche enetii intoiwuo enye.

¹⁰Nemany Yonatan Yerusalem, neiteru aitoki ashet neitobir ina anasa.

¹¹Neitanap lashetak peyie eshetie isoito o risioro pooki aloli isunta e nkanasa o isunta naarip oldoinyo le Sion neaasi ina.

¹²Ore ilomon apa otii osempewuet otesheta Bakide neing'uaa,

¹³neing'uaa pooki tung'ani esiai enye neshuko enkop enye.

¹⁴Kake ore ilkuti lyahudi otung'uaitie apa inkitanapat e Musa, neton etii ninche Bet-Suri, ore ina anasa ninye apa eweji nasaru ninche.

¹⁵Neyiolou Aleksanda nena kisiligat naishoo Demetrio Yonatan, neyiolo sii Yonatan makewan olarrabal lenye o iasat enyena empijan o nyamalaritin pooki naimatie ninye o lalashera lenyena.

¹⁶Neyiolou inchere ajo metum likai tung'ani anaa Yonatan, nemut ajo keitaa ninye olchore o laretoni.

¹⁷Neigeroki Yonatan empalai,

¹⁸“Olaiguanani Aleksanda enetii olchore lai Yonatan enkirorokino.

¹⁹Atoning'o ajo ira iyie oltung'ani opi, neaku keishaakino peyie iyaku olchore loo laiguanani.

²⁰Neaku aategelua taata peyie iyaku olapolosani kitok le nkop ino, naishoo enkarna ‘Olchore loo laiguanani.’ Iyaaku iyie olaretoni lang, inchoo iyiook enkaina ino.” Neiriwaki ninye inkilani enkitoo o lmarisian le saabu.

²¹Neishop Yonatan ilkilani lo lapolosani kitok to lapa li opishana to lari le 160 to sirua loo lng'oborri, neitobir enjore enye neshum imasa kumok o larrabal.

²²Ore peyie ening Demetrio nenyamalu oleng, nejo

²³“Kaa taa kitaasa kinchoo Aleksanda eituruk te dukuya iyiook, eitagolo ninye kewan eitaa lyahudi laretok lenyena to lning'o.”

²⁴Kaigeroki ninche empalai e shoreisho naisho enkitoo sapuk o inkishoorot, peyie aaretu ninche nanu.

²⁵Neiger: Olaiguanani Demetrio te nkop pooki oo Lyahudi, enkirorokino.

²⁶Kishipa amu kitoning'o inchere embung'a intae olning'o lang, nitaa asipak te iyiook naa inchere eitu embungarere ilmang'ati lang.

²⁷Neaku ore tinipuopo dukuya teilo ning'o, eikincho intae inkishoorot enashe.

²⁸Ekipalki intae kodi sapuk peyie milakilaka o kulie ake kishoorot.

²⁹Neaku atapalikia ltung'ana pooki loo Lyahudi peyie melak kodi elukunya o kodi emunyani o ae kodi.

³⁰Naa ore aiteru taata kapaliki intae elaata inyi e matua e uni enkikesare oo ilng'anayio. Naa ore aiteru taata maitoki ayeu elaata naing'uaa Yudea aashu lkerenketi ootoponikiaki Yudea eing'uaa Samaria o Galilaya.

³¹Ore Yerusalem o naamanita ina kop naa keyolouni ninye anaa enkanasa sinyati naa kapalikini meitoki alak kodi.

³²Kaishooyo sii nanu enkitoria ai osempewuet le Yerusalem aisho olapolosani kitok, naa kepik ninye oloyieu peyie errip ine.

³³Kalaku Lyahudi pooki oena te nkaraki olarrabal te nkitoo pooki. Naa kepalikini ninche elaata e kodi o inkishu enye.

³⁴Meetai kodi naitalaki Lyahudi te nkitoo ai pooki te Sabato, osirua lo lapa ngejuk o kulie olongi sinyat. Nemeetai sii kodi nasotuni inkolong'i uni eng'or aashu eidipate inkolong'i sinyat.

³⁵Meetai oltung'ani oata esipata too kuna olongi pooki sinyat naitalakunye kodi aashu enyamali akeyie pooki.

³⁶“Keidim Lyahudi inkalifuni tomoni uni aegero aate peyie aeku enjore olaiguanani, naa kelaki anaa nkulie joreitin olaiguanani.

³⁷Kedimi aatipik sempewueti olaiguanani, ore kulikai neishori esiai te nkitoria ai. Keaku keeta ninye Lyahudi anaa larikok lenye oo lkituuak lenye, naa kesujaa ninche inkitanapat enye olkuak lenye, anaa enaishoo apa olaiguanani ltung'ana le Yudea.”

