Read Maasai Bible – Biblia Sinyati 1 Ilmakabayo 11 Bible Online

1 Ilmakabayo 11 - Maasai Bible – Biblia Sinyati bible

1 Ilmakabayo 11

¹Neiturrur Olaiguanani Tolemai le ile le Misiri enjore sapuk, kumok oleng alang osinyai le naiposha o melin. Keyieu apa ninye nepikaki Aleksanda oreshet peyie eibung ninye neya enkitoo enye aitaa enenye.

²Neaku nelo Siria olmumai le seriani, neboloki ltung'ana inchomito ninye neitoomon. Netiaka apa olaiguanani Aleksanda peyie eas ina amu ore Tolemai naa olaputani lenye.

³Kake ore eloito Tolemai moikuape, nepik enjore enye nkanas pooki.

⁴Ore peyie ebaya Ashdodi, neitodol ltung'ana ninye enkaji e nkai enye Beth-dagoni natapejoki o nkinyala pooki eina anasa o nkanas naamanita. Netii apa seseni pooki weji, loo lelo tung'ana otapejoyie apa Yonatan metuata te nkata o larrabal netii apa nkoitoi naimita Tolemai.

⁵Neliki ltung'ana pooki naataasa Yonatan eisiling ajo kepiki ninye entoroni kake eitu ejo toki Tolemai.

⁶Nelo Yonatan too sirua le nkishiaa Yopa atumore ninye. Neirorokino ninche neirrag ine.

⁷Neitarioo Yonatan Tolemai ometabaiki olchorro le Utero neshuko Yerusalem.

⁸Ore teina oitoi neitoria olaiguanani Tolemai te nkaraki Aleksanda nkanas natii enaiposha ometabaiki moikuape e naiposha e Selekudia.

⁹Ore teine neiriwaki Tolemai olaiguanani Demetrio ele kilikuai: “Maitayu olning'o, ore entito ai naa enkitok e Aleksanda, kake kashuko ninye naaisho iyie peyie aisho entoria enkitoo e papaai lino.

¹⁰Ainosua ajo aishoo Aleksanda amu atetema ajo aar nanu.”

¹¹Neitangor Tolemai Aleksanda te nkaraki keyieu apa ninye neya enkitoo enye.

¹²Neoru Aleksanda entito enye neisho Demetrio, negil olning'o lenye o Aleksanda neibalayu mang'atisho enye.

¹³Nejing Tolemai Antiokia neya enkitoo e Asia. Neaku ninye keeta enkitoo e Misiri o Asia.

¹⁴Ore ina rishata netii apa olaiguanani Aleksanda Kilikia amu ore ltung'ana leina kop negira apa aata engolong'u.

¹⁵Kake ore peyie ening enataasa Tolemai, nelo aarare ninye, nenagare Tolemai ninye o enjore sapuk nemir ninye too larrabal.

¹⁶Ore ebaya ninye Tolemai shumata engolon enye, neisik ninye Aleksanda alo Arabia aigoru enemitu ninye,

¹⁷kake nedung olmarabui obo oji Zabdieli elukunya enye neyaki Tolemai.

¹⁸Ore too nkolong'i are neye sii ninye Tolemai, ore enjore natunguayie apa ninye too sempewueti near lelo omanya nena anas.

¹⁹Ore too lari le 167, neaku Demetrio li aare olaiguanani.

²⁰Ore ake teina rishata neiturrur apa Yonatan ltung'ana le Yudea peyie edoiki osempewuet le Yerusalem, neshet iltaleta te nkaraki olarrabal.

²¹Kake nepuo lelo Lyahudi aruok oiba enkop enye enetii olaiguanani Demetrio li are nejoki ninye etamana Yonatan osempewuet le Yerusalem.

²²Ore peyie ening Demetrio ina, negoro oleng nesioki aidur alo amany Tolemai. Neigeroki Yonatan aitanap ninye peyie meitoki aaman osempewuet, nelo sii menototo o ninye te Tolemai nemeimutie ake.

²³Ore peyie etum Yonatan ilo kilikuai, neitanap ltung'ana lenyena peyie epuo dukuya aaman ilo sempewuet, negelu embata oo larikok loo lyahudi o embata oo lapolosak peyie eiriemarie, netem ninye enkishui enye,

²⁴nelo enetii olaiguanani te Tolemai, neya ninche ilkilani enkosholai o saabu o kulie kishoorot. Netil ninye olaiguanani.