³⁸“Ore lelo lkerenketi okuni otoponikiaki enkop e Yudea eing'uaa Samaria keeku ninche erubata e Yudea neaku abori enkitoria o lapolosani kitok.

³⁹Kaishoo enkaji e Nkai e Yerusalem mpisai enkitoria naing'uaa enkanasa e Tolemai o enkop enye.

⁴⁰Naa kanya sii olmumai ajo kaishooyo anaa inkishoorot inkalifuni tomon o miet e nkosholai naing'uaa olbene loo laiguanani.

⁴¹Ore esiana oo impisai eretoto naing'uaa enkitoria nikitalaikinote atalak too larin ootulusoitie, aikilak pooki, nelo dukuya elaata aiteru taata te nkaraki esiaai enkaji e Nkai.

⁴²Ore ae, mikitoki aitalaku nena alifuni imiet enkosholai anaa inkishoorot enkaji e Nkai too lari. Ore nena pisai naa enoo lapolosak oasisho te nkaji Enkai.

⁴³Ore pooki tung'ani oata esile olaiguanani aashu ai sile, nelo ninye asaru enkaji e Nkai te Yerusalem aashu ai kop ake iyie namanita ina aji Enkai, meibung'i ninye aashu eyae imasaa enyena te nkitoo pooki.

⁴⁴Ore nena tokitin naaitalakishoi te nkaraki enchetata enkaji e Nkai naa kelak olbene loo laiguanani.

⁴⁵Ore sii esesheta oo isunta e Yerusalem onena pooki naamanita esempeuwet osunta oo nkanas e Yudea anaa olbene loo laiguanani oitasheki.”

⁴⁶Ore peyie ening ltung'ana ilomon loo laiguanani Demetrio neany ninche airuk aashu enyoraa, amu etadamutua ninche entoroni naitaasa ninche o enyamali nayaka ninche.

⁴⁷Eikashie ninche Aleksanda amu ninye ole dukuya etabolo olning'o le seriani, netobiko ninche aa osotua too inkolong'i pooki enkishui enye.

⁴⁸Neitobir olaiguanani Aleksanda enjore sapuk nelo olarrabal atumore Demetrio.

⁴⁹Kake ore peyie etumo nena joreitin too larrabal, neisik enjore e Aleksanda nesujaa ninche Demetrio, nemir ninche too larrabal.

⁵⁰Nearisho Aleksanda, etagore omemuto kake near Demetrio ina olong.

⁵¹Neiriwaa Aleksanda ilkiliku enetii olaiguanani Tolemai le ile le Misiri ejo:

⁵²“Atushuke nanu enkitoria ai naya olorika le nkitoo oo loo nkakuyiaa laine. Naya nanu enkitoria nanu oitore ina kop.

⁵³Atarare Demetrio namir ninye o enjore enye, naya enkitoo enye.

⁵⁴Naa atanape nanu peyie aitayu osotua. Enchooki entito inyi peyie aayam ninye, naa kaishoo intae inkishoorot nanarikini intae.”

⁵⁵Newaliki olaiguanani Tolemai, “Enkolong sapuk ina, peyie eshuko enkop ino niya enkitoo oloo nkakuyiaa lino.

⁵⁶Kanyoraa nanu ilomon linono kake matangas aatumo te nkana e Tolemai, peyie kiyolouno, naa kaishoo entito ai iyama.”

⁵⁷Ore too lari le 162 nelo Tolemai o ntito enye Kleopatra te Misiri nebaya Tolemai.

⁵⁸Netumore olaiguanani Aleksanda, neisho Tolemai entito enye meyama. Neshipakino o sirua le nkiyama te Tolemai te nkishiaa oolaiguanak.

⁵⁹Neigeroki olaiguanani Aleksanda Yonatan ejoki peyie elotu menototo.

⁶⁰Nelo Yonatan te nkishiaa enye, Tolemai atumore laiguanak aare. Neishoo ninche inkishoorot e nkosholia o saabu, neisho sii inkishoorot kumok lelo kituuak oboitare ninche. Neshipaki pooki ninye.

⁶¹Ore ake ina rishata lelo Lyahudi aruok lemeijali inkitanapat neyeu ninche neyaki Yonatan enyamali alikioo tenetii Aleksanda kake eitu einining ninche olaiguanani Aleksanda,

⁶²neitanapisho peyie eishori Yonatan olkila loo laiguanani peyie eishop,

⁶³neanyit ninye aisho peyie eton te nchoto enye. Nejoki Aleksanda lkituuak peyie eya Yonatan empolos enkanasa neibalie inchere meetai obo olikioo ninye neemeta sii oloitanyamal ninye.

⁶⁴Ore peyie edol lelo aitang'orok enkanyit naishooki ninye, nening ina naibalunyeki, nedol eishopo ilkilani olaiguanani neisik ninche.

⁶⁵Neitoki ake olaiguanani ayanyit Yonatan neiger ninye anaa ole dukuya too lelo “Shoreta loo laiguanani” neitaa ninye olkitok le enjore o lgafanai loo lkerenket enye.

⁶⁶Neshuko Yonatan Yerusalem te nchipai o seriani.

⁶⁷Ore too lari le 165, Demetrio li aare enkerai e Demetrio le dukuya lelo te Krete nebaya Siria enkop oloo nkakuyiaa lenye.

⁶⁸Ore peyie ening oliguanani Aleksanda, neureishoyou ninye neshuko Antiokia.

⁶⁹Neitoki agelu Demetrio Apolonio olgafanai le Siria kitok. Neitobir Apolonio enjore sapuk neshet olng'oborr te mbata Yamnia neiriwaki Yonatan olapolosani kitok ele kilikuai:

⁷⁰“Te nkaraki iyie pee agirae asukeny, kake ainyoo paa iyie ake, ore too ldonyio niloito ake dukuya aany naa meetai olikigira aretu?

⁷¹Te naa eisiling enjore ino oleng, tadou kuna ong'at mataarata peyie kineneng engolon ang. Tujuro imbaa peyie eyiolou ajo kaa eretu injoreitin oo nkanas.

⁷²Eyiolou ajo kara ng'ae naa kakua sotuatin lainei, peyie edol ajo miata erishata nintasheiyie te nkaraki iyiook. Etaaraki loo ooituruko te dukuya iyie katitin are te nkop enye.

⁷³Neaku kalo siligi ele liata ajo imir iyiook o ngarrin o mbartan o enjore naata tena ong'ata? Ore tene tiabori metumi ninye osoit obo lisudorie ashu aisikaki.”

⁷⁴Ore peyie etum Yonatan ilo kilikuai le Apolonio, negoro oleng. Neya ninye enjore oo inkalifuni tomon te Yerusalem, neyau sii ninye olalashe lenye Simon enjore neaku njoreitin are

⁷⁵neshet olng'oborr te aulo Yopa. Etanyaita ltung'ana otii ina anasa enjig ninche amu eeta apa ninche olning'o o enjore e Apolonio, kake nedoiki ninye Yonatan,

⁷⁶neureishooyu lelo tung'ana te nkanasa, nebol inchomito nenyoriki Yonatan meibung'a Yopa.

⁷⁷Ore peyie ening Apolonio ina naatase, neya ninye ingarrin oo mbartan inkalifuni uni o sikarini loo inkejek neitaakuno kegira asikaki kopikop e Ashdodi. Kake ore engidakino ninye engolon oo ngarrin oo mbartan nelo ong'ata o enjore enye,

⁷⁸nesujaa Yonatan Apolonio ometabai Ashodi neiteru olarrabal teine,

⁷⁹einyoriki etunguaiye apa ninye Apolonio te siadi ngarrin oo mbartan enkalifuni.

⁸⁰Ore teine neyiolou Yonatan ajo etamanaki ninche. Nedoiki ninche mbaa olmang'atinta anaa ilkitongata le enchan e tadekenya omemutu.

⁸¹Kake neuno ltung'ana le Yonatan, anaa enaitanapa apa ninye, neiteru aashalu ngarrin oo mbartan.

⁸²Ore peyie eshalu ngarrin oo mbartan nelotu Simon o enjore nedoiki te ngolon ina jore neisulie sikarini lmang'ati loo nkejek, neisik ninche.

⁸³Ore ingarrin oo mbartan naidapashakine ina ong'ata o larrabal neisik aapuo Ashdodi aisudori te enkaji e Nkai enye Beth-dagoni.

⁸⁴Kake nepik enkima Yonatan enkanasa pooki o enkaji e nkai enye Bethi-dagoni, nepejoo metuata lelo pooki oshomo apa aisudori teine, nepik sii enkima nena anas pooki naamanita nepur.

⁸⁵Ore ina olong neye iltunga'ana inkalifuni isiet te nkima aashu to lalem.

⁸⁶Nelo Yonatan neshet olng'oborr te Askaloni, nepuonu ltung'ana le nkanasa aitoomon ninye te nkanyit sapuk.

⁸⁷Neshuko Yonatan o ltung'ana lenyena Yerusalem o masaa kumok.

⁸⁸Ore peyie ening olaiguanani Aleksanda enataasa Yonatan, neisho ninye enkanyit sapuk oleng.

⁸⁹Neirriwaki ninye saabu naenikini oloilelai, naaishori apa osotua loo laiguanani, neisho ninye enkanasa Ekron o enkop naamanita.