²⁵Hoo netolikiotie laruok le nkop enye Yonatan,

²⁶kake neitaas olaiguanani ninye anaa enaitaasa obo lelo ootii apa te dukuya ninye. Neanyit ninye te dukuya lautarok lenyena,

²⁷neibalie ninye metaa olapolosani kitok, neshukoki enkanyit enye negelu ninye metaa shumata etii obo loo “Lchoreta loo laiguanani.”

²⁸Neomon Yonatan olaiguanani peyie epaliki enkop e Yudea o lole lkerenketi okuni le Samaria, peyie melak kodi, neisilingie ninye inchere ore te neas ina Demetrio, kelaaki ninye esiani oo impisai inkalifuni tomon oo ntalantani enkosholai.

²⁹Nenyorraa olaiguanani, neigeroki empalai Yonatan aimie nena:

³⁰Olaiguanani Demetrio enetii olaiguanani Yonatan o enkop oo Lyahudi, airoroki intae.

³¹“Ore peyie angas aliki kairiwaki empalai naigeroko olalashe Lastene te nkaraki iyie.”

³²“ ‘Olaiguanani Demetrio enetii olkitok olalashe Lastene, airoroki.

³³Atumuta peyie eisho enkop oo Lyahudi iretot amu etaa ninye osotua lang te sipata neibung'a ninye ilo ning'o.

³⁴Aimie enairirikino enye te nkop e Yudea o lkerenketi le Ephraim Luda o Rathamini, naa durrieki te Samaria apik ninye Yudea, Keaku eretot e pooki ng'ae elo Yerusalem aitayu olasar, amu ore elaata e kodi olari o elaata oo lnganayio le dukuya enkikesare nemekure aa olaiguanani eishori kake enkaji e Nkai.

³⁵Natapalikia sii ninche elaata ai te nkaraki ematua e tomon, kodi e munyan o kulie kodii.

³⁶Meetai entoki naimaka ena palai najuti too inkolong'i napuonu.’ ”

³⁷“ ‘Neaku ing'ura oleng ajo ore ena palai neigero aitobiraki nepejuni ae neishori Yonatan neyaie aapik iwejitin naanarikino too ndonyio enkaji e Nkai.’ ”

³⁸Ore peyie edol olaiguanani Demetrio ajo etoborro enkop tiabori enkitoria enye, mekure etii engolong'u, negil ninye enjore enye nepuo ltung'ana inkang'itie, nelekuni ake sikarini oigero ongu'aa apa ninche kop natoyio oo Lgiriki. Neiko ena meibayuni Demetrio sikarini ooatasishote okulie aiguanak, amu mekure etum ninche olekoisiayo.

³⁹Ore obo le nchoto e Aleksanda oji Trifo, nedol sikarini eigunyuguny te nkaraki Demetrio, nelo enetii Lmalkue o Lmarabui oitubulua apa enkerai e Aleksanda te Antioko.

⁴⁰Neton ninye te Antioko te rishata naado, ejoki Lmalkue peyie eisho ninye ina nkerai e Aleksanda, peyie eitaa ninye olaiguanani. Nejoki Lmalkue ina bae nataasa Demetrio neibaitie sikarini ninye.

⁴¹Neirriwaa Yonatan olkilikuai enetii olaiguanani Demetrio ejoki peyie eitayu ninye enjore to sempewuet le Yerusalem o sempewueti le Yudea, amu egira ninche aitanyamal Lyahudi.

⁴²Newaliki Demetrio ajoki, “Kaas ina, tenei shoru erishata, naishoo enkop ino enkanyit sapuk.

⁴³Kake taretuoki naa irriwai sikarini laamitu nanu amu etekepari enjore ai.”

⁴⁴Neirriwaa Yonatan sikarini inkalifuni uni Antiokia, neshipa olaiguanani pee bau,

⁴⁵amu eiturrurote olorere ora nkalifuni iip nabo o tikitam aajo mataar ninye.

⁴⁶Kake neisikaki ninye enkaji e nkitoo, neya ilo orere enkitoria enkanasa neiteru ninche aarisho.

⁴⁷Neipot olaiguanani enjore oo lyahudi peyie eretu ninye, nepuo ninye aaretu. Neimaa enkanasa pooki near ltung'ana enkalifu nabo.

⁴⁸Neitajeu ninche enkishui olaiguanani, kake neidakie nepejoo enkanasa.

⁴⁹Ore peyie edol olorere ajo eitoria Lyahudi enkanasa, neiminie ninche osiligi nesai ninche olaiguanani,

⁵⁰peyie eisho ninche eseriani neitasheyie Lyahudi.

⁵¹Ore lelo aruok neirragie imasaa enye olarrabal neishooyo aate. Ore olaiguanani o ltung'ana lenyena pooki netum enkanyit sapuk oleng too Lyahudi. Ore ninche Lyahudi neshukunye Yerusalem o masaa kumok.

⁵²Neaku Demetrio olaiguanani odede, netum enkop eseriani te nkitoria enye,

⁵³kake negil ninye ekisiligata neibelekenyakino Yonatan. Eitu eshukoki ninye enashe kake eshomo dukuya aitanyamal ninye.

⁵⁴Ore te dukuya peno, neshukunye Trifo o enkerai Antioko neishopoki ninye olmarisian olaiguanak.

⁵⁵Ore lelo sikarini pooki ootarayoki apa nepuonu aaretu olaiguanani ng'ejuk. Nemir ninche Demetrio neisik.

⁵⁶Neibung Trifo iltomia loo larrabal neitore Antiokia.

⁵⁷Neigeroki olaiguanani kiti Antioko Yonatan neitaa ninye olapolosani kitok neitore sii lkerengeti oong'un neisho sii enkarna “Lchore loo laiguanani.”

⁵⁸Neirriwaki isanini e saabu nainosie endaa e teipa, neisho esipata naokie te nkikompe e saabu, neishop ilkilani lo laiguanani o saabu naenikini oloilelai.

⁵⁹Negelu olalashe le Yonatan Simon olgafanai le nkop e enaiposha e Tirza ometabaiki lpolosien le Misiri.

⁶⁰Nelo Yonatan o enjore enye aimaa enkanasa e Siria, neshulare enjore e Siria ninche to lning'o. Nelo Askaloni, neitoomon lelo leina kop neisho ninye enkanyit sapuk.

⁶¹Nelo Gaza kake neiken lelo leina kop inchomiti peyie mejing ake. Neman ninye ina anasa nepejoo nepur nena pooki naamanita.

⁶²Neipotu ltung'ana le Gaza eseriani, nenyorraa Yonatan, neya nkera oo larikok neirriwa ninche Yerusalem anaa loena, nelo ometabaika Dameski.

⁶³Neiyolou Yonatan inchere eetuo lkituuak le Demetrio Kedesh e Galilaya o enjore sapuk, ejo ninye peyie maitayu Yonatan te nkitoo.

⁶⁴Neiguaa olalashe lenye Simon te Yudea nelo atumore ninche too larrabal.

⁶⁵Neman enkanasa e Bet-Suri nearare te rishata naado.

⁶⁶Neomonu lelo eseriani nenyorraa Simon, neya ina anasa nemiraa ltung'ana nepik ine enjore.

⁶⁷Neshet Yonatan o enjore enye lng'oborr te naiposha e Galilaya. Ore te nkakenya nelo o enjore enye ong'ata e Hazori,

⁶⁸ine weji apa negira anyiku enjore sapuk oo lomon peyie enangare ninche.Meyiolo Yonatan, etunguaitie apa ninche enjore olnukata too ldoinyo,

⁶⁹nelotu ilo lnukata nedoiki ninche,

⁷⁰Nerrinyoo enjore pooki e Yonatan neisik, neing'uari lkituaak aare, Matatia enkerai e Absalom o Yudas enkerai e Kalfi.

⁷¹Nenger Yonatan lkilani lenyena te mion nepik kewan enterit elukunya neomon Enkai.

⁷²Neshukokino olarrabal, neidakie lmang'ati neisik ninche.

⁷³Ore peyie edol enjore enye ina neshukokino ninye nesujaa lmang'ati ometabaiki olng'oborr lenye le Kedesh neya neibung ninche long'oborr.

⁷⁴Etaaraki ina olong enjore oo lmang'ati inkalifuni uni. Neshuko Yonatan Yerusalem.